ءبىز 5-7 جىلدان كەيىن ەلەكتروموبيلدەرمەن جۇرەتىن بولامىز - ن.نازاربايەۆ
ءبىز 5-7 جىلدان كەيىن ەلەكتروموبيلدەرمەن جۇرەتىن بولامىز. بۇگىن استاناداعى بەيبىتشىلىك جانە كەلىسىم سارايىندا قازاقستان حالقى اسسامبلەياسىنىڭ «تاۋەلسىزدىك. كەلىسىم. بولاشاعى ءبىرتۇتاس ۇلت» كۇن تارتىبىمەن وتكەن XXIV سەسسياسىندا ق ر پرەزيدەنتى نۇرسۇلتان نازاربايەۆ وسىلاي دەدى.
«جاڭا ەنەرگيا» تاقىرىبىمەن وتەتىن «ەكسپو-2017» كورمەسى اشىلار قارساڭدا مەن بارلىق عالىمداردىڭ نازارىن مىنا جايتقا اۋدارعىم كەلەدى. قازىرگى ۋاقىتتا الەمدە بۇل باعىتتا جيناقتالعان تاجىريبە وتە مول. ماسەلەن، تايۆان مەن وڭتۇستىك كورەيا جەل مەن كۇننىڭ قۋاتى ەسەبىنەن ەلەكتر ەنەرگياسىن ءوندىرۋ ىسىندە ءبىرشاما العا ىلگەرىلەگەن. كەشە، تەك كۇن باتارەيكاسىنىڭ ارقاسىندا اتلانتيكانى كەسىپ وتكەن العاشقى ۇشاقتى كورسەتتى. ەلەكتروموبيل دە قالىپتى قۇبىلىسقا اينالىپ كەلەدى. ءبىز 5،7 جىلدان كەيىن ەلەكتروموبيلمەن جۇرەتىن بولامىز»، - دەدى ەلباسى.
ق ر پرەزيدەنتى وسىعان وراي مۇناي تۇتىنۋ كولەمى تومەندەيتىندىگىن، ويتكەنى، اۆتوموبيلدەر الەمدە وندىرىلەتىن مۇنايدىڭ 33 پايىزىن پايدالانىپ وتىرعاندىعىن باسا ايتتى.
«مۇنداي تاجىريبەلەرىڭىز بولسا ەنگىزەيىك، بۇكىل الەمگە قازاقستاندا «جاسىل» ەنەرگەتيكا بويىنشا جاسالعان دۇنيەلەردى كورسەتەيىك»، - دەدى مەملەكەت باسشىسى.
You Might Also Like
-
«بالاعا كۇشتەپ ءبىلىم بەرۋدەن گورى، بالانىڭ بىلىمگە دەگەن قۇشتارلىعىن وياتۋ - ەڭ ماڭىزدى ماقسات»
