InfoHub Logo

ادام كۇنىنە ورتا ەسەپپەن 16 مىڭعا جۋىق ءسوز ايتادى. الايدا عالىمدار بىرنەشە كۇن بويى ادەيى ءۇنسىز قالۋدىڭ ميعا اسەرى ەرەكشە ەكەنىن انىقتاعان. زەرتتەۋلەرگە سايكەس، تىنىشتىق پەن سويلەمەۋ تەك دەمالىس ەمەس، جۇيكە جۇيەسىن «قايتا جانداندىراتىن» قۇرال بولۋى مۇمكىن.

بۇل تۋرالى Infohub.kz اقپارات اگەنتتىگى حابارلايدى.

العاشقى كۇندەردەگى وزگەرىستەر

سويلەۋ توقتاعان كەزدە مي ىم-يشارا، ميميكا، جازۋ سياقتى بالاما بايلانىس تاسىلدەرىن ىزدەي باستايدى. بۇل كەزەڭدە سترەسس گورمونى كورتيزول دەڭگەيى جوعارىلايدى، وي اعىمى كۇشەيىپ، ىشكى «ديالوگ» پايدا بولادى. ەستۋ قابىلەتى جاقسارىپ، بۇرىن بايقالماعان دىبىستار انىق ەستىلەدى.

سونىمەن قاتار، تىنىشتىق ميدىڭ ماڭىزدى بولىگى گيپپوكامپ جۇمىسىنا وڭ اسەر ەتەدى. ءدال وسى ايماقتا جاڭا نەيروندار ءتۇزىلۋى مۇمكىن، بۇل ەستە ساقتاۋ قابىلەتىن جاقسارتۋعا ىقپال ەتەدى.

ءۇشىنشى-تورتىنشى كۇننەن كەيىن

بۇل كەزەڭدە كوپ ادام مازاسىزدىقتىڭ ازايعانىن جانە زەيىننىڭ جاقسارعانىن بايقايدى. بۇل ميدىڭ تىنىش كۇيدە بەلسەندى بولاتىن جۇيەسىنىڭ قايتا رەتتەلۋىنە بايلانىستى. سترەسس دەڭگەيى تومەندەيدى، ءبىر نارسەگە جاقسىراق دەن قويا باستايمىز، ەموسيالاردى ءتۇسىنۋ قابىلەتى ارتادى.

اپتا سوڭىنداعى ناتيجەلەر

اپتانىڭ اياعىنا قاراي اسەر تەرەڭدەي تۇسەدى. ەموسيالىق تۇراقتىلىق قالىپتاسادى، ويلاۋ ايقىندالىپ، كۇردەلى ماسەلەلەردى شەشۋ جەڭىلدەيدى. سونداي-اق، ۇيقى مەن جۇرەك ىرعاعى جاقسارادى.

ماماندار ەسكەرتەدى

مۇنداي ناتيجەلەر تەك ەرىكتى تۇردە جانە ءقاۋىپسىز ورتادا بايقالادى. ەگەر ادام ءماجبۇرلى تۇردە وقشاۋلانسا نەمەسە الەۋمەتتىك قولداۋدان ايىرىلسا، كەرىسىنشە كۇيزەلىس كۇشەيۋى مۇمكىن.

قورىتىندى

ءبىر اپتا ۇنسىزدىك ميستيكالىق تاجىريبە ەمەس، جۇيكە جۇيەسىن قالپىنا كەلتىرۋدىڭ ءبىر ءتاسىلى. تىنىشتىق ميدىڭ جۇمىسىن جاقسارتىپ، سترەسستى ازايتادى. ەڭ باستىسى – ۇنسىزدىكتى قالاي قولداناتىنىڭىزدا. سانالى تۇردە، ءوزىڭىزدى تۇسىنۋگە باعىتتالعان تىنىشتىق ەڭ ءتيىمدى ناتيجە بەرەدى.