InfoHub Logo

ەۋروپا وداعى (ەو) رەسەيگە قارسى سانكسيالىق ساياساتىن وزگەرتىپ، ءۇشىنشى ەلدەر ارقىلى سانكسيالاردى اينالىپ وتۋگە باعىتتالعان جاڭا شارالاردى قولدانىسقا ەنگىزدى. بۇل تۋرالى ەو شەنەۋنىكتەرى بريۋسسەلدە وتكەن بريفينگتە مالىمدەدى. بۇل – ەو-نىڭ سانكسيالىق ستراتەگياسىنداعى ماڭىزدى وزگەرىس، ويتكەنى بۇعان دەيىن مۇنداي شارالار ەشبىر ءۇشىنشى ەلگە قاتىستى قولدانىلماعان بولاتىن.

جاڭا پاكەتكە شامامەن 120 جاڭا پوزيسيا قوسىلىپ، سانكسياعا ىلىككەندەردىڭ جالپى سانى 2700-گە جۋىقتادى. ەندىگى باستى نازار رەسەيگە سانكسيالاردى اينالىپ وتۋگە كومەكتەسەتىن ءۇشىنشى ەلدەرگە اۋدارىلادى. وسىعان بايلانىستى قىرعىزستانعا قاتىستى ارنايى تەتىك ىسكە قوسىلدى. بۇل – ەو-نىڭ سانكسيالاردى جۇيەلى تۇردە اينالىپ ءوتۋى ءۇشىن جەكەلەگەن ءۇشىنشى ەلگە شەكتەۋلەر ەنگىزگەن العاشقى جاعدايى.

سونىمەن قاتار، سانكسيالار رەسەيدىڭ وزىندە عانا ەمەس، ونىڭ شەتەلدەردەگى ينفراقۇرىلىمدارىنا دا قاتىستى بولادى. مىسالى، يندونەزياداعى تەرمينال مەن رەسەيدىڭ «كولەڭكەلى فلوتى» دا ەو پورتتارىنا كىرۋگە جانە قىزمەت كورسەتۋگە تىيىم سالىنعان كەمەلەر تىزىمىنە ەندى. بۇل تىزىمگە تاعى 46 كەمە قوسىلىپ، جالپى سانى 632-گە جەتتى.

سانكسيالاردىڭ نەگىزگى باعىتتارى

ەو شەنەۋنىكتەرىنىڭ ايتۋىنشا، جاڭا سانكسيالار ءۇش نەگىزگى باعىتقا باسا نازار اۋدارادى: مۇناي تابىسى، قارجى جۇيەسى جانە تەحنولوگيالارعا قولجەتىمدىلىك. بۇل شارالار ارقىلى ەو رەسەي ەكونوميكاسىن السىرەتۋدى كوزدەيدى.

قىرعىزستانعا قاتىستى قولدانىلعان تەتىك، ەگەر بەلگىلى ءبىر تاۋارلار رەسەيگە قايتا ەكسپورتتالعانى دالەلدەنسە، ولاردىڭ ەكسپورتىنا شەكتەۋ قويۋعا مۇمكىندىك بەرەدى. مىسال رەتىندە، قىرعىزستانعا ەو-دان يمپورتتالاتىن كەيبىر تاۋارلاردىڭ كولەمى 796 پايىزعا وسكەنى، ال ولاردىڭ رەسەيگە ەكسپورتتالۋى 12 ەسە ارتقانى ايتىلدى.

بۇعان قوسا، ەو رەسەيدەگى تاعى 20 بانكتى سانكسيالار تىزىمىنە قوسىپ، ولاردىڭ جالپى سانىن 70-كە جۋىقتادى. بۇل شەكتەۋلەر ورتالىق ازياداعى قارجى ينستيتۋتتارىنا دا اسەر ەتەدى.

جاڭا شەكتەۋلەر مەن ولاردىڭ سالدارى

جاڭا سانكسيالىق شارالار تانكەرلەردى ساتۋدى باقىلاۋدى كۇشەيتىپ، رەسەيلىك كريپتوپلاتفورمالارمەن جانە سيفرلىق رۋبلمەن وپەراسيالارعا تولىق تىيىم سالادى. سونداي-اق، ءوزارا ەسەپتەسۋ (نەتتينگ) سحەمالارىنا دا تىيىم الىنادى.

ۋكراينانىڭ وككۋپاسيالانعان اۋماقتارىنداعى ارەكەتتەرگە جاۋاپتى تۇلعالار دا سانكسياعا ىلىكتى. ولاردىڭ قاتارىندا ۋكراينالىق بالالاردى دەپورتاسيالاۋعا، سونداي-اق قىرىم مەن باسقا دا وككۋپاسيالانعان ايماقتارداعى مادەني مۇرالاردى زاڭسىز الىپ كەتۋگە قاتىسى بارلار بار.

ەو-نىڭ بۇرىنعى سانكسيالارى رەسەي ەكونوميكاسىنىڭ ءوسۋىن 4،9 پايىزدان 1 پايىزعا دەيىن باسەڭدەتكەنىمەن، تاياۋ شىعىستاعى داعدارىسقا بايلانىستى ەنەرگيا باعاسىنىڭ ءوسۋى سالدارىنان بۇل اسەردىڭ «تۇراقسىز» ەكەنى مويىندالدى.

بۇل پاكەتتى دايىنداۋ بىرنەشە ايعا سوزىلىپ، ۆەنگريانىڭ پوزيسياسى كەدەرگى كەلتىرگەنى ايتىلدى.