جەتىسۋ وبلىسى: «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 59 نىسان سالىندى
جەتىسۋ وبلىسىندا «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ اياسىندا جالپى سانى 59 نىسان سالىندى. اتاپ ايتقاندا، 2023-2025 جىلدار ارالىعىندا 15 دارىگەرلىك امبۋلاتوريا، 39 فەلدشەرلىك-اكۋشەرلىك جانە 5 مەديسينالىق پۋنكتتىڭ قۇرىلىسى اياقتالدى، - دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
وبلىستىق دەنساۋلىق ساقتاۋ باسقارماسىنىڭ مالىمەتىنشە، مەديسينالىق كومەكتىڭ قادامدىق قولجەتىمدىلىگىن قامتاماسىز ەتۋ جانە شالعايداعى اۋىلداردى مەديسينالىق قىزمەتپەن قامتۋ ماقساتىندا قولعا الىنعان ۇلتتىق جوبا اياسىندا كەربۇلاق اۋدانىندا - 17، پانفيلوۆ - 11، الاكول - 9، قاراتال - 6، ەسكەلدى - 5، اقسۋ مەن كوكسۋ اۋداندارىندا – 4-تەن، سارقان اۋدانىندا 3 دەنساۋلىق ساقتاۋ نىسانى بوي كوتەردى.
سولاردىڭ ءبىرى – وتكەن جىلدىڭ سوڭىندا قۇرىلىسى اياقتالىپ، وسى جىلدىڭ قاڭتار ايىندا اشىلعان پانفيلوۆ اۋدانى ديحانقايرات اۋىلىنداعى جاڭا فەلدشەرلىك-اكۋشەرلىك پۋنكت. اتاپ ايتقاندا، بۇل اۋىلدا 1 200 تۇرعىنى بار. بۇعان دەيىنگى مەديسينالىق مەكەمە 1980 جىلى سالىنعان ەسكى عيمارات بولعاندىقتان، قىزمەت كورسەتۋدە قولايسىز بولاتىن. جاڭادان پايدالانۋعا بەرىلگەن عيمارات قاجەتتى مەديسينالىق قۇرالدارمەن جابدىقتالىپ، زاماناۋي ينجەنەرلىك جۇيەلەرمەن تولىق قامتىلعان. مۇندا قابىلداۋ بولمەسى، الدىن-الا قابىلداۋ جانە كۇندىزگى قابىلداۋ بولمەلەرى، ەمدەۋ بولمەلەرى، ۆاكسيناسيا كابينەتىجانە باسقا دا قاجەتتى بولمەلەر قاراستىرىلعان.
جاڭا فاپ-تا 3 مەديسينا مامانى جۇمىس ىستەيدى. سولاردىڭ ءبىرى وتىز جىلدان استام تاجىريبەسى بار فەلدشەر گۋلينۇر قامباروۆا جاڭا عيماراتتى كوپتەن كۇتكەنىن جەتكىزدى.
- ءبىز بۇرىنعى عيماراتتى كومىرمەن جىلىتىپ، تار بولمەلەردە قولايسىز جاعدايدا تۇرعىندارعا مەديسينالىق كومەك كورسەتىپ كەلدىك. زاماناۋي مەديسينالىق جابدىقتار جوق بولعاندىقتان، تۇرعىنداردى كوبىنە اۋدان ورتالىعىنا جىبەرەتىنبىز. ءقازىر جاڭا فەلدشەرلىك-اكۋشەرلىك پۋنكتتە العاشقى كومەك كورسەتۋگە، ەمدىك شارالار جۇرگىزۋگە قاجەتتى جابدىقتاردىڭ بارلىعى بار. مەكەمەنىڭ ەلەكترمەن جىلىتىلاتىنى، كەڭ، جارىق ءارى قولايلى بولعانى قۋانتادى، - دەيدى ول.
بۇل قۋانىشتى جاڭالىققا اۋىل تۇرعىندارى دا ريزا.
- اۋىلىمىزدا جاڭا فەلدشەرلىك-اكۋشەرلىك پۋنكت اشىلىپ وتىر. بۇرىن دا وسىنداي مەكەمە بولعان، ءبىراق ول تار، ەسكى عيمارات ەدى. قازىرگى فاپ كەڭ، قاجەتتى ەمدىك بولمەلەرى جەتكىلىكتى، زاماناۋي جابدىقتارى بار. اۋىل تۇرعىندارىنىڭ دەنساۋلىعىن ساقتاۋعا وسىنداي قولايلى جاعداي جاسالعانىنا قۋانىشتىمىز، - دەيدى اۋىل تۇرعىنى بايان كوبەنبايەۆا.
اتاپ وتسەك، ۇلتتىق جوباعا پانفيلوۆ اۋداندىق كوپسالالى اۋرۋحانا دا ەنگىزىلگەن. ءقازىر اتالعان نىساننىڭ قولدانىستاعى عيماراتىن قايتا جاڭارتۋ مەن جاڭا كورپۋسىن سالۋ بويىنشا قۇرىلىس جۇمىستارى جۇرگىزىلۋدە.
-
تيمۋر كەنجيبايەۆ بانكتەگى تابىستى مانسابىن تاستاپ، دانەكەرلەۋشى بولىپ، جاڭا ءومىر باستادى.
-
تايقازاننىڭ تۇركىستانعا قايتارىلۋى – قازاق تاريحىنداعى ماڭىزدى وقيعا. بۇل رەليكۆيانىڭ ەلگە ورالۋى قالاي جۇزەگە استى؟
