InfoHub Logo

اتىراۋ وبلىسىنىڭ جانگەلدين اۋىلىندا ورىن العان قايعىلى وقيعادان كەيىن جوعالعان قىزدىڭ امان-ەسەن تابىلۋى تۋىستارىنىڭ جۇرەگىنە ءۇمىت ۇيالاتتى. الايدا، قىلمىستىق ءىس بويىنشا كۇدىكتى رەتىندە اتالعان قىزدارى اقباياننىڭ ءتىرى ەكەنىنە قۋانعانىمەن، ءالى دە ىزدەۋدە جۇرگەن ناۋرىز بەن مەيرامگۇلدىڭ تاعدىرىنا الاڭداۋلى.

بۇل تۋرالى Infohub.kz اقپارات اگەنتتىگى حابارلايدى.

اتىراۋداعى اۋىر جاعدايعا بايلانىستى قازا تاپقان ەرلى-زايىپتىلاردىڭ تۋىستارى ەكى ادامنىڭ – ناۋرىز مۇقانعالييەۆ پەن مەيرامگۇل قارابالينانىڭ تاعدىرى بەلگىسىز بولىپ تۇرعانىن ايتىپ، ولاردىڭ اماندىعىن تىلەدى. «ەكى باۋىرىمىزدان حابار شىقسا ەكەن، ەڭ بولماعاندا سۇيەگى تابىلسا ەكەن»، – دەيدى تۋىستارى.

ەستەرىڭىزگە سالساق، جانگەلدين اۋىلىندا ءبىر وتباسىنىڭ ءتورت مۇشەسى ءىز-تۇزسىز جوعالىپ، كەيىن زەينەتكەر ەرلى-زايىپتىلاردىڭ ءمايىتى ءوز ۇيىنەن تابىلعان ەدى. تەرگەۋ نۇسقاسى بويىنشا، بۇل قىلمىسقا مارقۇمداردىڭ كۇيەۋ بالاسى سۇلتان سارسەمالييەۆ پەن قىزى اقبايان مۇقانعالييەۆا قاتىسى بار دەگەن كۇدىك كەلتىرىلگەن. ەكەۋىنىڭ يندونەزيا اۋماعىندا ۇستالعانى حابارلانعان بولاتىن.

الايدا، مارقۇمداردىڭ تۋىستارى اقباياننىڭ ءوز اكە-شەشەسىنە قول جۇمساۋى مۇمكىن دەگەنگە سەنبەيدى. ولاردىڭ پىكىرىنشە، اقبايان كۇيەۋىنىڭ ىقپالىمەن ارەكەت ەتكەن بولۋى ىقتيمال، ال ءىستىڭ ءمان-جايى ءالى تولىق انىقتالماعان.

وتباسىنىڭ قايعىسى مەن ءۇمىتى

مارقۇم ماقسوت مۇقانعالييەۆتىڭ قارىنداسى اسيلا مۇقانعالييەۆا ءسىڭلىسى اقبايانمەن ءجيى ارالاسىپ تۇرعانىن، ونىڭ بالاجان جان ەكەنىن ايتادى. بۇل وقيعانىڭ سالدارىنان وتباسىنىڭ بەس بالاسى جان-جاققا ءبولىنىپ، قامقورلىق مەكەمەلەرىنە جىبەرىلگەن. بۇل جاعداي وتباسىنىڭ ەڭ اۋىر سوققىسى بولدى.

«اقباياننىڭ ءتىرى ەكەنىنە قۋاندىق. ەكى باۋىرىمىز دا تابىلاتىن شىعار دەپ ۇمىتتەنەمىز. اقبايان كەلىپ، جازىلىپ، بالالارىن باۋىرىنا باسادى دەپ ويلاپ جىلادىم. كۇدىكتى ءوزىنىڭ ىستەگەنىن مويىنداسا ەكەن دەيمىز»، – دەيدى اسيلا مۇقانعالييەۆا.

قازىرگى تاڭدا ءتيىستى ورگاندار كۇدىكتىلەردى قازاقستانعا قايتارۋ جۇمىستارىن جۇرگىزىپ جاتىر. ال جانگەلديندەگى قايعىلى وتباسى ءۇشىن ەڭ باستى ءۇمىت – ءالى تابىلماي جاتقان ەكى ادامنىڭ تاعدىرى بەلگىلى بولىپ، بۇل ىسكە ءادىل سوت تورەلىگىن ايتۋ.