InfoHub Logo

گەرمانيالىق تۋريست گرەكياداعى دەمالىس كەزىندە شەزلونگ تاپپاعانى ءۇشىن تۋروپەراتوردان 986 ەۋرو وتەماقى الدى. بۇل تۋرالى The Guardian باسىلىمىنا سىلتەمە جاساپ Tengri Travel حابارلادى.

گاننوۆەردەگى سوت شەشىمى بويىنشا، ەر ادام مەن ونىڭ وتباسى دەمالىس كەزىندە جاعاجايداعى ورىندىقتاردىڭ ورنىنا بەتون ۇستىندە جاتۋعا ءماجبۇر بولعان. تۋريست وتباسىمەن بىرگە كوس ارالىنا بارعاندا، تاڭەرتەڭ ەرتە تۇرسا دا، شەزلونگ تابا الماعانىن ايتقان.

ول ايەلى مەن ەكى بالاسى ءۇشىن 7000 ەۋرودان استام اقشا تولەگەنىمەن، بۇكىل دەمالىس بويى جاعاجايدا ورىنسىز قالعان.

تۋريست قوناقۇيگە شاعىمدانعاننان كەيىن ءىشىنارا اقشاسىن قايتارىپ العان. الايدا، گاننوۆەردەگى اۋداندىق سوت وتباسىنىڭ تولىق وتەماقى الۋعا قۇقىلى ەكەنىن جانە تۋروپەراتوردىڭ جاۋاپكەرشىلىگىن مويىندادى.

سوت وتىرىسىندا تۋريست ءقوناقۇي مەن تۋروپەراتوردىڭ ەرەجەلەردى ساقتاماعانىن، ياعني شەزلونگتاردى «سۇلگىمەن» بەلگىلەۋگە تىيىم سالاتىن ەرەجەلەردى ورىنداتپاعانىن ايتتى. ونىڭ ءقوناقۇي قىزمەتكەرلەرىنە جاساعان وتىنىشتەرىنە قاراماستان، ەشقانداي شارا قولدانىلماعان.

سوت شەشىمىندە تۋروپەراتوردىڭ قوناقۇيمەن كەلىسىمشارت جاساسقاندا، شەزلونگتار مەن دەمالۋشىلار سانى اراسىندا «اقىلعا قونىمدى» تەپە-تەڭدىكتى قامتاماسىز ەتەتىن جۇيەنى ۇسىنۋ مىندەتتى ەكەنى اتاپ ءوتىلدى.

بۇل شەشىم «سۇلگى سوعىستارى» دەپ اتالاتىن ماسەلەگە قاتىستى سوتتىڭ العاشقى شەشىمدەرىنىڭ ءبىرى بولدى. بۇل جاعداي ەۋروپاداعى پاكەتتىك تۋرلاردىڭ اجىراماس بولىگىنە اينالعان.