InfoHub Logo

قازاقستاننىڭ مانەرلەپ سىرعاناۋدان العاشقى وليمپيادا چەمپيونى ميحايل شايدوروۆتىڭ بىرنەشە اي بويى جالاقى الماعانى تۋرالى ماسەلە كوتەرىلدى. ءماجىلىس دەپۋتاتى اسحات راحىمجانوۆ بۇل جاعدايعا قاتىستى پىكىر ءبىلدىرىپ، ءتارتىپ ورناتىپ، كىنالىلەردى جازالاۋ قاجەتتىگىن ايتتى.

بۇل تۋرالى Infohub.kz اقپارات اگەنتتىگى حابارلايدى.

«شىنىمدى ايتسام، كەز كەلگەن سپورتتىق جەتىستىك – بۇل ەڭ الدىمەن مەملەكەتتىڭ ءيميدجى. ەلىمىزدىڭ سپورتتى قالاي قولدايتىنىنا، سپورتشىلارىمىزدىڭ قانداي دەڭگەيدە ونەر كورسەتەتىنىنە قاراپ، مەملەكەتتىڭ قانشالىقتى دامىعانىن، حالىقارالىق ءيميدجىن قالىپتاستىرۋعا دايىن ەكەنىن باعالاۋعا بولادى. اسىرەسە، بۇل ماسەلە وليمپيادا ويىندارىنا قاتىستى بولعاندا، سپورتشىلاردى دايارلاۋعا قانشا قاراجات بولىنەتىنى تۋرالى بۇعان دەيىن دە كوپتەگەن ماتەريالدار جارىق كورگەن. مەنىڭ ويىمشا، بۇل سالادا بەلگىلى ءبىر ءتارتىپ ورناتۋ قاجەت»، - دەدى راحىمجانوۆ ءماجىلىس كۋلۋارىندا.

سپورتشىلارعا بولىنەتىن قاراجاتتىڭ اشىقتىعى

دەپۋتاتتىڭ ايتۋىنشا، سپورتشىلاردى دايارلاۋعا، وليمپيادا رەزەرۆىن قالىپتاستىرۋعا بولىنەتىن قاراجاتتىڭ اشىقتىعى مەن ەسەپتىلىگى جوعارى بولۋى ءتيىس.

«ەگەر سپورتشى جالاقىسىنان ايىرىلىپ نەمەسە قانداي دا ءبىر قىسقارتۋلارعا ۇشىراپ جاتقانىن ايتسا، ونىڭ سەبەپسىز ايتىلمايتىنى انىق. ويتكەنى، ءبىز تۇسىنگەندەي، سپورتشىلار – نامىسشىل جاندار. ولار ەشقانداي دالەلى جوق، جايدان-جاي جامان ءسوز ايتپايدى. سوندىقتان بۇل ماسەلەنى ەگجەي-تەگجەيلى قاراستىرۋ كەرەك دەپ ەسەپتەيمىن. ارينە، كىنالىلەردى جازالاۋ قاجەت. سپورتشىلاردى دايارلاۋدا نەمەسە قانداي دا ءبىر سپورت كلۋبىن، فۋتبول كلۋبىن قارجىلاندىرۋدا ەلدە سىبايلاس جەمقورلىقتىڭ بار ەكەنى ەشكىمگە جاڭالىق ەمەس. سوندىقتان بۇل ماسەلە مەملەكەت باسشىلىعىنىڭ ەرەكشە باقىلاۋىندا بولۋى ءتيىس»، - دەپ اتاپ ءوتتى راحىمجانوۆ.