InfoHub Logo

قازاقستان عىلىمى مەن ادەبيەتتانۋ سالاسىنا ولشەۋسىز ۇلەس قوسقان كورنەكتى عالىم، ادەبيەتتانۋشى، فولكلورتانۋشى، ۇلتتىق عىلىم اكادەمياسىنىڭ اكادەميگى، فيلولوگيا عىلىمدارىنىڭ دوكتورى، مەملەكەتتىك سىيلىقتىڭ لاۋرەاتى سەيىت اسقار ۇلى قاسقاباسوۆ ومىردەن وزدى.

سەيىت قاسقاباسوۆ 1940 جىلى 24 ماۋسىمدا سەمەي قالاسىندا دۇنيەگە كەلگەن. بالا كۇنىنەن بىلىمگە قۇشتار بولعان ول 1964 جىلى اباي اتىنداعى قازاق پەداگوگيكا ينستيتۋتىن ۇزدىك ءتامامداپ، عىلىم جولىنداعى ساپارىن باستادى. عالىم ءوزىنىڭ ەڭبەك جولىندا ءتۇرلى ماڭىزدى قىزمەتتەردى اتقاردى. ول — قازاقستان مينيسترلەر كابينەتى جانىنداعى جوعارى اتتەستاسيا كوميسسياسىنىڭ ءتوراعاسى، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ شىعىستانۋ فاكۋلتەتىنىڭ دەكانى، سونداي-اق ۇلتتىق عىلىم اكادەمياسىنىڭ ادەبيەت جانە ونەر ينستيتۋتىنىڭ ديرەكتورى قىزمەتتەرىندە جەمىستى ەڭبەك ەتكەن.

اكادەميكتىڭ قازاق ادەبيەتى مەن حالىق اۋىز ادەبيەتىن زەرتتەۋگە قوسقان ۇلەسى وراسان. ونىڭ عىلىمي مۇراسى قازاق فولكلورى مەن حالىق پروزاسىنىڭ قىر-سىرىن اشىپ كورسەتۋگە باعىتتالعان. سەيىت قاسقاباسوۆتىڭ قالامىنان «كازاحسكايا ۆولشەبنايا سكازكا»، «قازاقتىڭ حالىق پروزاسى»، «كولىبەل يسكۋسستۆا»، «كازاحسكايا نەسكازوچنايا پروزا»، «اباي جانە فولكلور»، «زولوتايا جيلا»، «جانازىق»، «قوزى كورپەش-بايان سۇلۋ. قىز جىبەك. قازاقتىڭ عاشىقتىق جىرلارى» اتتى مونوگرافيالار مەن زەرتتەۋلەر دۇنيەگە كەلگەن. ول — 300-دەن استام عىلىمي ەڭبەكتىڭ، ونىڭ ىشىندە 9 ءىرى مونوگرافيانىڭ اۆتورى.

سەيىت قاسقاباسوۆتىڭ ەڭبەكتەرى قازاق حالقىنىڭ اۋىز ادەبيەتىن جاڭا قىرىنان زەردەلەۋگە، ۇلتتىق مادەنيەتتىڭ تامىرىن تەرەڭ تۇسىنۋگە جول اشتى. ول ءوز ءىزباسارلارىنا مول مۇرا قالدىرىپ، عىلىم مەن ونەردىڭ دامۋىنا سۇبەلى ۇلەس قوستى.

بەلگىلى عالىمنىڭ ومىردەن ءوتۋى قازاق عىلىمى مەن رۋحانياتى ءۇشىن ورنى تولماس اۋىر قازا بولدى.

مارقۇمنىڭ وتباسى مەن جاقىندارىنا Infohub.kz سايتى اتىنان قايعىرا كوڭىل ايتامىز.