InfoHub Logo

يران سىرتقى ىستەر ءمينيسترى ابباس اراكچي اقش پەن يزرايلمەن بىتىمگە كەلۋدەن باس تارتقانىن مالىمدەدى. ونىڭ ايتۋىنشا، تەگەران سوعىستى توقتاتۋدى ەمەس، ونىڭ تولىققاندى جانە تۇراقتى اياقتالۋىن قالايدى.

بۇل تۋرالى مينيستر جاپونيانىڭ «كيودو» اگەنتتىگىنە بەرگەن سۇحباتىندا ايتتى. اراكچيدىڭ سوزىنشە، يران قاقتىعىستى تۇبەگەيلى شەشۋگە ۇمتىلادى.

سونىمەن قاتار، ول يراننىڭ جاپونياعا قاتىستى كەمەلەرىنىڭ ورمۋز بۇعازىنان وتۋىنە رۇقسات بەرۋگە دايىن ەكەنىن جەتكىزدى. بۇل ماسەلە ءقازىر ەكى ەل اراسىندا تالقىلانىپ جاتىر. يراننىڭ ايتۋىنشا، جاپونيا يمپورتتايتىن شيكى مۇنايىنىڭ 90 پايىزدان استامى تاياۋ شىعىستان كەلەدى.

بۇعان دەيىن اراكچي «Al Jazeera» تەلەارناسىنا بەرگەن سۇحباتىندا يراننىڭ اقش پەن يزرايلمەن سوعىستا شەگىنبەيتىنىن ايتقان بولاتىن. ول يراننىڭ ساياسي جۇيەسىنىڭ مىقتى ەكەنىن جانە جوعارى لاۋازىمدى تۇلعالاردىڭ جوعالۋى ەلدى شايقالتپايتىنىن اتاپ ءوتتى.

سىرتقى ساياسي ۆەدومستۆو باسشىسى يرانداعى ينستيتۋتتار تۇلعالارعا تاۋەلدى ەمەس ەكەنىن، ءتىپتى ەڭ جوعارى دەڭگەيدەگى باسشى جوعالعان كۇننىڭ وزىندە جۇيە جۇمىسىن جالعاستىرا بەرەتىنىن باسا ايتتى.

اقش پەن ءيزرايلدىڭ يرانعا قارسى وپەراسياسى 28 اقپاندا باستالدى جانە ءۇشىنشى اپتاعا اياق باستى. وسى ۋاقىت بويى تاراپتار بىر-بىرىنە سوققى بەرىپ كەلەدى. تەل-اۆيۆتىڭ ايتۋىنشا، ولاردىڭ ماقساتى – يراننىڭ يادرولىق قارۋ الۋىنا جول بەرمەۋ. ۆاشينگتون ەلدىڭ اسكەري الەۋەتىن جويۋعا ۋادە بەرىپ، ازاماتتاردى رەجيمدى قۇلاتۋعا شاقىردى. ال يران قورعانۋعا دايىن ەكەنىن جانە كەلىسسوزدەردى جاڭارتۋدىڭ ءمانىن كورمەيتىنىن ايتتى.