InfoHub Logo

ەڭ العاش قازاق ورىسقا قاراپ، دۋان اۋزى اشىلعاندا شوڭ بي اعا سۇلتان دۋانباسى بولعان. شوڭ بي ولگەن سوڭ شورمان اعا سۇلتان دۋانباسى بولىپ سايلانىپ شىعىسىمەن ۇيىنە بارىپ ولگەن. ەرەيمەن تاۋىنىڭ سىرتىندا ءولىپ كومىلگەن. جەرى «شورمان تاۋى» اتانىپ قالعان. كەنەسارى، ناۋرىزباي كوتەرىلىسى جۇرتقا اپالاڭ-توپالاڭ بولعان. باياناۋلادا پوشتاي اعا سۇلتان دۋانباسى، قاراوتكەلدە قوڭىرقولجا اعا سۇلتان دۋانباسى. كەنەسارى قاراوتكەلگە ءورت سالامىن دەپ قاماعاندا، قوڭىرقۇلجا قارسى تۇرىپ، ۇرىس-سوعىس قىلعان.

اقتاۋ، ورتاۋدا كەنەسارى مەن قوڭىرقۇلجا تاعى قارسىلاسىپ سوعىسقان. قاراوتكەلدى قاماعاندا، كەنەسارى «كۇلدىرماماي» دەگەن مىلتىعىمەن تايتوبەنىڭ باسىندا تۇرىپ، ورىستىڭ قاراۋىلشى بالاسايكاسىن اتىپ مۇرتتاي ۇشىرعان ەكەن. تاما تاناش باتىر ءبىر شاپاندى مايعا بۇلعاپ، ءبىر شەتىن وتقا جاندىرىپ، نايزانىڭ ۇشىمەن كوتەرىپ بارىپ، اتىپ تۇرعان وقتى كەرەك قىلماي، اپارىپ تاستاي بەرگەن ەكەن. باسقا شاپقان باتىرلاردان وققا ۇشىراعان قىپشاق باسىقارا باتىرعا وق ءتيىپ، قان مايداندا قالا بەرگەن ەكەن. تاما تاناش باتىر باسىقارامەن قۇشاقتاسقان دوس ەكەن. «ولسەم، ولەيىن! باسىقارامەن سۇيەگىم ءبىر جەردە قالسىن»، — دەپ قايتا شاۋىپ بارىپ باسىقارانىڭ سۇيەگىن الدىنا الىپ وڭگەرىپ كەلگەندە، كەنەسارى حان ايتقان ەكەن: «دوس بولساڭ، تاما تاناش باتىرمەن دوس بول!» — دەپ. كوپ زامانعا شەيىن بۇل ءسوز جۇرت اۋزىندا قالدى. قاراوتكەلگە ءورت سالعان كۇن ءبىر ورىس مىنگەن قوڭىرقۇلجانىڭ بوز ارعىماعى تاڭەرتەڭ قاراوتكەلدەن شىعىپ، كۇن باتا قىزىلجارعا بارىپتى، ەكى اراسى بەس ءجۇز شاقىرىم دەسەدى.

وقۋعا كەڭەس بەرەمىز:

ناۋرىزبايدىڭ قارىنداسى

ناۋرىزبايدىڭ جولبارىستى ءولتىرۋى

قۇرمانقۇلدىڭ ناۋرىزبايدىڭ ەرلىگىنە ريزا بولۋى

 

---