InfoHub Logo

باعزى زاماندا ءبىر قالانىڭ اقكوڭىل ءارى وتە جاقسى ءبىر باسقارۋشىسى بولىپتى. باسقارۋشى تانىسا دا، تانىماسا دا ەلدىڭ بارىمەن امانداسىپ، جاعدايىن سۇرايدى ەكەن. وزىنە ءىسى تۇسكەندەرگە دە قۋانا كومەكتەسەدى.

بۇل اقكوڭىل باسقارۋشىنىڭ ءبىر جامان مىنەزى كىم نە دەسە سوعان بىردەن سەنەدى ەكەن.

كۇندەردىڭ كۇنىندە باسقارۋشىنىڭ جانىنا جاعىمپاز جانە ءوزىمشىل ءبىر كومەكشى تاعايىندالىپتى. ءبىراق ول قالا حالقىنا مۇلدە جاقسى قاراماپتى. كوڭىلىنەن شىققانعا كومەكتەسىپ، كوڭىلى قالاماعانعا كومەكتەسپەپتى. ءارى ۇناتپاعان ادامدارىن باسقارۋشىعا جاماندايدى ەكەن.

ۋاقىت وتە كەلە قالا تۇرعىندارى وعان رەنىشىن بىلدىرە باستاپتى. حالىقتىڭ باسقارۋشىعا دەگەن كوزقاراسى دا بۇرىنعىداي ەمەس، وزگەرە باستاپتى. حالىقتىڭ بۇل نارازىلىعى پاديشاحتىڭ دا قۇلاعىنا جەتىپتى.

پاديشاح باسقارۋشىنى سول كۇنگە دەيىن ەشقاشان كورمەگەن، ءبىراق جاساعان ىستەرىنە قاراي ونى ۇناتادى ەكەن. سوندىقتان ونى ءوز كوزىمەن كورمەي، سۇراستىرماي قىزمەتىنەن شىعارعىسى كەلمەپتى.

ءبىر كۇنى ۇستىندەگى كيىمىن اۋىستىرىپ، اقكوڭىل باسقارۋشىنىڭ تۇرىپ جاتقان قالاسىنا بارىپتى. قوناقۇيدە ونى الدىمەن باسقارۋشىنىڭ جاعىمپاز كومەكشىسى قارسى الىپتى. ۇستىندەگى كيىمىن اۋىستىرعان پاديشاحتى تانىماي، ودان نە قالايتىنىن اشۋلانىپ سۇراپتى. پاديشاح وعان:

– وتە ماڭىزدى ءبىر ءىس ءۇشىن اۋىل اعاسىمەن كەزدەسكىم كەلەدى، – دەپ جاۋاپ بەرىپتى. كومەكشى:

– باسقارۋشىنىڭ قۇزىرىنا كەلۋگە قالاي عانا سەنىڭ باتىلىڭ بارادى. جىلدام كەت، بۇل جەردەن، – دەپ ايقاي سالىپتى. پاديشاح:

– مەنىڭ وتە ءبىر ماڭىزدى ءىسىم بار. مىندەتتى تۇردە ونى كورۋىم كەرەك، – دەپ اۋزىن اشىپ جيعانشا، جاعىمپاز قىزمەتشىلەردى شاقىرىپ، پاديشاحتى قۋىپ جىبەرمەكشى بولىپتى. سول كەزدە كۇڭگىرلەگەن داۋىستى ەستىگەن باسقارۋشى نە بولىپ جاتقانىن سۇراپتى. پاديشاح:

– قۇرمەتتى باسقارۋشى، سىزبەن كورىسكىم كەلىپ ەدى. كومەكشىڭىز رۇقسات بەرمەدى، – دەپتى. باسقارۋشى دا پاديشاحتى تانىمايدى ەكەن، ءبىراق «كەلىڭىز، كەلىڭىز» دەپ كۇلىمسىرەپ جىلى شىراي تانىتىپ سالەمدەسىپتى. ءسوزىن وتكىزە الماعان كومەكشى بىردەن اراعا ءتۇسىپ، باسقارۋشىعا: «قىمباتتى باسقارۋشىم، مەن بۇل ادامدى جاقسى تانيمىن. سۋايتتىڭ بىرەۋى. ابايلاڭىز ونىمەن كەزدەسسەڭىز باسىڭىزعا بالە كەلەدى» – دەپ، پاديشاحتى كەزدەسپەۋگە كوندىرىپتى. سوسىن وعان:

– باسقارۋشىنىڭ ءبىر جۇمىسى بار. سەنىمەن كەزدەسپەيدى، – دەپتى.

پاديشاح سارايىنا رەنجىپ قايتىپتى. سول كۇنى حابار جىبەرىپ، باسقارۋشى مەن كومەكشىسىن سارايعا الدىرىپتى. ەكەۋى دە پاديشاحتىڭ قۇزىرىنا كەلىپتى. پاديشاحتىڭ الدىندا كومەكشىنىڭ جەرگە يىلگەنى سونشالىق، پاديشاح ءبىرازعا دەيىن ونىڭ ءجۇزىن كورە الماپتى. ءبىراق باسقارۋشى تابالدىرىقتان اتتاي سالا، پاديشاحتى تانىپ، جۇگىرىپ بارىپ ونىڭ قولىن ءسۇيىپ، كەشىرىم سۇراپتى. جاعىمپاز سول كەزدە عانا پاديشاحتىڭ بەتىنە قاراپ، ىستەگەن قاتەلىگىن ءتۇسىنىپ، پاديشاحتىڭ اياعىنا جىعىلىپ، كەشىرۋىن ءوتىنىپتى. ءبىراق پاديشاح جاعىمپازدى كەشىرمەي، جۇمىستان قۋىپ جىبەرىپتى. اقكوڭىل باسقارۋشىعا باسقانىڭ ىعىمەن كەتپەي، ءوز كوڭىلىنىڭ قالاۋىنشا ارەكەت ەتۋىن جانە شەشىم قابىلدايتىن كەزدە بىرنەشە كىسىنىڭ ويىن ءبىلىپ، سوعان قاراي شەشىم قابىلداۋ كەرەكتىگى جونىندە كەڭەس بەرىپتى. باسقارۋشى پاديشاحتىڭ كەڭەستەرىن سول كۇننەن باستاپ جۇزەگە اسىرىپ، قايتادان قالا حالقىنىڭ سەنىمىنەن شىعىپتى.

---