InfoHub Logo

باتىس قازاقستان وبلىسى، تەرەكتى اۋدانى – الاياقتار ءبىر وتباسىنىڭ سەنىمىنە كىرىپ، ولاردى ءبىر اي بويى الداپ، ناتيجەسىندە 20 ميلليون تەڭگە كولەمىندەگى قاراجاتىنان ايىرعان. بۇل جايلى Qazaqstan تەلەارناسى حابارلادى.

وقيعا تەرەكتى اۋدانىنىڭ تۇرعىنىن بەلگىسىز بىرەۋلەردىڭ «قازپوشتا» قىزمەتكەرىمىز دەپ حابارلاسۋىنان باستالعان. ولار "سىزگە سالەم-ساۋقات كەلدى" دەپ سەندىرگەنىمەن، ازامات ەشقانداي سالەمدەمە كۇتپەگەنىن ءتۇسىنىپ، پوليسيا بولىمشەسىنە بارماق بولادى.

الايدا ءدال سول ساتتە تاعى ءبىر قوڭىراۋ كەلىپ، ءوزىن ىشكى ىستەر مينيسترلىگىنىڭ قىزمەتكەرى رەتىندە تانىستىرعان ادام “ءسىزدىڭ اتىڭىزعا ونلاين نەسيە راسىمدەلىپ جاتىر” دەگەن جەلەۋمەن ازاماتتى قورقىتادى. بۇدان بولەك، جالعان ۇلتتىق بانك وكىلى دە بايلانىسقا شىعىپ، “قۇپيا تەرگەۋ امالدارى ءجۇرىپ جاتىر، ەشكىمگە ءتىس جارماڭىز” دەپ ەسكەرتەدى.

وسىلايشا، الاياقتار ءبىر اي بويى ءتۇرلى سەنارييمەن ءبىر وتباسى مۇشەلەرىن الداپ، كوپتەگەن قارجىلىق وپەراسيالاردى ورىنداتا العان. سوڭىندا وتباسى مۇشەلەرى جالپى سوماسى 20 ميلليون تەڭگەگە جۋىق قاراجاتتى الاياقتاردىڭ شوتىنا ءوز قولدارىمەن اۋدارعان.

رەسمي مالىمەتكە سايكەس، جىل باسىنان بەرى باتىس قازاقستان وبلىسىندا 190 ادام الاياقتاردىڭ ارباۋىنا ءتۇسىپ، 300 ميلليون تەڭگەگە جۋىق شىعىنعا ۇشىراعان.

قۇزىرلى ورگاندار تۇرعىنداردى بەيتانىس نومىرلەردەن كەلگەن قوڭىراۋلارعا ساق بولۋعا، جەكە دەرەكتەر مەن بانك شوتتارىنا قاتىستى اقپاراتتى ەشكىمگە بەرمەۋگە شاقىرادى. سونىمەن قاتار، ءوزىن قۇقىق قورعاۋ نەمەسە قارجى ۇيىمدارىنىڭ وكىلى رەتىندە تانىستىراتىن ازاماتتاردان رەسمي كۋالىك تالاپ ەتۋ قاجەت.