InfoHub Logo

تۇركىستان وبلىسىنداعى ءتورت جاسار الي ادامبەك ەرەكشە قابىلەتىمەن تانىلىپ، مەكتەپ تابالدىرىعىن اتتادى. بالا ءقازىردىڭ وزىندە باستاۋىش سىنىپ باعدارلاماسىن تولىق مەڭگەرىپ، ەسەپ شىعارۋدان دا، وقۋدان دا وزا شاپقان.

بۇل تۋرالى Infohub.kz اقپارات اگەنتتىگى حابارلايدى.

ءاليدىڭ ەرەكشە قابىلەتىن اتا-اناسى ەكى جاسىندا بايقاعان. بۇل جاستا ول ارىپتەردى جاتتاي باستاعان، ال ءۇش جاسىندا كوبەيتۋ كەستەسىن مەڭگەرىپ، ەكى امالدى ەسەپتەردى شەشە العان. ول ءتىپتى ۇلكەن اعاسىنىڭ ءۇي تاپسىرمالارىنا كومەكتەسكەندە اتا-اناسىن تاڭ قالدىرعان.

مۇعالىمدەردىڭ تاڭدانىسى

ءاليدىڭ ءمۇعالىمى ءاليا مياتبەكوۆا بالانىڭ ءبىلىم دەڭگەيىنىڭ جوعارى ەكەنىن ايتادى. «ونىڭ ءبىلىمى مەنىڭ شاكىرتتەرىمنەن الدەقايدا جوعارى. الي ويشا ەسەپتەردى قوسىپ، ازايتا الادى. قيىنداۋ تاپسىرمالار بەردىم، بارىنە دە جاۋاپ بەردى. الىپپەنى وقىتتىم – ەشبىر قاتەسىز، رەتىمەن وقىپ شىقتى»، – دەيدى ءمۇعالىم.

اتا-انانىڭ قولداۋى

ءاليدىڭ اناسى نۇرگۇل مىرزاعالي ۇلىنىڭ ماتەماتيكاعا دەگەن قىزىعۋشىلىعىن ەرەكشە اتاپ ءوتتى. «ۇلىمدا ءۇشىنشى سىنىپقا ارنالعان ماتەماتيكا جيناعى بار. ءوزى ەسەپتەردى شەشەدى. ءتىپتى ۇيىقتار الدىندا دا مەنىمەن بىرگە ەسەپ شىعارعىسى كەلەدى. ءبىز ونىڭ قىزىعۋشىلىعىن قولدايمىز. كۇندەلىكتى جارتى ساعاتتاي كىتاپ وقىپ، جاڭا ماقساتتار قويامىز»، – دەيدى اناسى.

قازىرگى تاڭدا الي قازاق ءالفاۆيتىن تولىق مەڭگەرىپ، اتا-اناسىمەن بىرگە اعىلشىن ءتىلىن دە ۇيرەنىپ ءجۇر. ونىڭ بۇل جەتىستىكتەرى كوپشىلىكتى تاڭ قالدىرۋدا.