InfoHub Logo

جاستاردى عانا وقىتۋ كەرەك دەگەن تۇسىنىكتەن باس تارتۋىمىز كەرەك. ەلوردادا ءوتىپ جاتقان عالامدىق يننوۆاسيالىق سامميتتە ق ر تۇڭعىش پرەزيدەنتى-ەلباسى قورىنىڭ اتقارۋشى ديرەكتورى اسەت يسەكەشيەۆ وسىنداي پىكىر ءبىلدىردى.

«كەيىنگى ونجىلدىقتا كوپتەگەن وزگەرىستەر بولدى. ەڭبەك سيپاتى، ەكونوميكالىق ترەندتەر قۇبىلىپ تۇر. ءبىز سانكسيالىق قاقتىعىستاردى كورىپ وتىرمىز. مالايزيادا وتكەن جاھاندىق يننوۆاسيالىق سامميتتە تەحنولوگيالىق دامۋ ارقىلى بولاشاق قوعامدى قالىپتاستىرۋ ماسەلەسى تالقىلانعان بولاتىن. دامۋشى ەكونوميكالاردىڭ ساياساتىنا تەحنولوگيالار تىكەلەي اسەر ەتۋدە. ءبىز ءىرى قالالار داۋىرىندە ءومىر ءسۇرىپ وتىرمىز. سول ۇردىستەن قالماۋ ءۇشىن تالانتتار مەن يننوۆاسيالى شەشىمدەردى، ءىرى عىلىمي ينستيتۋتتاردى، كىشى جانە شاعىن بيزنەستى كەڭىنەن تارتا ءبىلۋ كەرەك. ءقازىر اقپارات جىلدام ەسكىرەتىن بولدى. سوندىقتان دا ادامي كاپيتالدى دامىتۋ ەكونوميكانىڭ نەگىزى بولۋى ءتيىس»، - دەگەن اسەت يسەكەشيەۆ.

ول تالانتتىڭ جاس تالعامايتىنىن دا اتاپ ءوتتى.

«جاستارعا عانا ءبىلىم بەرىپ، سولاردى عانا وقىتۋ كەرەك دەگەن تۇسىنىكتەن باس تارتۋىمىز كەرەك. 2018 جىلى بۇۇ-نىڭ تالانتتار جونىندەگى كوميتەتى ستارتاپتار باستى ءرولدى اتقارىپ وتىرعانىن مالىمدەدى. ستارتاپ ۇعىمى جاڭا ەكونوميكالىق ساناتقا اينالۋدا. مىسالى، 2017 جىلى اقش-تاعى ستارتاپتار 1،1 ملن جۇمىس ورنىن اشقان. تاۋەلسىزدىكتىڭ العاشقى جىلدارىندا بىزدە گيپەرينفلياسيا بولىپ، جۇمىسسىزدار سانى 2 ملن ادامعا جەتكەن بولاتىن. ءبىر جىلدىڭ ىشىندە جالپى ىشكى ءونىم 60 پايىزعا قۇلدىرادى. 30 جىلدا بۇل كورسەتكىش 11 ملرد اقش دوللارىنان 111 ملرد دوللارعا ءوستى. ورتا ازياداعى جالپى ىشكى ءونىمنىڭ 60 پايىزى قازاقستانعا تيەسىلى. قازاقستانعا وسى جىلدارى 300 ملرد دوللاردىڭ ينۆەستيسياسى تىكەلەي قۇيىلدى. بيزنەستى جۇرگىزۋ جەڭىلدىگى بويىنشا 12-ورىندا تۇرمىز. ءومىر سۇرۋ ۇزاقتىعى 72 جاستان استى. «بولاشاق» باعدارلاماسى بويىنشا مىڭداعان ستۋدەنتتى شەتەلدەن وقىتتىق. بەس جىل بۇرىن قازاقستاننىڭ ورتا كىرىس حابىنا كىردى»، - دەدى قور باسشىسى.

ەسكە سالساق، بۇگىن ەلوردادا «باسكەلەستىك ترانسفورماسياسى! ۇلتتار – ەنەرگيا – يندۋستريالار – قالالار – تالانتتار» دەگەن تاقىرىپپەن عالامدىق يننوۆاسيالىق سامميت ءوتىپ جاتىر.

---