InfoHub Logo

«حابار» تەلەارناسى جاساندى ينتەللەكت (جي) تەحنولوگياسىن قولدانىپ، ەرەكشە بالا جاسۋلان بازاربايەۆتىڭ قىزىن سويلەتكەننەن كەيىن جەلىدە قىزۋ تالقىلاۋ باستالدى.

بۇل تۋرالى Infohub.kz اقپارات اگەنتتىگى حابارلايدى.

ءانشىنىڭ ءوزى بۇعان دەيىن الەۋمەتتىك جەلىدە قىزىن سەگىز جىل كۇتكەنىن، الايدا قىزى 2،5 جاستا بولعاندا ونىڭ ەرەكشە دياگنوزى بارى بەلگىلى بولعانىن ايتقان بولاتىن. «سول ساتتەن باستاپ ەم ىزدەپ، كوپتەگەن ماماندارعا جۇگىندىك. قايدا بارمادىق، قانداي ەسىك قاقپادىق دەسەڭىزشى. ءقازىر قىزىمىز ون جاستان استى. ازداپ سويلەي باستادى، ويىن بىلدىرە الادى»، — دەپ بولىسكەن ءانشى.

ەفير كەزىندە جۋرناليست انشىدەن ەكرانعا نازار اۋدارۋىن وتىنەدى. سول ساتتە ونىڭ كىشكەنتاي قىزىنىڭ اكەسىنە جىلى لەبىزدەرىن ءبىلدىرىپ، سويلەگەن بەينەجازباسى كورسەتىلەدى. بۇل كەزدە ءانشى ەموسياسىن جاسىرا الماي، كوز جاسىنا ەرىك بەرگەن.

جەلى قولدانۋشىلارىنىڭ نارازىلىعى

بۇل جاعدايعا جەلى قولدانۋشىلارى قاتتى اشۋلاندى. كوپشىلىگى مۇنداي ءادىستى دورەكى جانە ەتيكاعا جات دەپ سانادى. جاساندى ينتەللەكتىنى پايدالانىپ، بالانىڭ داۋىسىن جاساۋ – ونىڭ جەكە باسىنا جانە وتباسىنا دەگەن قۇرمەتسىزدىك رەتىندە قابىلداندى.

ايتا كەتەيىك، بۇل «حابار» ارناسىنىڭ العاشقى داۋلى جاعدايى ەمەس. بۇعان دەيىن ارنا ءۇي ىشىندەگى زورلىق-زومبىلىقتى باستان كەشكەن ايەلدى ەفيردە كۇيەۋىمەن قوسۋعا تىرىسقان توك-شوۋ ءۇشىن سىنعا ۇشىراعان بولاتىن. جەكە باسىن جاسىرۋعا جانە كۇيەۋىن شاقىرماۋعا ۋادە بەرگەنىنە قاراماستان، رەداكسيا بۇل شارتتاردى بۇزىپ، قوعامدا ۇلكەن رەزونانس تۋدىردى.