InfoHub Logo

ليەۆ گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى، الاشتانۋشى عالىم ديحان قامزابەك ۇلىنىڭ ايتۋىنشا، كەڭەس داۋىرىندەگى وقۋلىقتاردى جاس ءارى دايىندىعى جوق ماماندار جازعان. بۇل ءۇردىس ءالى كۇنگە دەيىن ساقتالىپ كەلەدى، دەپ حابارلايدى قازاقپارات ءتىلشىسى.

«الاش زيالىلارىنىڭ بارلىعىن اتىپ تاستاعاننان كەيىن 50ء-شى جىلدارى سول كەزدەگى ءبىلىم ءمينيسترى 20-25 جاستاعى جىگىتتەردى شاقىرىپ الىپ، وقۋلىق جازىڭدار دەدى. ورىمدەي جاس جىگىتتەر جازعان وقۋلىقتار ءالى كۇنگە دەيىن اينالىمدا ءجۇر. ونداي وقۋلىقتاردى زاڭگەرلەر دە، ءبىز سەكىلدى فيلولوگتار دا، تاريحشىلار دا جازا الادى. ءقازىر قاراساڭىز، جۇرتتىڭ ءبارى وقۋلىق جازعىش بولىپ كەتتى. سودان قايشىلىقتار كوبەيدى. ارينە، ول وقۋلىقتاردى دۇرىس ادام جازىپ جاتقان جوق. سول سەبەپتى داۋ دا تۋىنداپ وتىر. ەگەر مامان جازسا، وندا ەشقاشان قاتە بولمايدى. مامان ءبىرىنشى، ەكىنشى، ءۇشىنشى باسىلىمدار دەپ وقۋلىعىن شىعارادى دا، جىبەرىلگەن قاتەلىكتەردى تۇزەپ وتىرادى. قاتەلىك تۇزەتىلگەننەن كەيىن وقۋلىقتىڭ ساپاسى دا دۇرىستالادى. بۇل - تابيعي ۇدەرىس. سول ۇدەرىستى كورگىمىز كەلەدى»، - دەدى ديحان قامزابەك ۇلى بۇگىن استاندا وتكەن دوڭگەلەك ۇستەل وتىرىسىندا.

ايتا كەتەيىك، بۇگىن ق ر جوعارعى سوتىندا «رۋحاني جاڭعىرۋ - ماڭگىلىك ەل بولۋدىڭ كەپىلى» تاقىرىبىندا دوڭگەلەك ۇستەل وتىرىسى ءوتتى. القالى جيىنعا تاريحشىلار، ءتىل ماماندارى، ادەبيەتشىلەر مەن سۋديالار قاتىسىپ، «بولاشاققا باعدار: رۋحاني جاڭعىرۋ» ماقالاسىنا، سونداي-اق «تۋعان جەر»، «قازاق تىلىندەگى 100 وقۋلىق»، «قازاقستاننىڭ كيەلى جەرلەر گەوگرافياسى» سياقتى جوبالارعا قاتىستى ءوز ويلارىن ورتاعا سالدى. سول جەردە ش. شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورى ەربول تىلەشوۆ وقۋلىقتاردى اۋدارۋعا قاتىستى ءوز ۇسىنىسىن ورتاعا سالىپ، الداعى ۋاقىتتا «بالالار الەمى» مەملەكەتتىك پورتالىنىڭ اشىلاتىندىعىن جەتكىزدى. ال پروفەسسور ديحان قامزابەك ۇلى قازىرگى جاڭعىرۋ الاش زيالىلارىنىڭ ءجۇرىپ وتكەن جولى ەكەنىن تاعى ءبىر مارتە ەسكە سالدى.  

---