داناسىڭ عوي، پلۋتارح!
الەكساندر ماكەدونسكييدىڭ (كادىمگى شىعىس ەلى ىسكەندىر زۇلقارنايىن، ياكي قوس ءمۇيىزدى پاتشا دەپ اتاعان ۇلى جاننىڭ) اتاقتى ءۇش قولباسشىسى بولدى. ونىڭ ءبىرى انتيگون، ءبىرى پتولومەي، ءۇشىنشىسى سەليەۆك ەدى. اتيگوننەن دەمەتريي تۋدى. بۇل عاجايىپ پاتشا اتاندى، تەڭدەسى جوق قولباسشى سانالدى. قىزى ستراتونيكا اسقان سۇلۋ حانشا بولاتىن. سول سۇلۋ قىزىن سەليەۆكىگە توقالدىققا بەردى. ۇرپاق جايىپ، پاتشالىق پاتشالىققا قول ارتۋ ۇلى ادامداردىڭ داستۇرگە اينالعان ادەتى ەدى عوي...
ال، سەليەۆكىنىڭ سۇيىكتى جالعىز ۇلى انتيوح سول ستراتونيكاعا عاشىق بولعان. و، ءتاڭىرى قۇدىرەتىڭ كۇشتى عوي! توقال شەشەسىنە عاشىق بولىپ، ءبىراق بۇل سىردى جارىققا شىعارا الماي، جاس شاھيزادا عاشىقتىقتان قۇسالىققا اينالعان. تاعام تاتپاي، شاراپ ىشپەي، ويناماي، كۇلمەي، اڭعا شىعىپ سەرۋەندەمەي سارعايعان. كۇندەر جىلجىعان، ايلار وتكەن؛ قۋارعان شىبىقتاي قاستەرلى ۇلىن تابيبتارعا قانشاما قاراتسا دا، ەمىن تاپپاي پاتشا دا تورىققان. ەلدەگى ەڭ بىلگىر تابيبتاردى جيناسا دا ەشبىر عالىم اۋرۋ شيپاسىن تاپپاعان. عالىمدار دا، پاتشا دا تەگىس تۇڭىلە باستاعان. سول كەزدە تاجىريبەلى دانا ەراسيسترات ءتۇرلى ويعا، ءتۇرلى امالعا كىرىسەدى. ول سارايداعى سۇلۋ جاننىڭ ءبارىن سۋسىن كوتەرتىپ شاھيزادانىڭ الدىنان وتكىزە باستايدى. كەزەك جاس اناسى ستراتونيكاعا دا جەتەدى. ۇلدە مەن بۇلدەگە بولەنگەن سالتاناتتى جاس حانىمنىڭ جاننان اسقان نۇرلى ءجۇزىن كورگەندە ءولىم حالىنە جەتكەن شاھيزادانىڭ كوزىنەن الدە نە ءبىر شوق ۇشقىنى جارق ەتكەندەي بولادى دا، مۇنى بايقاپ قالعان ەراسيسترات حانىمنىڭ قولىنان سۋسىندى الىپ، باس ءيىپ تاعزىممەن سارايدان شىعارىپ سالادى. ول: «ەم تابىلدى، ءبىراق ءۇمىتسىز...» دەپ تۇيەدى. الايدا، پاتشاعا كەلىپ حال-احۋالدى الىستان وراپ بايان ەتەدى.
— قۇدىرەتتى پاتشا اعزام. شاھيزادانىڭ قاستەرى بەلگىلى بولدى. الايدا جازىلمايتىن... جازىلسا دا وزگەشە ءبىر قولدان كەلمەيتىن قيىن جاعدايعا تىرەلەتىن جاي، — دەپتى.
كۇيىنگەن قاھارلى پاتشا:
— ول قانداي اۋرۋ؟ بۇكىل پاتشالىقتى قۇربان ەتسەڭ دە جاز! — دەپ بۇيرىق بەرەدى.
— اۋرۋدىڭ ەسىمى — ماحاببات. ءبىراق ءۇمىتسىز ماحاببات، پاتشام.
— نەگە ءۇمىتسىز؟ قول جەتپەس ماحاببات بولا ما؟
— بولادى پاتشام، شاھيزادا مەنىڭ ايەلىمە عاشىق...
— قويشى! راس پا؟
— اقيقات، پاتشام.
— ءتۇۋ! سەن ءوزىڭ ءارى انتيوحتىڭ دوسىسىڭ. مەنىڭ انتيوحتى ولەردەي سۇيەتىنىم دە ساعان ءمالىم. سويتە تۇرىپ ءوزىڭنىڭ سۇيىكتى دوسىڭ، مەنىڭ سۇيىكتى ۇلىم انتيوحتى ولىمنەن قالاس ەتۋ ءۇشىن ءبىر ايەلدى قيماعانىڭ با؟ وسى دا ءسوز بە ەكەن!
— ۇلى پاتشام، مۇنى مەن تۇگىل، دالانىڭ داناسى ءوزىڭىز دە ىستەي الماس ەدىڭىز. انتيوح ءسىزدىڭ ستراتونيكاڭىزدى سۇيسە، بۇعان قالايشا شىداپ، قالايشا... كونەر ەدىڭىز. بولمايتىن نارسە عوي.
— ەگەر دە قۇدايلار تىلەكتى بەرىپ، سولاردىڭ قۇدىرەتى ۇلىم ماحابباتىن ستراتونيكاعا اۋدارسا، جان بىتكەن وسىنى ماقۇلداسا مەن پاتشالىعىمنان دا بەزەر ەدىم!
قاتتى تەبىرەنىپ كوزىنەن جاس شىققان پاتشانى ۇلى دارىگەر قولىنان ۇستاي الىپ:
— سىزگە ەندى ەراسيستراتتىڭ قاجەتى جوق. ءسىز ءوزىڭىز اكەسىز، ءوزىڭىز ەرسىز جانە پاتشاسىز. ءوز ۇلىڭىزدىڭ تاعدىرى ءوز قولىڭىزدا. بۇدان بىلاي ءوز ۇلىڭىزدىڭ تابيبى ءبىر ءوزىڭىزسىز، — دەگەن.
ەرتەڭىنە سەليەۆك حالقىن جيناپ الىپ:
— ءبۇتىن ارقا بەتتەگى جەرلەرىمنىڭ بيلەۋشىسى شاھيزادا انتيوح بولادى، بۇل ۇلى پاتشانىڭ ۇلى ۋالاياتىن بىرىگىپ بيلەۋشى ستراتونيكا حانىم بولادى. مەن وسىنى قالايمىن جاماعاتىم، — دەپ پاش ەتىپتى! — دەيسىن.
رۋمعا ەللادا ۇلگى!
گرەك امىرشىلەرى رۋم امىرشىلەرىنەن داناراق ەدى دەگەنىڭ عوي بۇل. سولاي، كونە ويشى!
You Might Also Like
