InfoHub Logo

ىشكى ىستەر مينيسترلىگىندە (ءىىم) وتكەن القا وتىرىسىندا 2026 جىلدىڭ ءبىرىنشى توقسانىنداعى جەدەل-قىزمەتتىك جۇمىستاردىڭ قورىتىندىلارى شىعارىلدى. جيىندا مينيستر ەرجان سادەنوۆ ءبىرقاتار ماڭىزدى تاپسىرمالار بەردى.

بۇل تۋرالى Infohub.kz اقپارات اگەنتتىگى حابارلايدى.

باستى باعىتتار

مينيستر كوشى-قون باقىلاۋىن دامىتۋ، قىلمىستىق-اتقارۋ جۇيەسىن جەتىلدىرۋ، ۆەدومستۆولىق ءبىلىم بەرۋدى نىعايتۋ جانە ۇلتتىق ۇلاننىڭ الەۋەتىن ارتتىرۋ بويىنشا جۇمىستاردى كۇشەيتۋدى تاپسىردى. سونداي-اق، قىزمەتتىك-اسكەري ءتارتىپتى نىعايتۋ، جاۋىنگەرلىك جانە دەنە دايارلىعىنىڭ دەڭگەيىن ارتتىرۋ باسىم باعىتتار رەتىندە بەلگىلەندى.

بۇعان قوسا، جەكە قۇرامعا باقىلاۋدى كۇشەيتىپ، ءاربىر بۇزۋشىلىققا قاتىستى قاتاڭ باعا بەرىپ، جاۋاپكەرشىلىكتىڭ ءسوزسىز بولۋىن قامتاماسىز ەتۋ كەرەكتىگى ايتىلدى. باسپا ءسوز قىزمەتىنىڭ حابارلاۋىنشا، باسشىلاردىڭ وزدەرىنە سەنىپ تاپسىرىلعان اۋماقتارداعى ءتارتىپ پەن قىزمەت ناتيجەلەرى ءۇشىن جەكە جاۋاپكەرشىلىگى اتاپ ءوتىلدى.

قىلمىس دەڭگەيى تومەندەدى

ۆەدومستۆونىڭ مالىمەتىنشە، ەسەپتى كەزەڭدە 2025 جىلدىڭ سايكەس كەزەڭىمەن سالىستىرعاندا قىلمىس دەڭگەيى 9 پايىزعا، ياعني 2150 قىلمىسقا ازايعان. بۇل كورسەتكىش بارلىق نەگىزگى ساناتتار بويىنشا، سونىڭ ىشىندە ادامدارعا قارسى جاسالعان قىلمىستار، مۇلىكتىك قىلمىستار جانە ت.ب. بويىنشا بايقالادى.

رەسيديۆيستەر، كامەلەتكە تولماعاندار، ماساڭ كۇيدە، قوعامدىق ورىنداردا جانە تۇرمىستا جاسالعان قىلمىستاردىڭ سانى قىسقاردى. ينتەرنەت-الاياقتىق ارەكەتتەردىڭ ازايعانى جانە ولاردىڭ اشىلۋ كورسەتكىشىنىڭ ارتقانى دا اتاپ ءوتىلدى. ەسەپشوتتاردى بۇزۋ، كريپتوۆاليۋتالار، ونلاين-كرەديتتەر جانە جالعان ينتەرنەت-رەسۋرستارمەن بايلانىستى الاياقتىقتار ازايعان.

3،6 ميلليوننان استام اكىمشىلىك قۇقىق بۇزۋشىلىقتىڭ جولى كەسىلىپ، ولاردىڭ اۋىر قىلمىستارعا ۇلاسۋىنا جول بەرىلمەدى. «تازا قازاقستان» اكسياسى اياسىندا 722 مىڭنان استام قۇقىق بۇزۋشىلىق انىقتالىپ، ءۇش مىڭنان استام رۇقسات ەتىلمەگەن قوقىس ءۇيىندىسى جويىلدى. جول قاۋىپسىزدىگى سالاسىندا 3 ميلليوننان استام جول ەرەجەسىن بۇزۋشىلىقتىڭ جولى كەسىلدى.