InfoHub Logo

يراننىڭ جوعارعى كوشباسشىسى اياتوللا ءالي حامەنەيدىڭ قازا تاپقانى تۋرالى رەسمي حاباردان كەيىن، جەلىدە كۇتپەگەن جاڭا بولجامدار پايدا بولدى. كەيبىر ساراپشىلار مەن ينتەرنەت قولدانۋشىلارى حامەنەيدىڭ شىن مانىندە ءتىرى بولۋى مۇمكىن دەگەن پىكىردى العا تارتۋدا.

بۇل تۋرالى Infohub.kz اقپارات اگەنتتىگى حابارلايدى.

نەلىكتەن مۇنداي پىكىرلەر تاراۋدا؟

رەسمي دەرەكتەرگە سايكەس، يراننىڭ رۋحاني كوشباسشىسى 28 اقپاندا تەگەرانداعى رەزيدەنسياسىنا جاسالعان شابۋىلدان كەيىن قايتىس بولدى. وسى وقيعادان سوڭ ەلدە ءبىر اپتالىق ازا تۇتۋ جاريالانىپ، قوشتاسۋ ءراسىمى مەن جەرلەۋ شارالارى جوسپارلانعان ەدى. الايدا، راسىمدەر كۇتپەگەن جەردەن كەيىنگە شەگەرىلىپ، ناقتى مەرزىمى بەلگىسىز قالدى. بۇل جاعداي ءتۇرلى كۇدىكتەر مەن بولجامدارعا جول اشتى.

كونسپيرولوگيالىق تەوريالاردىڭ نەگىزى

كونسپيرولوگيالىق تەوريالاردى ۇستانۋشىلار بىرنەشە سەبەپتى العا تارتادى. ولاردىڭ پىكىرىنشە، اقش پەن ءيزرايلدىڭ باستى ماقساتى يران كوشباسشىسىن جويۋ بولعان. سوندىقتان ونىڭ جاقتاستارى حامەنەيدى ءقاۋىپسىز جەرگە جاسىرىپ، ءولىمى تۋرالى اقپاراتتى ادەيى تاراتۋى مۇمكىن دەگەن بولجام بار.

سونىمەن قاتار، جاڭا جوعارعى كوشباسشىنى سايلاۋ ءراسىمىنىڭ ءالى جاريالانباۋى دا كۇمان تۋدىرۋدا. يران زاڭناماسى بويىنشا، جاڭا كوشباسشىنى 88 ءدىن عالىمىنان تۇراتىن ساراپشىلار كەڭەسى سايلاۋى ءتيىس. كەيبىر دەرەكتەردە حامەنەيدىڭ ورنىنا ونىڭ ۇلى مودجتابا حامەنەي كەلۋى مۇمكىن دەگەن اقپارات تاراعانىمەن، بۇل رەسمي تۇردە راستالماعان.

ءدىني سەنىمدەردىڭ ىقپالى

ءدىنتانۋشىلاردىڭ ايتۋىنشا، مۇنداي تەوريالاردىڭ تارالۋىنا شييتتىك يسلامداعى «جاسىرىن يمام» تۋرالى تۇسىنىك تە اسەر ەتۋى مۇمكىن. بۇل سەنىم بويىنشا، IX عاسىردا ءومىر سۇرگەن مۋحامماد يبن ءال-حاسان ءال-ماحدي كوزدەن عايىپ بولعانىمەن، ولمەگەن جانە بەلگىلى ءبىر ۋاقىتتا قايتا ورالىپ، الەمدە ادىلەت ورناتادى دەگەن نانىم بار. وسىعان ۇقساس تاريحي جانە ءدىني تۇسىنىكتەر حامەنەي تۋرالى ءاڭىز-اپسانالاردىڭ پايدا بولۋىنا ىقپال ەتۋى ىقتيمال.

دەگەنمەن، قازىرگى تاڭدا يران بيلىگى حامەنەيدىڭ قازا تاپقانىن رەسمي تۇردە راستاپ وتىر. ونىڭ ءتىرى ەكەندىگى تۋرالى اقپارات ازىرگە دالەلدەنبەگەن.