InfoHub Logo

تۇركىستان وبلىسىنا قاراستى اقالتىن اۋىلىندا اكىم سايلاۋى ادىلەتسىز ءوتتى دەپ سانايتىن تۇرعىندار نارازىلىق تانىتۋدا. اۋىل تۇرعىندارىنىڭ ايتۋىنشا، وزدەرى قولداپ وتىرعان ۇمىتكەر سايلاۋعا نەبارى ەكى كۇن قالعاندا تۇسىنىكسىز سەبەپپەن كانديداتتار قاتارىنان شىعارىلىپ تاستالعان. حالىق مۇنى جەرگىلىكتى بيلىكتىڭ ىقپالىمەن جاسالعان قىسىم دەپ قابىلداعان.

— ءبىز ءادىل سايلاۋ وتكىزەمىز دەيدى، ءبىراق شىن مانىندە ءبارى الدىن الا شەشىلىپ قويعان. ءبىز قولداعان ازاماتتى سايلاۋعا قاتىستىرماي، بۇرىنعى اكىمدى تاعى اكەلە سالدى، — دەيدى اۋىل اقساقالدارىنىڭ ءبىرى.

ءسوز بولىپ وتىرعان اكىم — سەرجان بيسەنوۆ. ول وسى اۋىلدى بۇرىن دا باسقارعان، ءبىراق تۇرعىندار ونىڭ جۇمىسىنا كوڭىلدەرى تولمايتىنىن اشىق ايتتى. ايتۋلارىنشا، بيسەنوۆتىڭ اكىمدىگى كەزىندە ۋادە ەتىلگەن جوبالاردىڭ باسىم بولىگى ورىندالماعان، اۋىل ينفراقۇرىلىمى سول قالپى ەلەۋسىز قالعان.

— بۇل جولى ءوز تاڭداۋىمىزدى جاساۋعا كەدەرگى كەلتىرىلدى. بىزگە سىرتتان تاعايىندالعان ەمەس، حالىقپەن بىرگە جۇمىس ىستەيتىن باسشى كەرەك، — دەيدى نارازى جۇرت.

تۇرعىندار ءتيىستى مەملەكەتتىك ورگانداردان بۇل جاعدايعا ناقتى قۇقىقتىق باعا بەرۋدى سۇرايدى. ولار سايلاۋ پروسەسىنىڭ زاڭدىلىعىنا قاتىستى تەكسەرۋ جۇرگىزىلىپ، ادىلەت ورناۋىن قالايدى.