InfoHub Logo

بالاباقشالارعا، مەكتەپتەرگە، كوللەدجدەرگە جانە جوعارى وقۋ ورىندارىنا قابىلداۋ ءۇشىن قۇجات تاپسىرۋ جەڭىلدەتىلدى.

«ەلىمىزدەگى مەملەكەتتىك قىزمەتتىڭ باسىم بولىگى ءبىلىم بەرۋ سالاسىندا كورسەتىلەدى. اسىرەسە، بالاباقشالارعا، مەكتەپتەرگە، كوللەدجدەرگە جانە جوعارى وقۋ ورىندارىنا قابىلداۋ قىزمەتى — ۇلكەن سۇرانىسقا يە.

ءبىلىم بەرۋ ۇيىمدارىنا قۇجات تاپسىرۋ ءۇشىن ءبىراز ۋاقىت جۇمساۋ قاجەت بولاتىن. ول ءۇشىن كوپتەگەن انىقتامالاردى جيناپ، باسقا مەملەكەتتىك ورگانداردان قۇجاتتاردى الىپ، ولاردى اپارىپ بەرۋ سىندى ءبىرقاتار كەزەڭدەردەن ءوتۋ قاجەت ەدى. مۇنداي پروسەسس وتە ىڭعايسىز ەكەنى تۇسىنىكتى.

ءبىز بۇل جاعدايدى وزگەرتىپ جاتىرمىز»، دەپ جازدى اسحات ايماعامبەتوۆ Facebook-تەگى پاراقشاسىندا.

ءمينيستردىڭ ايتۋىنشا، بالاباقشالارعا، مەكتەپتەرگە، كوللەدجدەر مەن جوعارى وقۋ ورىندارىنا قابىلداۋ پروسەسىن اۆتوماتتاندىرۋ، قاعازباستىلىق دەڭگەيىن كۇرت تومەندەتۋ، جالپى قابىلداۋ تالاپتارىن جەڭىلدەتۋ جۇمىستارى قولعا الىنعان.

مەكتەپكە دەيىنگى ءبىلىم بەرۋ ۇيىمدارى بويىنشا

بيىل ءبىز بالالاردى بالاباقشالارعا قابىلداۋ ەرەجەلەرىنە وزگەرىستەر ەنگىزدىك. ەندى اتا-انالار كەزەككە قويۋ قىزمەتىن تەك ءبىلىم بەرۋ ءبولىمىنىڭ كەڭسەسى ارقىلى عانا ەمەس، سونداي-اق ءوز بەتىمەن «ازاماتتارعا ارنالعان ۇكىمەت» بولىمدەرى نەمەسە «ەلەكتروندىق ۇكىمەت» ۆەب-پورتالى ارقىلى جۇزەگە اسىرا الادى. بۇل رەتتە كوپتەگەن قۇجاتتاردى جان-جاقتان جيناۋ قاجەت بولمايدى.

العاش رەت بالاباقشالارعا كەزەكتە تىركەلگەندەر اراسىندا باسىمدىق ەڭ الدىمەن پەداگوگتەردىڭ بالالارىنا جانە مۇگەدەك بالاسى بار وتباسىلاردىڭ بۇلدىرشىندەرىنە بەرىلەدى.

ەگىز بالالارى، ۇشەمدەرى بار وتباسىلار بالالارىن ءبىر بالاباقشاعا بەرۋ بويىنشا قيىندىقتارعا تاپ بولاتىن. ەندى مۇنداي اتا-انالاردىڭ ءبىر بالاسىنا بەلگىلى ءبىر بالاباقشادان ورىن تيگەن جاعدايدا، بارلىق بالالارى دا (ەگەر تاعى ورىن بولcا) سول بالاباقشاعا جولداما الادى.

سونىمەن قاتار، مەكتەپكە دەيىنگى ۇيىمدارداعى بوس ورىنداردى ءبولۋ پروسەسى جۇيەگە كەلتىرىلدى. ەگەر بۇعان دەيىن ارنايى ساناتتاعى بالالار قابىلدانعاننان كەيىن، ءۇش كۇن وتكەن سوڭ، كەزەكتە تۇرعانداردىڭ بارلىعىنا بىردەي جاڭا ورىنداردى الۋ مۇمكىندىگى اشىلسا (مۇندايدا كەزەكتىڭ ءمانى جويىلاتىن)، ەندى ورىندار كەزەكتە تۇرعان كەلەسى ءبىرىنشى 1 000 (ءبىر مىڭ) ءوتىنىش بەرۋشىگە اشىلاتىن بولادى.

مەكتەپكە قابىلداۋ بويىنشا

كەلەسى جىلدان باستاپ ءبىرىنشى سىنىپ وقۋشىلارىنىڭ قۇجاتتارىن قابىلداۋ ماۋسىمنان باستاپ ەمەس، ودان ەرتەرەك — ءبىرىنشى ءساۋىر مەن ءبىرىنشى تامىز ارالىعىنا دەيىن جالعاسادى.

مۇنداي وزگەرىستەر نە ءۇشىن قاجەت؟ بىرىنشىدەن، بۇل — اتا-انالار ءۇشىن ىڭعايلى. ولار مەكتەپتى الدىن-الا انىقتاپ، وقۋعا ءتۇسۋ ءۇشىن قاجەتتى قۇجاتتارىن مەكتەپ ۇجىمى نەمەسە وزدەرى ەڭبەك دەمالىسىندا بولعان ۋاقىتتا ەمەس، ودان ەرتەرەك تاپسىرا الادى.

