InfoHub Logo

استانادا وتكەن جەڭىستىڭ 80 جىلدىعىنا ارنالعان اسكەري پاراد – مايدانگەرلەرگە تاعزىم ەتۋ مەن قازىرگى قازاقستان ارمياسىنىڭ الەۋەتىن كورسەتۋ ماقساتىندا ۇيىمداستىرىلدى. شارا – تاريحقا قۇرمەت پەن بولاشاق قاۋىپسىزدىككە سەنىمدىلىكتىڭ سيمۆولىنا اينالدى.

پارادقا قازاقستان قارۋلى كۇشتەرىنىڭ بارلىق قۇرامىنان 4 مىڭنان اسا اسكەري قىزمەتكەر قاتىستى. شەرۋ بارىسىندا 200-دەن استام اسكەري تەحنيكا مەن قارۋ-جاراق، 66 اسكەري اۆياسيا قۇرالدارى – ۇشاقتار مەن تىكۇشاقتار تارتىلدى.

بيىلعى پارادتىڭ ەرەكشەلىگى – العاش رەت «بۋك»، «تور» سىندى زەنيتتىك-راكەتالىق كەشەندەردىڭ، «بارىس»، «الان»، «ايبار»، «تايماس»، «تەررەكس» سياقتى زاماناۋي دوڭگەلەكتى ۇرىس ماشينالارىنىڭ جانە مينالاردى زالالسىزداندىراتىن روبوتتارمەن جابدىقتالعان ارناۋلى كولىكتەردىڭ ساپقا قوسىلۋى بولدى.

سونداي-اق، قازاقستاننىڭ قورعانىس ونەركاسىبى كەشەنى الداعى ۋاقىتتا شىعارۋدى كوزدەپ وتىرعان ۇرىس تەحنيكاسى – روبوتتاندىرىلعان قايىق، ۇشقىشسىز باسقارىلاتىن ۇشۋ قوندىرعىلارى جۇرت نازارىنا ۇسىنىلدى.

پاراد بارىسىندا اۋە كەڭىستىگىندە دە اسەرلى كورىنىس ورنادى. ا-400 اسكەري-كولىك ۇشاعى، L-410 جولاۋشىلار ۇشاعى مەن بي-300 پاترۋل ۇشاعى اسپاندى جارىپ ءوتتى.

بۇل اسكەري شەرۋ – اتا-بابالاردىڭ ەرلىگىنە دەگەن تاعزىم مەن ەگەمەن ەلدىڭ قورعانىس قۋاتىنىڭ ۇيلەسىمدى كورىنىسى رەتىندە تاريحتا قالماق.