InfoHub Logo

ءبىر اۋىلدا اشارشىلىق باستالىپتى. اۋىل باسشىسى اشارشىلىققا قارسى ءبىر امال تاۋىپ، شارا قولدانباق بولادى. ەرتەسىنە اۋىلدىڭ قاق ورتاسىنا تايقازان ورناتادى. سول قازانعا اۋىل تۇرعىندارىنا ءبىر تۇندە ءبىر كەسەدەن ءسۇت قۇيۋدى ءامىر ەتىپتى. بار بولعانى ءبىر كەسە ءسۇت قانا. ءبىراق، اركىم وڭاشا، جەكە دارا كەلىپ قۇيۋىن تالاپ ەتىپتى. اۋىل تۇرعىندارى باسشى بۇيرىعىن جاپپاي ورىنداۋعا كىرىسىپ كەتەدى. سول تۇندە-اق اي جارىعىمەن، قازاندى تولتىرىپ تاستايدى.

تاڭەرتەڭ، اۋىل باسشىسى كەلىپ قازاننىڭ قاقپاعىن اشىپ قاراسا... سۇمدىق-اي! ءوز كوزىنە ءوزى سەنەر ەمەس. ادامدار ءسۇت ەمەس قازاندى سۋعا تولتىرىپ كەتىپتى. ءسۇت قايدا؟ نەگە اۋىل ادامدارى ءسۇت ورنىنا سۋ قۇيعان؟ مۇنىسى نەسى؟ ءاسىلى، وقيعا بىلاي بولعان ەدى. قازانعا ءسۇت قۇيۋعا بارعاندار «ۇلكەن تاي قازانعا ەلدىڭ ءبارى ءسۇت قۇيىپ جاتقاندا وعان مەنىڭ ءبىر كەسە قۇيعان سۋىم اسەر ەتە قويماس» دەپ پەندەشىلىك ويعا بارعان ەدى. وسىلايشا، بارلىعى دا كوپشىلىككە ارقا سۇيەپ، ءبىر كەسە سۋدا تۇرعان ەشتەڭە جوق دەپ نەمقۇرايلىق تانىتقان ەدى. ءبىراق، ءدال وسىلاي تۇگەل اۋىل ادامدارى ويلاپ، بارلىعى دا قازاندى سۇتكە ەمەس، سۋعا تولتىرعان بولاتىن. بۇل قيسسانى تۇيىندەي كەلە ايتپاعىمىز، قوعامدا بولاتىن كەلەڭسىزدىكتەر ءار ادامنىڭ جاۋاپكەرشىلىكتى سەزىنبەۋى نەمەسە جاعدايعا نەمقۇرايلى قاراۋىنان كەلىپ تۋىندايدى. قوعامدى تۇزەۋ، بىرەۋدى جونگە سالۋدان ەمەس اركىم ءوزىن تۇزەۋدەن باستالسا كەرەك. دەمەك، اركىم مىندەتىن تولىققاندى اتقارسا، قوعام تۇزەلمەك.

---