InfoHub Logo

الەمدەگى ەڭ ۇزدىك شاحماتشىلاردىڭ ءبىرى، ءۇش دۇركىن الەم چەمپيونى بيبيسارا اساۋبايەۆا جاتتىعۋ پروسەسىنە قانشا قاراجات جۇمسالاتىنىن اشىق ايتتى. ونىڭ ايتۋىنشا، شاحمات تەك قاراپايىم ويىن ەمەس، سونىمەن قاتار قىمبات سپورت ءتۇرى.

بۇل تۋرالى Infohub.kz اقپارات اگەنتتىگى حابارلايدى.

جاتتىقتىرۋشىنىڭ قىزمەتى قانشا تۇرادى؟

بيبيسارا اساۋبايەۆا جىلىنا 6 رەت، ءارقايسىسى 10 كۇننەن جاتتىعۋ جيىندارىن وتكىزەدى. سپورتشىنىڭ جەكە جاتتىقتىرۋشىسىنىڭ ءبىر كۇندىك قىزمەتى 1000 ەۋروعا باعالانادى. بۇل شامامەن 587،7 مىڭ تەڭگە.

«شاحمات الەمىنەن تىس جاندار بۇل سپورتتى ارزان دەپ ويلايدى. بىزدە تەننيس، گولف، بوكس سەكىلدى ۇلكەن جۇلدە قورى جوق، ءبىراق شىعىندار وتە جوعارى. مەنىڭ جەكە جاتتىقتىرۋشىم كۇنىنە 1000 ەۋرو الادى. بۇعان ۇشاق بيلەتى، تۇرۋ شىعىندارى كىرمەيدى»، - دەيدى اساۋبايەۆا.

دەمەك، تەك جاتتىقتىرۋشىعا عانا جىلىنا شامامەن 60 مىڭ ەۋرو (35،2 ميلليون تەڭگە) جۇمسالادى.

كوماندادا 11 مامان بار

سپورتشىنىڭ كومانداسى 11 ادامنان تۇرادى. ولاردىڭ قاتارىندا نەگىزگى جاتتىقتىرۋشىلار، سپاررينگ-سەرىكتەستەر، دەبيۋت، ەندشپيل جانە ميتتەلشپيل بويىنشا ماماندار بار.

«ءبارى ءسىزدىڭ دەڭگەيىڭىزگە بايلانىستى. مەن تۋرنيرگە قاتىسۋ قۇقىعىن العاندىقتان، دايىندىق الدەقايدا كۇردەلى بولادى. ءقازىر مەنىڭ كوماندامدا 11 ادام بار. ولاردىڭ ءارقايسىسى ءوز ۇلەسىن قوسادى، سوندىقتان شىعىندار قوماقتى بولادى»، - دەپ ءتۇسىندىردى شاحماتشى.

ايتا كەتەيىك، بيبيسارا اساۋبايەۆا بليس-شاحماتتان الەم چەمپيوناتىنداعى جەڭىسى ارقاسىندا تۋرنيرگە قاتىسۋ مۇمكىندىگىن يەلەندى. بۇل تۋرنير 28 ناۋرىز بەن 16 ءساۋىر ارالىعىندا وتەدى. ءتۋرنيردىڭ جەڭىمپازى كلاسسيكالىق شاحماتتان الەم چەمپيونى اتاعىنا تالاساتىن بولادى.