InfoHub Logo

Forbes Kazakhstan جۋرنالى 2026 جىلعى ەڭ باي بيزنەسمەندەر رەيتينگىن جاڭارتتى. بيىلعى تىزىمگە قۇرىلىس، اۆياسيا، ءبىلىم بەرۋ جانە اۋىل شارۋاشىلىعى سالالارىندا ەڭبەك ەتىپ جۇرگەن التى جاڭا ەسىم قوسىلدى.

بۇل تۋرالى Infohub.kz اقپارات اگەنتتىگى حابارلايدى.

شاحمۇرات ءمۇتالىپ: التىن وندىرىسىندەگى جاڭا ويىنشى

رەيتينگكە العاش رەت ەنگەن كاسىپكەرلەردىڭ قاتارىندا شاحمۇرات ءمۇتالىپ بار. ول بىردەن 22-ساتىعا جايعاسىپ، 482 ملن دوللار بايلىعىمەن ەرەكشەلەندى. بۇعان دەيىن ءمۇتالىپ Integra Construction KZ كومپانياسى ارقىلى ءىرى تەمىرجول، اۆتوكولىك جولدارى جانە لوگيستيكالىق كەشەندەر سالۋمەن اينالىسقان بولاتىن. الايدا بيىل ول «التىنالماس» التىن ءوندىرۋ كومپانياسىنىڭ 100% اكسياسىن ساتىپ الدى. سونىمەن قاتار، كاسىپكەر «كازمىرىش» كومپانياسى مەن Eurasian Resources Group (ERG) حولدينگىنىڭ 40% ۇلەسىن يەلەنۋگە نيەتتى.

ۆلاديمير سىتنيك پەن ايعازى قۇسايىنوۆ: اۆياسيا مەن ءبىلىم سالاسى

SCAT اۋە كومپانياسىنىڭ تەڭ يەگەرى (43%) ۆلاديمير سىتنيك 143 ملن دوللار بايلىعىمەن ءتىزىمنىڭ 63ء-شى ورنىنا تۇراقتادى. ودان كەيىنگى 64ء-شى ساتىدا 132 ملن دوللار داۋلەتىمەن ايعازى قۇسايىنوۆ كەلەدى. قۇسايىنوۆتىڭ نەگىزگى اكتيۆتەرى ءبىلىم بەرۋ جانە شيكىزات سەكتورىندا شوعىرلانعان. ول تانىمال KazGASA جانە قازاقستان-امەريكان ۋنيۆەرسيتەتىنە يەلىك ەتەتىن International Educational Corporation كومپانياسىن باسقارادى.

بەكجان مامىت: بيتۋم جانە مۇناي وڭدەۋ

ءتىزىمنىڭ 66-شى ورنىنا بەكجان مامىت جايعاستى. ونىڭ 130 ملن دوللار كاپيتالى نەگىزىنەن Qazaq Bitum كومپانياسىمەن بايلانىستى. كاسىپكەردىڭ مەنشىگىندەگى كومپانيا مۇناي وڭدەۋ، بيتۋم ماتەريالدارىن شىعارۋ جانە اسفالتبەتون قوسپالارىن وندىرۋمەن اينالىسادى. سونداي-اق، ونىڭ قۇرىلىمىنا Kaz Petroleum Group مۇناي وڭدەۋ زاۋىتى مەن Monotrans لوگيستيكالىق كومپانياسى كىرەدى.

يۋريي سحاي: الاتاۋ قالاسىنىڭ ينۆەستورى

بەلگىلى كاسىپكەر يۋريي سحاي 100 ملن دوللار بايلىعىمەن رەيتينگتىڭ 72ء-شى ساتىسىنا ەندى. ونىڭ Caspian Group كومپانياسى – جاڭادان بوي كوتەرىپ جاتقان الاتاۋ قالاسىنىڭ نەگىزگى ينۆەستورلارىنىڭ ءبىرى. سحاي قىتايلىق سەرىكتەستەرىمەن بىرگە Iconic Towers تۇرعىن ءۇي كەشەنىن سالۋدى جوسپارلاپ وتىر. بۇدان بولەك، ونىڭ بەتون وندىرەتىن زاۋىتتاردا جانە قوستانايداعى بولات پروكات زاۋىتىندا (Caspian Steel QZ) ۇلەستەرى بار.

باحتيار وسپانوۆ: اۋىل شارۋاشىلىعىنىڭ الىبى

جاڭا ەسىمدەردىڭ ءتىزىمىن جانە جالپى Forbes رەيتينگىن 95 ملن دوللار بايلىعى بار باحتيار وسپانوۆ قورىتىندىلايدى. ول «قازاقستاننىڭ استىق كونسورسيۋمىن» باسقارادى. كاسىپكەردىڭ يەلىگىندە 22 اۋىل شارۋاشىلىعى كاسىپورنى، التى ەليەۆاتور مەن ەكى ديىرمەن كەشەنى بار. وسپانوۆتىڭ بيزنەسى نەگىزىنەن ەلىمىزدە استىق، بۇرشاق جانە مايلى داقىلداردى وسىرۋگە باعىتتالعان.