InfoHub Logo

جامبىل وبلىسىندا جۇرتشىلىقتى تاڭ-تاماشا قالدىرعان وقيعا بولدى. تۋىستارى قايتىس بولدى دەپ ويلاپ، جەرلەپ تاستاعان ايەل ءبىر ايدان كەيىن ءتىرى كۇيىندە ۇيىنە ورالدى.

بۇل تۋرالى Infohub.kz اقپارات اگەنتتىگى حابارلايدى.

وقيعانىڭ باستالۋى

1953 جىلى تۋعان ايەل 2024 جىلدىڭ تامىز ايىندا تاراز قالاسىنا كوشىپ كەلىپ، اپكەسىنىڭ ۇيىندە تۇرا باستاعان. الايدا، 2025 جىلعى قۇربان ايت مەرەكەسىنەن كەيىن ول كەنەتتەن حابارسىز كەتكەن. ءبىراز ۋاقىت بويى ەشقانداي حابار بولماعان سوڭ، تۋىستارى پوليسياعا ارىزدانعان.

كەيىن 2025 جىلدىڭ تامىز ايىندا اۋىل ماڭىنداعى دالادان بەلگىسىز ايەلدىڭ ءمايىتى تابىلادى. وسى فاكتى بويىنشا قىلمىستىق ءىس قوزعالعان. تۋىستارى ءمايىتتى جوعالعان انالارى دەپ تانىپ، رەسمي تۇردە ءولىم تۋرالى اكت راسىمدەلىپ، ءتيىستى كۋالىك تە بەرىلگەن.

كۇتپەگەن جاعداي

الايدا، ءبىر ايدان كەيىن، ياعني 2025 جىلدىڭ قىركۇيەك ايىندا ايەل جامبىل اۋدانىنا قاراستى قوستوبە اۋىلىنداعى اعاسىنىڭ ۇيىنە ءتىرى كۇيىندە كەلىپ، بارلىعىن تاڭعالدىرعان. بۇدان كەيىن ونىڭ قىزى اناسىنىڭ قۇقىقتىق مارتەبەسىن قالپىنا كەلتىرۋ ءۇشىن سوتقا جۇگىنگەن.

ايەلدىڭ ايتۋىنشا، قۇربان ايتتان كەيىن ول ايشا ءبيبى اۋىلىنا بارىپ، پياز جيناۋ جۇمىسىنا كىرىسكەن. سول جەردە ۋاقىتشا تۇرىپ، جۇمىس ىستەگەن. كەيىن زەينەتاقىسى توقتاعانىن بايقاپ، تارازعا بارعاندا ءوزىنىڭ "قايتىس بولدى" دەپ تىركەلگەنىن بىلگەن. تۋىستارىنىڭ ايتۋىنشا، ونىڭ كەيدە ۇزاق ۋاقىتقا ەسكەرتۋسىز كەتىپ قالاتىن ادەتى بولعان ەكەن.

سوت شەشىمى

جامبىل اۋداندىق سوتى جۇرگىزگەن تەكسەرۋلەر ناتيجەسىندە تابىلعان ءمايىتتىڭ باسقا ادامعا تيەسىلى ەكەنى انىقتالدى. پوليسيا ەكسگۋماسيا جاساپ، قوسىمشا سوت-مەديسينالىق جانە گەنەتيكالىق ساراپتامالار جۇرگىزگەن.

ناتيجەسىندە مارقۇمنىڭ كىم ەكەنى ناقتى انىقتالىپ، قوزعالعان قىلمىستىق ءىس توقتاتىلدى. سوت ايەلدىڭ "قايتىس بولدى" دەگەن قۇجاتتارىن جارامسىز دەپ تانىپ، ءولىم تۋرالى اكتىنىڭ كۇشىن جويدى. سوت شەشىمى زاڭدى كۇشىنە ەندى.