InfoHub Logo

گەرمانيادا قازا تاپقان قازاقستاندىق ەكس-سۋديا ايگۇل سايلىبايەۆانىڭ تۋىستارى ونىڭ ولىمىنە قاتىستى قاندى قىرعىننىڭ ءمان-جايىن ايتىپ بەردى. قايتىس بولعان ايەلدىڭ تاماعى كەسىلىپ، ساۋساقتارى كەسىلگەن، باسى دەنەسىنەن اجىراتىلىپ، قىشقىل قۇيىلعان. بۇل قاتىگەز قىلمىستىڭ ەگجەي-تەگجەيىن Tengrinews.kz ماتەريالىنان وقىڭىزدار.

بۇل تۋرالى Infohub.kz اقپارات اگەنتتىگى حابارلايدى.

«قويشا سويعان»

مارقۇمنىڭ اناسى شولپان باتقالوۆا «وستوروجنو: سوبچاك» YouTube ارناسىنا بەرگەن سۇحباتىندا قىزدارىنىڭ دەنەسىن بولشەكتەۋگە تىرىسقانىن ايتتى. ايگۇلدىڭ باسىنا قىشقىل نەمەسە حيميالىق زات قۇيىلعان، بۇل ونىڭ شاشى مەن كوزىن كۇيدىرىپ جىبەرگەن. بەت الپەتىن تانۋ مۇمكىن بولماعان، ويتكەنى بارلىق جۇمساق تىندەرى كەسىلگەن.

«ونى قويشا سويعان. دەنەسىن بولشەكتەۋگە تىرىسقان سياقتى. باسىن كەسپەكشى بولعان، تاماعىن كەسكەن. بۇعان قاراۋ مۇمكىن ەمەس. باسىنا قىشقىل قۇيىلعان، شاشى دا، كوزى دە كۇيىپ كەتكەن»، - دەدى باتقالوۆا.

اناسىنىڭ ايتۋىنشا، ايەلدىڭ موينىنا ينەكسيا جاسالعان. قورعاۋشى تاراپ بۇل فورمالين بولۋى مۇمكىن دەپ ەسەپتەيدى.

«ساۋساقتارىنىڭ بۋىندارى كەسىلگەن، ساراپشىلار ونىڭ پىشاق جۇزىنە جارماسقانىن، قورعانعانىن ايتادى. بارلىق ساۋساقتارى، بۋىندارى كەسىلگەن. دەنەسىنىڭ ءارتۇرلى بولىكتەرىنە، بەتىنە، باسىنا 30-دان استام پىشاق جاراقاتى سالعان. ءتىپتى باسىن دا كەسىپ، بۋىندارىن جىرتىپ تاستاعان»، - دەدى شولپان باتقالوۆا.

ايگۇل سايلىبايەۆانىڭ دەنەسىنەن بارلىعى 30-دان استام پىشاق جاراقاتى تابىلعان. ايەلدى تەك مۇرىنىنداعى كەرتپەسىنەن تانىعان.

«باسىپ، ءبىر مەزگىلدە پىشاقتاپ جاتتى»

ادۆوكات جاننا ورازباحوۆانىڭ ايتۋىنشا، ولار ايگۇل سايلىبايەۆانى كۇيەۋىمەن بىرگە تۇرعان پاتەردە ءولتىردى دەپ سانايدى. قورعاۋشى تاراپتىڭ پىكىرىنشە، قىلمىستى ونىڭ ەنەسى ناتاليا دونسوۆا مەن ۇلى الەكساندر (ايگۇلدىڭ كۇيەۋى) جاساعان، سودان كەيىن ولار ىزدەرىن جاسىرۋعا تىرىسقان.

ورازباحوۆا پاتەردىڭ مۇقيات تازارتىلعانىن، ءبىراق كريميناليستەر ارنايى شاممەن قاننىڭ ىزدەرىن تاپقانىن ايتتى. قاننىڭ ىزدەرى جەرتولەدەن دە تابىلعان.

«ساراپتاما دەرەكتەرى بويىنشا، پاتەردى تازالاپ، جۋىپ، قاندى كەتىرگەنىمەن، قاننىڭ ىزدەرى ءالى دە كورىنىپ تۇردى. جەرتولەدەن قاننىڭ ىزدەرى تابىلعان. شامامەن، جانجال پاتەردە بولعان. سودان كەيىن دەنەسىن جاسىرعان. شۋ ەستىگەندەرىن ايتقان كورشىلەر دە بار. مۇمكىن، دەنەسىن قۇلاتقان بولار»، - دەدى ورازباحوۆا.

ادۆوكات ايگۇل سايلىبايەۆانىڭ جۇكتىلىگىنىڭ جەتىنشى ايىندا بولعانىن، سوندىقتان ەنەسىنىڭ ونىڭ دەنەسىن جەرتولەگە جالعىز تۇسىرە الماعانىن اتاپ ءوتتى. وسىعان بايلانىستى ول قىلمىسقا كۇيەۋى الەكساندر دونسوۆتىڭ تىكەلەي قاتىسى بار ەكەنىن مالىمدەدى.

