ەلىمىزدە قازاق-فرانسۋز ۋنيۆەرسيتەتى اشىلادى
عىلىم جانە جوعارى ءبىلىم ءمينيسترى ساياسات نۇربەك فرانسيا مەن قازاقستان پرەزيدەنتتەرىنىڭ اقورداداعى كەزدەسۋى الدىندا قازاق-فرانسۋز ۋنيۆەرسيتەتى اشىلاتىنىن ايتتى.
«بۇگىن مەملەكەت باسشىلارى اراسىندا قازاقستاندا قازاق-فرانسۋز ۋنيۆەرسيتەتىن اشۋ ماسەلەسى پىسىقتالاتىنى ءمالىم ەتىلدى»، - دەدى ساياسات نۇربەك.
ونىڭ سوزىنشە، اتالمىش جوعارى وقۋ ورنى قازاق-المان ۋنيۆەرسيتەتىنىڭ ۇلگىسىمەن قۇرىلۋى مۇمكىن.
«ءبىز جەكە جۇمىس توبىن قۇرىپ، ماسەلەنى سول الاڭدا تالقىلايمىز. سونداي-اق وڭىرلەردەگى جوعارعى وقۋ ورىندارىندا مىقتى فرانسيالىق ۋنيۆەرسيتەتتەردى تارتا وتىرىپ، زەرتتەۋ كافەدرالارىن اشۋ ماسەلەسىن تالقىلايمىز. فرانسيالىق ۋنيۆەرسيتەتتەردەن كەلگەن دەلەگاسيالار دا ءبىزدىڭ ەلدە ءجۇر. بۇگىن ەكى ەل رەكتورلارىنىڭ فورۋمى باستالادى. ءىس-شارا الماتى قالاسىندا 3 كۇن بويى وتەدى»، - دەدى مينيستر.
ەسكە سالايىق، فرانسيا پرەزيدەنتى قازاقستانعا مەملەكەت باسشىسى قاسىم-جومارت توقايەۆتىڭ شاقىرۋىمەن كەلدى. ساپار اياسىندا ەكى ەل باسشىلارى ساۋدا-ەكونوميكالىق، ينۆەستيسيالىق جانە ەنەرگەتيكالىق ىنتىماقتاستىقتى نىعايتۋ، سونداي-اق حالىقارالىق جانە وڭىرلىك كۇن تارتىبىندەگى ماسەلەلەردى تالقىلايدى دەپ جوسپارلانعان.
ايتا كەتۋ كەرەك، پرەزيدەنت قاسىم-جومارت توقايەۆتىڭ فرانسياعا بىلتىر جاساعان رەسمي ساپارى اياسىندا 35 قۇجاتقا قول قويىلعان بولاتىن.
You Might Also Like
-
2023 جىلى 24 قازاندا ءال-فارابي اتىنداعى قازاق ۇلتتىق ۋنيۆەرسيتەتىنىڭ قابىرعاسىندا http://www.kaznu.kz يران يسلام رەسپۋبليكاسىنىڭ عىلىم مينيسترلىگىنىڭ مادەنيەتتانۋ جانە قوعامتانۋ عىلىمي-ز...
-
سىرىم باتىر مالايسارى بيگە باتا سۇراپ بارىپتى. مالايسارى باتاسىن بىلاي دەپ بەرىپتى:
