InfoHub Logo

1 شىلدەدەن باستاپ قازاقستاندا ەلەكتر ساموكاتتارىن پايدالانۋعا قاتىستى جاڭا ەرەجەلەر قولدانىسقا ەنگىزىلەدى. ىشكى ىستەر مينيسترلىگىنىڭ حابارلاۋىنشا، بۇل وزگەرىستەر نەگىزىنەن جالعا بەرىلەتىن ساموكاتتارعا قاتىستى بولادى. جەكە ەلەكتر ساموكاتتارىنىڭ يەلەرىنە ازىرگە مىندەتتى تىركەۋ نەمەسە ءنومىر بەلگىلەۋ تالاپ ەتىلمەيدى.

بۇل تۋرالى Infohub.kz اقپارات اگەنتتىگى حابارلايدى.

جالعا بەرىلەتىن ساموكاتتارعا قويىلاتىن تالاپتار

جاڭا ەرەجەلەر بويىنشا، جالعا بەرىلەتىن ەلەكتر ساموكاتتار مىندەتتى تۇردە ازاماتتىق-قۇقىقتىق جاۋاپكەرشىلىكتى ساقتاندىرۋ شارتىمەن قامتاماسىز ەتىلۋى ءتيىس. بۇل شارا جول-كولىك وقيعالارى كەزىندە كەلتىرىلگەن زالالدى وتەۋدى قامتاماسىز ەتۋ ماقساتىندا ەنگىزىلىپ وتىر.

مينيسترلىكتىڭ مالىمەتىنشە، ساقتاندىرۋ ءپوليسى مەن بەلگىلەنگەن ۇلگىدەگى تىركەۋ ءنومىرى بار جالعا بەرىلەتىن ساموكاتتار عانا جول قوزعالىسىنا قاتىسا الادى.

كيكشەرينگ كومپانيالارىنا قوسىمشا مىندەتتەر

ساقتاندىرۋ مەن ءنومىر بەلگىلەۋدەن بولەك، كيكشەرينگ كومپانيالارىنا قوسىمشا جاۋاپكەرشىلىكتەر جۇكتەلەدى. ولار ساموكاتتاردى ەسەپكە الۋى، تەحنيكالىق جاعدايىن باقىلاۋى، جىلدامدىقتى شەكتەۋى، قۇرىلعىلاردىڭ ورنالاسقان جەرىن قاداعالاۋى، جول ەرەجەسىن بۇزۋدىڭ الدىن الۋى جانە دەرەكتەردى ىشكى ىستەر ورگاندارىنا بەرۋى كەرەك.

جەكە ساموكات يەلەرىنە قاتىستى جاعداي

ىشكى ىستەر مينيسترلىگى جەكە تۇلعالارعا تيەسىلى ەلەكتر ساموكاتتارىنا بۇل تالاپتاردىڭ قولدانىلمايتىنىن ناقتىلادى. قازىرگى ۋاقىتتا ولار ءۇشىن مىندەتتى تىركەۋ نەمەسە ءنومىر الۋ قاراستىرىلماعان.

الايدا، جەكە ساموكات يەسى كولىك جولىنا شىقسا، جول ەرەجەسىن ساقتاۋعا جانە جۇرگىزۋشى كۋالىگىن ۇستاۋعا مىندەتتى بولادى.

ەستەرىڭىزگە سالا كەتەيىك، 1 شىلدەدەن باستاپ جاڭا نورمالار كۇشىنە ەنەدى. اتاپ ايتقاندا، اكىمشىلىك قۇقىق بۇزۋشىلىق كودەكسىنىڭ 619-2-بابى ەنگىزىلىپ، جالعا بەرۋ قىزمەتتەرىنىڭ 18 جاسقا تولماعان نەمەسە جۇرگىزۋشى كۋالىگى جوق تۇلعالارعا ساموكات بەرگەنى ءۇشىن 108 125-تەن 173 000 تەڭگەگە دەيىن ايىپپۇل تولەۋى قاراستىرىلعان.