«بولاشاق» ستيپەندياسىنا قۇجاتتار تاپسىرۋ ءتارتىبى جەڭىلدەتىلدى - ع. نىعىمەتوۆ
«بولاشاق» ستيپەندياسىنا قۇجاتتار تاپسىرۋ ءتارتىبى جەڭىلدەتىلدى. بۇل تۋرالى بۇگىن ورتالىق كوممۋنيكاسيالار قىزمەتىندەگى بريفينگتە ق ر ءبىلىم جانە عىلىم مينيسترلىگى «حالىقارالىق باعدارلامالار ورتالىعى» اق پرەزيدەنتى عاني نىعىمەتوۆ ءمالىم ەتتى.
بەلگىلى بولعانداي، بيىلدان باستاپ حالىقتىڭ قۇجاتتار دايىنداۋ شىعىستارىن وڭتايلاندىرۋ ماقساتىندا قۇجاتتار پاكەتىن تاپسىرۋ تالاپتارى جەڭىلدەتىلدى.
«ەگەر بۇعان دەيىن ۇسىنىلاتىن بارلىق قۇجاتتاردى نوتاريالدى كۋالاندىرۋ قاجەت بولسا، ءقازىر تەك اكادەميالىق وقۋعا (شەتەلگە) ءوز بەتىمەن تۇسكەن نەمەسە «بولاشاق» اياسىندا تاعىلىمدامادان ءوتۋدى جوسپارلارعان ۇمىتكەردەن شىقىرۋ قۇجاتىن نوتاريالدى كۋالاندىرۋدى سۇرايمىز. باسقا قۇجاتتار، ياعني ديپلوم، ەڭبەك كىتاپشاسى جانە وزگە قۇجاتتاردى نوتاريالدى تۇردە كۋالاندىرۋ كەرەك ەمەس»،-دەدى ول.
ع. نىعىمەتوۆتىڭ ايتۋىنشا، اعىمداعى جىلدان باستاپ تالاپ ەتىلەتىن كەزەڭ ءۇشىن مىندەتتى زەينەتاقى جارنالارى اۋدارىمدارى تۋرالى ءۇزىندى كوشىرمە ۇسىنۋ نورماسى ەنگىزىلدى.
«بۇل دەگەنىمىز، وسى جىلدان ساناتتار بويىنشا ۇمىتكەرلەردە ەكى جىل جۇمىس ءوتىلى بولۋى كەرەك، سونىمەن قاتار ول زەينەتاقى اۋدارىمدارىن كورسەتۋى ءتيىس»، - دەدى ول.
قۇجاتتاردى ەلەكتروندى ۇكىمەت ۆەب-پورتالى، «ازاماتتار ءۇشىن ۇكىمەت» مەملەكەتتىك كورپوراسيسى ارقىلى (بۇرىنعى حقكو)، سونداي-اق «حالىقارالىق باعدارلامالار ورتالىعىنا» بارىپ تاپسىرۋعا بولادى.
ونىڭ سوزىنە قاراعاندا، ەلەكتروندى ۇكىمەت ۆەب-پورتالى جانە حالىققا قىزمەت كورسەتۋ ورتالىعى ارقىلى قۇجاتتار تاپسىرۋشىلاردىڭ ۇلەسى ارتىپ كەلەدى. 2015 جىلى ۇمىتكەرلەردىڭ 40 پايىزى اتالعان ەكى ءتاسىلدى پايدالانىپ تاپسىرعان ەكەن.
You Might Also Like
