InfoHub Logo

باتىس قازاقستان جوعارى مەديسينالىق كوللەدجىندە وسى وقۋ ورنىنىڭ 100 جىلدىعىنا وراي «قازاقستان رەسپۋبليكاسىندا «دەنساۋلىق» مەملەكەتتىك باعدارلاماسىن جۇزەگە اسىرۋ اياسىندا مەيىربيكەلىڭ ءبىلىم بەرۋدى جاڭارتۋ» تاقىرىبىندا حالىقارالىق عىلىمي-تاجىريبەلىك كونفەرەنسيا وتكىزىلدى.

قازاقستان مەن رەسەيدىڭ مەديسينالىق وقۋ ورىندارىنىڭ وكىلدەرى، دەنساۋلىق ساقتاۋ سالاسىنىڭ قىزمەتكەرلەرى قاتىسقان جيىندا وبلىستىق دەنساۋلىق ساقتاۋ باسقارماسىنىڭ باسشىسى قاميدوللا يرمەنوۆ باتىس قازاقستان جوعارى مەديسينالىق كوللەدجىنىڭ ءبىر عاسىر ىشىندە كوپتەگەن تابىستارعا قول جەتكىزگەنىن اتاپ ءوتتى. ق ر دەنساۋلىق ساقتاۋ جانە الەۋمەتتىك دامۋ مينيسترلىگى عىلىم جانە ادامي رەسۋرستار دەپارتامەنتى مەديسينالىق ءبىلىم جانە عىلىم باسقارماسىنىڭ باسشىسى ءۇلميرا نۇرالييەۆا جىلى لەبىزىن ارناۋمەن بىرگە كۇن تارتىبىندەگى تاقىرىپقا بايلانىستى بايانداما جاساسا، ق ر دەنساۋلىق ساقتاۋ جانە الەۋمەتتىك دامۋ مينيسترلىگى مەيىرگەرلەر ءىسى بويىنشا شتاتتان تىس باس مامانى، «قازاقستان رەسپۋبليكاسى مەديسينالىق كوللەدجدەرى وداعى» زاڭدى تۇلعالار بىرلەستىگىنىڭ ءتوراعاسى، مەديسينا عىلىمىنىڭ دوكتورى سۇلتان سەيدۋمانوۆ تا كوللەدج ۇجىمىن عاسىرلىق تويىمەن قۇتتىقتادى. سونداي-اق رەسەي فەدەراسياسى «سامارا مەملەكەتتىك مەديسينالىق ۋنيۆەرسيتەتى» مەيىرگەرلىك ءبىلىم بەرۋ ينستيتۋتىنىڭ ديرەكتورى، مەديسينا عىلىمىنىڭ دوكتورى، پروفەسسور    لاريسا كاراسيەۆا، ن.لياپينا اتىنداعى سامارا مەديسينالىق كوللەدجىنىڭ ديرەكتورى نادەجدا  ياروچكينا، اقتوبە وبلىسىنىڭ مەيىربيكە ءىسىن دامىتۋ ورتالىعى   ديرەكتورىنىڭ  ورىنباسارى زامزيا اليپوۆا جانە باسقالار ءسوز الىپ، تاجىريبە، وي-پىكىرلەرىمەن ءبولىستى.

2016-2020 جىلدارعا ارنالعان «دەنساۋلىق» باعدارلاماسىنا سايكەس جاڭا تالاپتار قويىلىپ، باتىس قازاقستان مەديسينالىق كوللەدجىنىڭ باتىس قازاقستان جوعارى مەديسينالىق كوللەدجىنە اينالعانى اتالىپ ءوتىلدى.

