InfoHub Logo

ادەنوميوزبەن سىرقاتتاناتىن ناۋقاستاردىڭ انامنەزى جانە كلينيكالىق كورىنىستەرى مالىمەتتەرىن تالداۋ اۋرۋعا ءتان ەرەكشەلىكتەردى بىلۋگە مۇمكىندىك بەرەدى. ادەنوميوز (جاتىر دەنەسىنىڭ ىشكى قاباتىنىڭ قابىنۋ ەندومەتريوزى) — كەش رەپرودۋكتيۆتى جانە پرەمەنوپاۋزا كەزەڭدەرىندەگى اۋرۋ.

سەبەپتەرى:

— جىنىس اعزالارىنىڭ ىسىك اۋرۋلارىنا تەكتىك بەيىمدىلىك؛

— جوعارى ينفەكسيالىق يندەكس؛

— قوسا-قاباتتاسقان ەكستراگەنيتالدى اۋرۋلار (سەمىزدىك، گيپەرتونيالىق سىرقات، اسقازان-ىشەك جولى اۋرۋلارى، اللەرگيالار)؛

— بۇرىن بولعان گينەكولوگيالىق اۋرۋلاردىڭ كوپتىگى؛

— جاساندى جانە وزدىگىنەن بولعان تۇسىك، دياگنوستيكالىق قىرۋ كەزىندە جاتىرعا قۇرال-سايماندى ءجيى ەنگىزۋ؛

— ەندومەتريي پاتولوگياسى كەزىندە ادەنوميوز بەن جاتىر ميوماسىنىڭ ءجيى قوسا-قاباتتاسۋى.

ادەنوميوزدىڭ نەگىزگى كلينيكالىق بەلگىلەرى: جاتىر كولەمىنىڭ ۇلكەيۋى؛ مەنومەترورراگيا؛ ديسمەنورەيا؛ جامباستاعى قارقىندىلىعى ءار ءتۇرلى اۋىرسىنۋلار.

عىلىمي مالىمەتتەرگە سۇيەنسەك، ەتەككىر اينالىمى قىسقارعان، ەتەككىرى قاتتى، ۇزاق جانە اۋىرسىنۋمەن كەلەتىن ايەلدەردە ەندومەتريوزدىڭ دامۋ ءقاۋپى جوعارى. سونىمەن بىرگە جاتىرعا قۇرال-سايمان ەنگىزۋ جانە وتالاۋ دا ماڭىزدى ءقاۋىپ فاكتورىنا جاتادى.

كلينيسيستەر سوزىلمالى سوماتيكالىق اۋرۋلار دا ىشكى ەندومەتريوز گەنەزىندە ماڭىزدى دەپ ەسەپتەيدى. ولار ەندومەتريوزدىڭ دامۋىنا تىكەلەي اسەر ەتپەسە دە، ورگانيزمنىڭ ءار ءتۇرلى پاتوگەندى فاكتورلارعا توزىمدىلىگىن تومەندەتەدى، تۇراقتى مەتابوليكالىق بۇزىلىستاردىڭ قالىپتاسۋىنا جانە يممۋنيتەتتىڭ تومەندەۋىنە جاعداي جاسايدى.

ادەنوميوزدىڭ جاتىر ميوماسىمەن نەمەسە ەندومەترييدىڭ گيپەرپلاستيكالىق ۇدەرىستەرىمەن قوسا-قاباتتاسۋى ءجيى كەزدەسەدى. بۇندا ەسكەرەتىن ءبىر جايت، ادەتتە، ەتەككىر اينالىمى ساقتالعاننىڭ وزىندە جاتىردىڭ بۇلشىق ەت قاباتىندا پاتولوگيالىق زاقىمدانۋ داميدى. ادەنوميوزدىڭ جاتىر ميوماسىمەن قاتار ءجۇرۋى، ميومانىڭ شىرىشتى قابات استىنداعى بايلامدارىن ەسەپتەمەگەندە، اۋرۋدىڭ كلينيكالىق كورىنىستەرىنە كوپ اسەر ەتپەيدى.

جاتىر ەندومەتريوزى جانە ەندومەتريي گيپەرپلازياسى بولعان جاعدايدا، مەنومەترورراگيالىق نەمەسە اسيكلدىك قاندى بولىندىلەر مازالايدى. ءبىراق سونىمەن بىرگە ادەنوميوزدىڭ پاتوگنوميكالىق كورىنىستەرى ۇدەرىس تارالۋىنىڭ ءىى-ىىى دارەجەسىنە، سوندا-اق ونىڭ بايلامدى تۇرىنە ءتان. I دارەجەلى ىشكى ەندومەتريوز كەزدەيسوق انىقتالادى، ويتكەنى بۇندا ادەنوميوزعا ءتان بەلگىلەر بايقالمايدى. كوپتەگەن كلينيسيستەر جاتىر دەنەسىنىڭ II- III دارەجەلى ىشكى ەندومەتريوزى نەمەسە ونىڭ بايلامدى ءتۇرى بار ناۋقاستاردىڭ كلينيكالىق بەلگىلەرىندە ايتارلىقتاي ايىرماشىلىق جوق دەپ سانايدى.

سونىمەن، ادەنوميوزدىڭ كلينيكالىق بەلگىلەرىنىڭ ايقىندىلىعى جاتىر بۇلشىق ەتى قاباتىنىڭ ەندومەتريوزبەن زاقىمدالۋ تەرەڭدىگىنە جانە تۇرىنە بايلانىستى. ەندومەتريوزدى ەرتە انىقتاۋ ەمنىڭ ناتيجەلىلىگىندە جانە اۋرۋدىڭ بەتىن قايتارۋدا اسا ماڭىزدى.

گ. ج. اميرەيەۆا

---