سونىمەن قاتار، جاز بويى اتا-انالار قاجەتتى وقۋ قۇرالدارىن جيناقتاپ، ءتيىستى جۇمىستاردى جۇرگىزىپ، بالالارىن مەكتەپكە دايىنداۋى كەرەك. اتا-انالار قۇجاتتاردى جيناۋعا، مەكتەپتى انىقتاۋعا ۇلگەرمەيتىندەرىن ايتىپ شاعىمداناتىن، سوندىقتان قۇجاتتاردى وتكىزۋ پروسەسى كوبىنەسە 31 تامىزعا دەيىن، كەي جەرلەردە ءتىپتى قىركۇيەكتىڭ ورتاسىنا دەيىن سوزىلاتىن.

مەكتەپ اكىمشىلىگىنىڭ كوزقاراسى بويىنشا، بۇل وزگەرىستەر پروسەستەردى وڭايلاتادى جانە مەكتەپ قىزمەتىن جوسپارلاۋدى الدەقايدا ىڭعايلى ەتەدى. ياعني، مەكتەپ باسشىلىعى سىنىپتاردى الدىن-الا تولتىرا الادى، وقۋلىقتاردىڭ قاجەتتى سانىمەن الدىن الا قامتاماسىز ەتىلەدى جانە ولاردى ۋاقىتىندا جەتكىزەدى، ساعاتتاردى بولەدى، سىنىپتاردىڭ سانىنا بايلانىستى پەداگوگتەردى قابىلداي الادى. جالپى، وقۋ جىلىنىڭ باستالۋىنا ءتيىمدى دايىندالۋعا مۇمكىندىك تۋادى.

ەندى اتا-انالار بالالارىنىڭ مەكتەپكە بارۋىن الدىن الا جوسپارلاپ، ناقتى ءبىلىم بەرۋ ۇيىمىن انىقتاۋى قاجەت جانە كەرەك قۇجاتتاردى ۋاقىتىندا تاپسىرۋدى، جىبەرۋدى ۇيرەنۋى ماڭىزدى.

ەستەرىڭىزگە سالا كەتسەم، ەندى وسى ۇدەرىستەردىڭ بارلىعى تولىعىمەن اۆتوماتتاندىرىلادى جانە «ەلەكتروندىق ۇكىمەت» ارقىلى قولجەتىمدى بولادى. جاي عانا ۇيدە وتىرىپ، ۋاقىت پەن باسقا دا رەسۋرستاردى شىعىنداماي-اق پورتال ارقىلى 1-سىنىپقا قابىلداۋ تۋرالى ءوتىنىش بەرۋگە بولادى.

وقۋشىلاردى ءبىر مەكتەپتەن ەكىنشىسىنە اۋىستىرۋ دا جاڭا فورماتتا جۇرگىزىلەدى، ول پروسەسس تە اۆتوماتتاندىرىلادى.

ياعني، اتا-انالارعا ءبىر مەكتەپتەن ەكىنشى مەكتەپكە بارۋدىڭ قاجەتى بولمايدى جانە قاعاز تۇرىندە قۇجاتتاردى تاپسىرۋدىڭ، ەسكى مەكتەپتەن كەتۋ تۇبىرتەگىن، ودان كەيىن كەلۋ تۇبىرتەگىن رەسىمدەۋدىڭ قاجەتى جوق. مۇنداي ەسكىرگەن، ۋاقىت جانە قارجى شىعىنىن تالاپ ەتەتىن راسىمدەۋ پروسەسىمەن كوبىسى «كەزىكتى» دەپ ويلايمىن. بۇل وزگەرىستەر اتا-انالار مەن مەكتەپ ءۇشىن ۋاقىتتى ۇنەمدەۋگە مۇمكىندىك بەرەدى. ءبىز بۇل جۇمىستى جاقىن ارادا اياقتايمىز.

ايتا كەتەرلىگى، بيىلدان باستاپ كوللەدجدەر مەن جوعارى وقۋ ورىندارىنا قابىلداۋ اۆتوماتتاندىرىلعان رەجيمدە قولجەتىمدى.

«وتكەن جىلى مەن اتا-انالارعا اتالعان جۇمىس 2020 جىلى اياقتالادى دەپ ۋادە بەرگەنمىن. ەندى بالالارعا قۇجاتتاردى قاعاز تۇرىندە تاپسىرۋدىڭ قاجەتى جوق، ءاربىر بولاشاق ستۋدەنت ءوزى ءۇشىن تاڭداعان كوللەدجدىڭ جانە جوو-نىڭ سايتتارى نەمەسە «ەلەكتروندىق ۇكىمەت» پورتالى ارقىلى قۇجاتتارىن تاپسىرا الادى. قۇجات تىگەتىن پاپكالاردى، كونۆەرتتەردى ساتىپ الۋ، قاعاز انىقتامالاردى تاپسىرۋ، تاڭ اتپاستان جوعارى وقۋ ورىندارى مەن كوللەدجدەردىڭ قابىلداۋ كوميسسيالارىندا كەزەكتە تۇرۋ نەمەسە باسقا ەلدى مەكەنگە بارۋدىڭ قاجەتى جوق. مۇنىڭ ءبارى ەندى وڭاي جانە ىڭعايلى بولادى، سايتقا كىرىپ، ءبىر تەتىكتى باسۋ ارقىلى بارلىق قۇجاتتاردى جىبەرۋگە بولادى.

جالپى مەملەكەتتىك قىزمەتتەر بويىنشا ءبىز بيزنەس-پروسەستەردى، راسىمدەردى بارىنشا اۆتوماتتاندىرىپ جاتىرمىز. بۇل پروسەستەر حالىققا بارىنشا ىڭعايلى بولۋى قاجەت»، دەپ جازدى اسحات ايماعامبەتوۆ.

---