InfoHub Logo

تانىمال امەريكاندىق اكتەر ەريك دەيننىڭ ومىردەن وتەر الدىندا بەرگەن سوڭعى سۇحباتى جارىق كوردى. "اناتوميا ستراستي" جانە "ەيفوريا" سياقتى تانىمال تۋىندىلار ارقىلى كورەرمەن جۇرەگىنەن ورىن العان اكتەردىڭ بۇل سۇحباتى "Famous Last Words" جوباسى اياسىندا جاريالاندى. بۇل جوباعا تەك اكتەردىڭ ءوزى رۇقسات بەرگەن، قايتىس بولعاننان كەيىن عانا جاريالاناتىن ماتەريالدار كىرەدى.

بۇل تۋرالى Infohub.kz اقپارات اگەنتتىگى حابارلايدى.

قىزدارىنا ارناعان اقتىق سوزدەرى

سۇحباتتىڭ سوڭىندا ەريك دەين ءوز قىزدارى بيللي مەن دجوردجياعا ارناپ جۇرەككە جىلىلىق ۇيالاتار سوزدەرىن ايتتى. ول ءوز ءومىرىن، باسىنان وتكەرگەن ساتتەرىن ەسكە الىپ، قىزدارىمەن وتكىزگەن ءاربىر كۇندى باعالايتىنىن جەتكىزدى. "جاعاجايدا بىرگە وتكىزگەن ۋاقىتىمىز ەسىمدە... بۇل – ەڭ كەرەمەت كۇندەر ەدى"، – دەپ تولعانىسپەن ءبولىستى اكتەر.

ءومىر تۋرالى وسيەت

اكتەر ءوزىنىڭ اۋىر دەرتكە شالدىققانى تۋرالى ايتىپ، بۇل جاعدايدىڭ ومىرگە دەگەن كوزقاراسىن قالاي وزگەرتكەنىن جەتكىزدى. ول قىزدارىنا ءومىردىڭ ءاربىر ءساتىن باعالاۋعا، جانىنا جاقىن ىستەرمەن اينالىسۋعا جانە قاسىنداعى جانداردى قادىرلەۋگە شاقىردى. "بار كۇشتەرىڭمەن كۇرەسىڭدەر. ەشقاشان بەرىلمەڭدەر. بۇل اۋرۋ دەنەمدى السىرەتسە دە، رۋحىمدى الا المايدى. سەندەر – مەنىڭ جۇرەگىمسىڭدەر. مەن سەندەردى جاقسى كورەمىن. بۇل – مەنىڭ سوڭعى ءسوزىم"، – دەپ ءسوزىن اياقتادى.

امەريكالىق اكتەر ەريك دەين 53 جاسىندا ومىردەن وزدى. ونىڭ وتباسى بۇل قايعىلى جاڭالىقتى راستادى. NBC News مالىمەتىنشە، اكتەر وتكەن جىلدىڭ كوكتەمىندە بۇيىرلىك اميوتروفيالىق سكلەروز دياگنوزى قويىلعانىن ءوزى حابارلاعان بولاتىن. اكتەر سوڭعى كۇندەرىن جارى، ەكى قىزى جانە جاقىن دوستارىنىڭ ورتاسىندا وتكىزگەن.

ەريك دەين "اناتوميا ستراستي" سەريالىندا دوكتور مارك سلوان ءرولىن سومداپ، HBO-نىڭ "ەيفوريا" جوباسىندا كەل دجەيكوبس كەيىپكەرىن وينادى. سونداي-اق، ول بىرنەشە فيلمدە دە ونەر كورسەتكەن.