InfoHub Logo

قازاقستاندىقتار الەمدەگى ەڭ ءىرى IT-جوبالاردى حوستينگىلەيتىن GitHub سەرۆيسىنە كىرۋدە قيىندىقتارعا كەزىگۋدە. بۇل تۋرالى Infohub.kz اقپارات اگەنتتىگى حابارلايدى.

سوڭعى كەزدەرى ءبىرقاتار قازاقستاندىق پايدالانۋشىلار GitHub پلاتفورماسىنا كىرە الماي، الەۋمەتتىك جەلىلەردە شاعىمدانا باستادى. ولاردىڭ ايتۋىنشا، سەرۆيس تەك VPN (Virtual Private Network) قوسىلعان جاعدايدا عانا جۇمىس ىستەيدى. بۇل جاعداي، اسىرەسە، باعدارلاماشىلار مەن IT سالاسىنداعى ماماندار ءۇشىن ماڭىزدى، سەبەبى GitHub ولاردىڭ نەگىزگى جۇمىس قۇرالى بولىپ تابىلادى.

نە بولدى؟

رەداكسياعا حابارلاسقان وقىرمانداردىڭ ءبىرى سەرۆيسپەن جۇمىس ىستەي المايتىنىن ايتىپ شاعىمداندى. ونىڭ ايتۋىنشا، بۇل ماسەلە بىردەن بىرنەشە بايلانىس وپەراتورلارىندا بايقالادى. ول سەرۆيس باعدارلامالىق جاساقتاما ازىرلەۋشىلەرى ءۇشىن وتە ماڭىزدى ەكەنىن اتاپ ءوتتى.

الەۋمەتتىك جەلىلەردە دە GitHub-تىڭ تۇراقسىز جۇمىسى تۋرالى شاعىمدار كوبەيگەن. مىسالى، Reddit جەلىسىندەگى قازاقستاندىق پايدالانۋشىلاردىڭ ءبىرى بىرنەشە كۇن بويى رەسۋرستان دەرەكتەردى جۇكتەپ الۋعا تىرىسقانىن، ءبىراق ساتسىزدىككە ۇشىراعانىن جازدى.

«ءۇش كۇن بويى وسى سايتتان ەشتەڭە جۇكتەي الماي وتىرمىن، VPNءسىز مۇمكىن ەمەس. بۇل قۇرىلعىنىڭ نەمەسە ينتەرنەتتىڭ ماسەلەسى ەمەس. بەس ءتۇرلى قۇرىلعىنى، ءتورت ءتۇرلى Wi-Fi جەلىسىن اۋىستىرىپ كوردىم. ءبىراق ءار جەردە بىردەي قاتەلىك شىعادى. ۇيدەگى DNS-سەرۆەردى اۋىستىرىپ كوردىم، ءتىپتى كوفەينياعا بارىپ تا تىرىستىم، ءبىراق VPNءسىز امال تاپپادىم»، - دەپ جازدى پايدالانۋشى.

IT ماماندارىنىڭ الاڭداۋشىلىعى

Threads الەۋمەتتىك جەلىسىندەگى باعدارلاماشىلار كاسىبي قىزمەت ءۇشىن وسىلايشا «تەمىر پەردە» ورناتىلۋىنا الاڭداۋشىلىق بىلدىرۋدە.

«GitHub-تان كود الۋعا تىرىستىم – كىرگىزبەدى. VPN قوستىم – جۇمىس ىستەدى. ەندى ويلانىپ وتىرمىن: بۇل قاشاننان قالىپتى جاعدايعا اينالدى؟ مەن بۇكىل الەم قولداناتىن قۇرالعا قولجەتىمدىلىكتىڭ بۇعاتتالۋىنا تاڭ قالمايتىن بولدىم با؟» - دەپ جازدى ءبىر پوست اۆتورى.

پىكىرتالاسقا قاتىسۋشىلاردىڭ ايتۋىنشا، قازاقستاندا GitHub-پەن بۇرىن دا پروبلەمالار بولعان، ءبىراق ءقازىر ولار جۇيەلى سيپات العان.

رەداكسيا دا سەرۆيس جۇمىسىن تەكسەرىپ، GitHub پورتالىنىڭ ءوزى اشىلاتىنىن، ءبىراق فايلداردى جۇكتەپ الۋ كەزىندە قيىندىقتار تۋىندايتىنىن انىقتادى. كوبىنەسە (ءبىراق بارلىق جاعدايدا ەمەس) سايت قاتەلىك بەرەدى، بەتتەر جۇكتەلمەيدى. ال VPN قوسىلعاندا فايلدار ەش قيىندىقسىز جۇكتەلەدى.

مەملەكەتتىك ورگاندار نە دەيدى؟

رەداكسيا ءتيىستى ۆەدومستۆولاردان تۇسىنىكتەمە سۇرادى. جاۋاپتى «مەملەكەتتىك تەحنيكالىق قىزمەت» اق (متق) بەردى:

«وتىنىشتە كەلتىرىلگەن GitHub رەسۋرستارىنا قولجەتىمدىلىككە قاتىستى مۇمكىن بولاتىن شەكتەۋلەر تۋرالى اقپاراتقا سايكەس، «متق» سەرۆيستىڭ جۇمىسىنداعى ۇزىلىستەرگە ەش قاتىسى جوق ەكەنىن حابارلايدى. وسىعان بايلانىستى، بۇل ءوتىنىشتى قاراۋ قۇزىرەتتى ورگاندار مەن (نەمەسە) بايلانىس وپەراتورلارىنا ءوز قۇزىرەتى اياسىندا قاراۋعا جاتادى»، - دەپ حابارلادى تەحنيكالىق قىزمەت.

رەداكسيا ينتەرنەت-رەسۋرستارعا قولجەتىمدىلىكتى قاداعالايتىن باسقا دا مەملەكەتتىك ورگانداردان تۇسىنىكتەمە الۋعا تىرىسۋدا.

GitHub دەگەن نە؟

GitHub – IT-جوبالاردى حوستينگىلەۋ جانە بىرلەسىپ دامىتۋ بويىنشا الەمدەگى ەڭ ءىرى ۆەب-سەرۆيس. بۇگىنگى تاڭدا بۇل ميلليونداعان باعدارلاماشىلار، ينجەنەرلەر جانە دەرەكتەر عالىمدارى ءۇشىن نەگىزگى جۇمىس قۇرالى بولىپ سانالادى. رەسۋرس بانك قوسىمشالارى، مەملەكەتتىك قىزمەتتەر، جاساندى ينتەللەكت جۇيەلەرى جانە قاراپايىم ۆەب-سايتتاردى قۇرۋدا قولدانىلاتىن ميلليونداعان اشىق كىتاپحانالار مەن كودتاردى ساقتايدى.