ول دونسوۆ پەن ونىڭ اناسى ايگۇلدى ءبىر مەزگىلدە باسىنان ۇرىپ، پىشاقتاپ جاتقانىن بولجايدى.

«ونىڭ ولتىرۋگە تىكەلەي قاتىسقانىنا نەگە سەنەمىز؟ سەبەبى سوت-مەديسينالىق ساراپتاما، ءمايىتتى اشۋ كەزىندە، ومىرلىك ماڭىزدى ورگاندارعا پىشاق جاراقاتىن سالعان كەزدە، ونىڭ باسىنا دا اۋىر زاتپەن سوققى بولعانى انىقتالدى. ءبىر مەزگىلدە ادامدى پىشاقتاپ، باسىنان ۇرۋ مۇمكىن ەمەس»، - دەپ ءتۇسىندىردى ادۆوكات.

ايگۇلدىڭ دەنەسى قالاي تابىلعان؟

قايتىس بولعان ازاماتتىڭ اعاسى جانات سايلىبايەۆ اپكەسىنىڭ دەنەسىنىڭ قالاي تابىلعانىن ايتىپ بەردى. دەنەسىن بەلسەندى ىزدەۋ باستالعان العاشقى كۇنى وزەننەن سومكە ىشىنەن تاپقان.

ءىس ماتەريالدارى بويىنشا، سومكە سۋعا دەنەسىن تاپقانعا دەيىنگى تۇندە لاقتىرىلعان. ىشىندە ايگۇلدىڭ دەنەسى بولعان.

«سۋدى ءسىڭىرىپ، ءسال ىسىنگەن. دەنەسى ۇلكەنىرەك بولىپ كورىندى. كەيىن تۇندە بىزگە كەلىپ، بۇل ايەلدىڭ دەنەسى ەكەنىن راستادى. اپكەم ەكەنى انىق، سەبەبى تانۋ بەلگىلەرى بار – مۇرىنداعى كەرتپەسى. كەلەسى كۇنى مەنىڭ دنق ءاناليزىمدى الدى، ەكى كۇننەن كەيىن دنق سايكەستىگى راستالدى»، - دەدى جانات سايلىبايەۆ.

ايگۇل سايلىبايەۆانىڭ ءولىمى

2024 جىلدىڭ ماۋسىم ايىندا گەرمانيادا جوعالعان قازاقستان ازاماتى ايگۇل سايلىبايەۆا تۋرالى اقپارات پايدا بولدى. سىرتقى ىستەر مينيسترلىگىنىڭ مالىمەتىنشە، 5 ماۋسىمدا قازاقستاننىڭ فرانكفۋرت-نا-ماينەدەگى باس كونسۋلدىعىنا ەكى كۇن بۇرىن جوعالعان قىزدارى تۋرالى حابارلاعان قازاقستاندىقتار جۇگىنگەن.

كەيىننەن بەنسحايم قالاسىنىڭ ماڭىنان جوعالعان ادامنىڭ دەنەسى تابىلعانى تۋرالى اقپارات شىقتى. نەمىس باسىلىمى Bildء-تىڭ حابارلاۋىنشا، ءمايىت پلاستيك قاپتىڭ ىشىندە بولعان، ال ءولىمى الدىندا ايەل زورلىق-زومبىلىققا ۇشىراعان.

گەرمانيا قۇقىق قورعاۋ ورگاندارى كىسى ءولتىرۋ فاكتىسى بويىنشا قىلمىستىق ءىس قوزعادى. گەرمانيا سىرتقى ىستەر مينيسترلىگىنىڭ اقپاراتى بويىنشا، دارمشتادت قالالىق سوتىنىڭ شەشىمىمەن سايلىبايەۆانىڭ ەنەسى ناتاليا دونسوۆا كۇدىكتى دەپ تانىلدى. وعان گەرمانيا مەن ەۋروپانىڭ باسقا دا ەلدەرىنىڭ اۋماعىندا ىزدەۋ جاريالاندى.

كەيىننەن ايگۇل سايلىبايەۆانى ءولتىرۋ تۋرالى قىلمىستىق ءىس رەسەيگە بەرىلەتىنى بەلگىلى بولدى.

ب ا ق مالىمەتتەرى بويىنشا، ءقازىر ناتاليا دونسوۆا ماسكەۋدە تۇرادى. ونىڭ ۇلى الەكساندر دا سول جەردە، ول «جوعارى ەكونوميكا مەكتەبى» ۇلتتىق زەرتتەۋ ۋنيۆەرسيتەتىندە (جەمۇۋ) جۇمىس ىستەيدى.

ايگۇل سايلىبايەۆانىڭ وتباسى بولجامدى كىسى ولتىرۋشىلەردى سوتقا تارتۋدى تالاپ ەتۋدە.