كونفەرەنسيادان كەيىن وبلىستىق قازاق دراما تەاترىندا وتكەن سالتاناتتى جيىندا باتىس قازاقستان جوعارى مەديسينا كوللەدجىنىڭ ۇجىمىن مەرەيتويىمەن ءوڭىر باسشىسىنىڭ اتىنان وبلىس اكىمىنىڭ ءبىرىنشى ورىنباسارى ارمان وتەعۇلوۆ قۇتتىقتاپ، ءبىر توپ قىزمەتكەرگە وبلىس اكىمىنىڭ العىسحاتىن تابىس ەتتى. جيىن بارىسىندا سونداي-اق وزات قىزمەتكەرلەرگە ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ «دەنساۋلىق ساقتاۋ ءىسىنىڭ ۇزدىگى» توسبەلگىسى مەن قۇرمەت گراموتالارى، باسقا دا ماراپاتتار تاپسىرىلدى.

باتىس قازاقستان جوعارى مەديسينالىق كوللەدجىنىڭ ديرەكتورى نۇرجان شومبالوۆتىڭ ايتۋىنشا، كوللەدج ەلىمىزدەگى ەڭ العاشقى مەديسينالىق وقۋ ورنى بولىپ تابىلادى. ورال قالاسىندا فەلدشەرلەر مەن فەلدشەر-اكۋشەرلەردى دايارلايتىن فەلدشەرلىك-اكۋشەرلىك مەكتەپ 1916 جىلى 1 قاراشادا اشىلدى. بۇدان كەيىن 12-15 جىلدان سوڭ عانا قازاقستاندا باسقا مەديسينالىق وقۋ ورىندارى اشىلا باستادى. 1923 جىلى اتالعان مەكتەپ قازاق ولكەلىك مەديسينالىق تەحنيكۋمى رەتىندە سول كەزدەگى ەل استاناسى ورىنبورعا اۋىستىرىلدى. 1929 جىلى استانا قىزىلورداعا اۋىستىرىلعاننان كەيىن تەحنيكۋم ورالعا قايتا ورالدى.

قازىرگى تاڭدا كوللەدج - ەلىمىزدىڭ جەتەكشى مەديسينالىق كوللەدجدەرىنىڭ ءبىرى. التى ماماندىق جانە 8 بىلىكتىلىك بويىنشا مەديسينالىق قىزمەتكەرلەردىڭ جوعارى بىلىكتى جانە قۇزىرەتتى كادرلارىن دايىندايتىن قازاقستان رەسپۋبليكاسى دەنساۋلىق ساقتاۋ مينيسترلىگىنىڭ بازالىق وقۋ ورنى بولىپ تابىلادى. بۇگىندە كوللەدجدە 1050 ستۋدەنت ءبىلىم الۋدا.

2014 جىلى باتىس قازاقستان مەديسينالىق كوللەدجى قازاقستان رەسپۋبليكاسىنىڭ ۇزدىك التى مەديسينالىق كوللەدجى قاتارىندا مەيىربيكە ءىسى ماماندىعى بويىنشا قولدانبالى باكالاۆرياتتىڭ ءبىلىم بەرۋ باعدارلاماسىن ەنگىزۋدىڭ دسم سىنامالى جوباسىن ىسكە اسىرۋعا قوسىلدى. بۇل جوبا «قازاقستان رەسپۋبليكاسىنىڭ دەنساۋلىق ساقتاۋ سالاسى سەكتورىنداعى تەحنولوگيالاردى بەرۋ جانە ينستيتۋسيونالدىق رەفورما جۇرگىزۋ» دۇنيەجۇزىلىك بانك جوباسى اياسىندا دايىندالىپ، ەنگىزىلۋدە.

كوللەدج پەداگوگتارىنىڭ كوپشىلىگى جوعارى جانە ءبىرىنشى ساناتقا يە. الماتى، استانا، تۇركيا، رەسەي، فينليانديا، يسپانيا، اقش، گەرمانيادا وقۋدان، تاجىريبەدەن وتكەن. جىل سايىن وقىتۋشىلاردىڭ 96 پايىزىنا جۋىعى ءوز بىلىكتىلىكتەرىن ارتتىرادى. كوللەدج تۇلەكتەرى ەلىمىز وڭىرلەرىندە تابىستى ەڭبەك ەتۋدە، ولاردىڭ 92-93 پايىزى جىل سايىن ماماندىعى بويىنشا قىزمەتكە ورنالاسادى، قالعاندارى جوو-لارعا تۇسەدى.

 

 

---