InfoHub Logo

الەمگە تانىمال قازاقستاندىق بلوگەر كايسار كامزا ۆەتنامدا ۇستالعانى تۋرالى اقپاراتتان كەيىن جەلىدە ۆيدەو جاريالادى. ول ءوزىنىڭ Instagram پاراقشاسىنداعى "Stories" بولىمىندە جازبا قالدىرىپ، وزىنە نە بولىپ جاتقانىن باياندادى.

بۇل تۋرالى Infohub.kz اقپارات اگەنتتىگى حابارلايدى.

ۆيدەودا بلوگەر جاقىندا قازاقستانعا بارىپ كەلگەنىن، ءبىراق كەيىن ۆەتنامنىڭ نياچانگ قالاسىنا قايتا ورالعانىن ايتتى. ول ەكستراديسيا ماسەلەسى بويىنشا شەشىم كۇتىپ وتىرعانىن جانە پاسپورتىن يمميگراسيالىق قىزمەتتىڭ العانىن جەتكىزدى. "ءبارى جاقسى بولادى دەپ تىلەڭىزدەر. وسىنى ايتقىم كەلدى. جاقسى كۇندەردە كەزدەسكەنشە!" – دەدى كامزا.

بلوگەردىڭ ۇستالۋى

بۇعان دەيىن، 13 ساۋىردە قازاقستان ىشكى ىستەر مينيسترلىگى حابارلاعانداي، حالىقارالىق ىزدەۋدە جۇرگەن بلوگەر كايسار كامزا ۆەتنامدا ۇستالعان بولاتىن. ۆەدومستۆونىڭ مالىمەتىنشە، بۇل وپەراسيا ينتەرپول ارقىلى، قازاقستاندىق جانە ۆەتنامدىق قۇقىق قورعاۋ ورگاندارىنىڭ ءوزارا ءىس-قيمىلى ناتيجەسىندە جۇزەگە اسقان.

نە ءۇشىن ىزدەۋ سالىندى؟

ەستەرىڭىزگە سالا كەتەيىك، بيىل قاڭتاردا قۇقىقتىق ستاتيستيكا جانە ارنايى ەسەپكە الۋ پورتالىندا بلوگەر كايسار كامزاعا قاتىستى ىزدەۋ پاراعى جاريالانعان ەدى. ىزدەۋدى قارجىلىق مونيتورينگ اگەنتتىگى باستاپ، ونى استانا قالاسى بويىنشا ەكونوميكالىق تەرگەۋ دەپارتامەنتى جۇرگىزگەن. رەسمي اقپاراتقا سايكەس، ىزدەۋ ءىسى 10 قاڭتار 2026 جىلى تىركەلگەن.

كەيىننەن بلوگەردىڭ زاڭسىز ويىن بيزنەسىنە كومەكتەسكەنى ءۇشىن كۇدىكتەلگەنى بەلگىلى بولدى. قم اگەنتتىگىنىڭ مالىمەتىنشە، كايسار كامزا شامامەن بەس جىل بويى Instagram جەلىسىندە "qais_arr" ەسىمىمەن بەلسەندى بلوگەرلىك قىزمەت جۇرگىزىپ، شامامەن 2،4 ميلليون وقىرمانى بولعان. سونداي-اق، ول "قورا ەنتەرتەينمەنت" اتتى جابىق Telegram ارناسىن باسقارىپ، ونىڭ اۋديتورياسى شامامەن 368 مىڭ ادامدى قۇراعان.

"جەكە الەۋمەتتىك جەلى اككاۋنتتارىن پايدالانا وتىرىپ، قامزا ق.ب. قازاقستان ازاماتتارىنا ارنالعان Pinco سايتىنداعى قۇمار ويىندارعا تىركەلۋگە جانە قاتىسۋعا شاقىراتىن سىلتەمەلەر مەن جارنامالىق ماتەريالداردى ۇنەمى جاريالاپ وتىرعان. سونىمەن قاتار، ۆيدەولاردىڭ استىندا پايدالانۋشىلارعا بونۋستار بەرەتىن جەكە پروموكودىن ورنالاستىرعان"، – دەپ حابارلادى قم اگەنتتىگى.