InfoHub Logo

اسان قايعى جەلماياسىنا ءمىنىپ جەلدىرتىپ سارىارقانى ارالاپ جۇرگەندەگى جەرگە ايتقان سىندارى.

ۇزىن اققان ەرتىستى كورگەندە: «مىنا شىركىننىڭ بالاسى تويدىم دەپ قاراپ وتىرماس، قارنىم اشتى دەپ جىلاپ وتىرماس. سيىردىڭ ءمۇيىزى، كەۋىردىڭ قۇلاعى شىعىپ تۇرعان جەر ەكەن. كۇنىندە بالاسى كەۋىردەن جىلايدى-اۋ!» — دەپتى.

شىڭعىس تاۋىن، سەمەي تاۋلارىن كورگەندە: «مىنا شىركىننىڭ توپىراعى قۇتىرعان ەكەن. وعان شىققان ءشوپ قۇتىرادى، ونى جەپ سەمىرگەن مال قۇتىرادى، ونىڭ ەتىن جەپ، ءسۇتىن ىشكەن ادام قۇتىرادى. قان ۇزىلمەيتىن، كىسى ءولتىرۋ، ۇرىس-توبەلەس كوپ بولاتۇعىن جەر ەكەن»، — دەپتى.

تۇندىك وزەنىن كورگەندە: «ون ەكى قازىلىق وي تۇندىك، ماڭىراپ جاتقان قوي تۇندىك، قويدىڭ قۇلاعى تۇتام شىعىپ تۇرعان جەر ەكەن»، — دەپ، تاستاپ كەتۋگە قيماي ارتىنا ون قاراعان ەكەن. سونان قارا اتانعان.

قىزىلتاۋ دەگەن جەرگە كەلگەندە تاۋى، تاسى كەش بولعاندا قوي بولىپ ەڭىرەنىپ جاتادى ەكەن. «توقتىسى قىسىر قالمايتۇعىن جەر ەكەن» دەپتى.

باياناۋلا تاۋىن كورگەندە: «ات ەرىن الۋعا جارامايتۇعىن جەر ەكەن. شىركىندى جۇرت قالاي قونىس قىلىپ وتىرعان. ءبىر كورگەن كىسى كاپىر-اي، سەنى جەلكەمنىڭ شۇقىرى كورسىن دەيدى ەكەن. باۋىرىندا ءبىر قارا ەتكەن تۇزى بار ەكەن. تۇزى اۋىر ەكەن. ءبىر كۇن تۇنەپ كەتەمىن دەگەن ءبىر جۇما توقتاپ قالادى ەكەن. تۇزى جىبەرمەيدى ەكەن».

اششى بويىنا كەلگەندە ارتىنا قاراپ: «ا، باياناۋلا، سەنىڭ قونىس بولىپ تۇرعانىڭ مىناۋ اششىنىڭ ارقاسى ەكەن. مال جازعىتۇرىم ءبىر جۇما اششىلايدى ەكەن. كۇزگە تامان ءبىر جۇما اششىلايدى ەكەن. سونىسى ءبىر جىلعا تاتيدى ەكەن. ولاي بولماعان باياناۋلا قونىس بولۋعا جارامايتۇعىن جەر ەكەن»، — دەپتى.

بوكەيباي دەگەن توبەنى كورگەندە: «اناۋ باياناۋلا تاۋىنان مىنا بوكەمبايدىڭ قىرىق كەزىكتىگى بار ەكەن».

تەرىساققان دەگەن وزەندى كورگەندە: «سارىارقانىڭ تۇزدىعى ەكەن» دەپتى.

جەتىقوڭىردى كورگەندە: «سارىارقانىڭ ماۋىتى ەكەن» دەپتى.

شۋ دەگەن وزەندى كورگەندە: «مىنا شىركىننىڭ ەكى جاعى بورباس ەكەن، ونە بويى نار قامىس ەكەن. ءىشى تولعان جولبارىس ەكەن. بالانىڭ ءىشى قۋىرىلمايتۇعىن، پىشاعى سۋىرىلمايتۇعىن، ەركەگى ات بولاتۇعىن، ۇرعاشىسى جات بولاتۇعىن جەر ەكەن» دەپتى.

قاراتاۋدى كورگەندە: «كوكەكتەن باسقا قۇسى جوق، كوك ءشوپتى جۇلعاننان باسقا ءىسى جوق. اتى بەستىسىندە قارتاياتۇعىن، جىگىتى جيىرماسىندا قارتاياتۇعىن جەر ازعىنى دا مۇندا ەكەن، ەل ازعىنى دا مۇندا ەكەن» دەگەن ەكەن.

شىمكەنت، سايرامدى كورگەندە: «ەكى باس سابىر، بازار مالىندا بەرەكە بولمايتۇعىن، بازارى جاقىن — بايىماس، مازارى جاقىن — كوبەيمەس» دەگەن ەكەن.

ۇزىن اققان سىر بويىن كورگەندە: «باسى بايپاق، اياعى قايقاق، ەكى-اق اۋىلعا قونىس ەكەن. ءون بويى كەدەيلىككە بىتكەن جەر ەكەن».

«قاراتاۋدى جايلاسا، سىردىڭ بويىن قىستاسا، قونىس بولۋعا سوندا دۇرىس ەكەن» دەپتى.

---