InfoHub Logo

اۆتورى:
عابيدەن قوجاحمەت،
قىزىلوردا قالاسى

جەز قوڭىراۋ سىڭعىرى

بۇيىرتادى تاعدىر، شىركىن، ءار ادامعا نەسىبىن،
كەشە ەمەس پە ەد مەكتەپ - ۇيا بۇلارعا اشقان ەسىگىن.
ەندى، مىنە، سودان بەرى زۋلاپ جىلدار ءوتىپتى،
مەكتەبىمەن قوشتاسار ءسات بۇلارعا دا جەتىپتى.

ۇعىندى ما ارلىلىعىن، ءتاتتى ءومىردىڭ نار جۇگىن،
اق بانتيكپەن قوشتاسادى قىز بالا دا ءدال بۇگىن.
ءبۇر جاردى ما كەۋدەسىندە اساۋ سەزىم ەلىم دەپ،
ادۋىنداۋ ەركە ۇلدىڭ دا مۇرتى قاپتى تەبىندەپ.

اڭساۋشى ەدى كەشە عانا وسى كۇنگە جەتكەنىن،
ەندى بۇگىن سەزىم باسقا، قيا الماي تۇر مەكتەبىن.
قىز بالانىڭ كىرپىگىندە ءمولدىر تامشى ىركىلدى،
سىر بەرمەيدى ۇلدار جاعى، قيماسا دا بۇل كۇندى.

قوڭىراۋدىڭ سىڭعىر قاققان ءۇنى قۇلاق جارادى،
جەز قوڭىراۋ بۇلار ءۇشىن سوڭعى رەت ءان سالادى.
بۇل ءبىر شىندىق مويىندايتىن كىم - كىمگە دە راس تىم،
وتىرمايدى ەندى قايتىپ پارتاسىنا كلاستىڭ.

ايىرباستار كەز كەلدى ەندى وقۋشىلىق قالامىن،
تىڭدامايدى قايتىپ ەندى ۇستازىنىڭ ساباعىن.
ءومىر - انا بۇلارعا دا "سەن ەسەيدىڭ، ءبىل" دەيدى،
ەندى قايتىپ مەكتەبىندە وقۋشى بوپ جۇرمەيدى.

قيمايدى ولار سول شاكىرتتىك كۇز، كوكتەمىن، قىس، جازىن،
وكىنەدى كۇنى كەشە رەنجىتسە ۇستازىن.
سىڭعىرلايدى قوڭىراۋدىڭ قايتا - قايتا جەز ءۇنى،
سىر بەرەدى مۇنداي ساتتە جاس جۇرەكتىڭ سەزىمى.

قوشتاسادى مەكتەبىمەن ءومىر - اسۋ اسادى،
بۇلار ورنىن بۇگىن، مىنە، باسقا تولقىن باسادى.
جول بەرەدى جاس ۇرپاققا كەلە جاتقان تالاپتى،
ءاز - ۇيادان تۇلەپ ۇشار قاعىپ ەركىن قاناتتى.

اسىرۋعا بويىنداعى ءبىلىمى مەن بىلىگىن،
كەتەدى مە باسقا جەردە جالعاستىرىپ ءبىلىمىن.
باسقا جەردىڭ گۇلزار باعىن مۇمكىن بارىپ ارالار،
مەكتەبىنە، بالكىم، ءبىر كۇن ۇستاز بولىپ ورالار.

ورالمايدى وقۋشى بوپ نەگە، نەگە ءبىراق تا،
جاۋاپ ىزدەپ تابا المايدى ەشكىم مۇنداي سۇراققا.
ويتكەنى بۇل - ءومىر زاڭى وزگەرتە الماس ەش ادام،
وزگەرتەر تەك قۇدىرەت بار: ءبىر ءتاڭىرىم - جاساعان.

ەستىلەدى شالعايلاردان ءومىر - كۇيدىڭ كۇمبىرى،
ارماندارعا جەتەلەيدى جەز قوڭىراۋ سىڭعىرى.
ۇشتى ۇيادان، قالار ارتتا ءتاتتى سەزىم - بالا شاق،
شاقىرادى الىستارعا، شاقىرادى بولاشاق!

ون جىلدان سوڭ...

تال بەسىگىڭنەن تاڭعاجايىپ سىر تابا الدىم،
ەسىڭنەن ءالى كەتە الماي ءجۇر - اۋ بالاڭ كۇن.
ون كوكتەمنەن سوڭ ويلارعا تولى ومىرمەن
شاكىرتتىك شاققا ورالدىڭ.

ەسىڭدە ءالى بالالىق سىردا جۇزگەنىڭ،
ەستەلىك ءجىبىن ون كوكتەم بويى ۇزبەدىڭ.
ورالىپ قايتا ءوزىڭ قالدىرعان كەشەگى
بالالىق كۇندى ىزدەدىڭ.

ساعىنىش سەزىم جۇرەكتە الاۋ جاندىرعان،
وتكەنى راس وسىناۋ جىلدا سان دۋمان.
بويجەتكەن قىزدىڭ شاكىرتتىك بەلگىسى ءبىر كەزگى
اق بانتيك قايدا قالدىرعان.

وتكەن كۇندەردى ايتتىڭ با بۇگىن ەرتەك قىپ،
قالايشا مىناۋ از عانا ساتتە ەرجەتتىك.
شاكىرتتىك شاعىن ەسكە العان اناۋ جىگىتتىڭ
كەزدەرى قايدا تەنتەكتىك.

ون كوكتەم بويى ءوتىپتى داۋرەن، تۇرماپتى،
ۋاقىت اتتى ءامىرشى بۇگىن ءتىل قاتتى.
سانداعان جىلدار سابىرمەن كەلىپ بويىڭنان
بالالىق كۇندى ۇرلاپتى.

وتكەن ءبىر شاقپەن جاراسا بىلسەڭ، جانىڭ ۇق،
تابيعاتىڭنان شىن سەزىم جاتسا تابىلىپ.
ورالدىڭ بۇگىن ويلارعا تولى كوڭىلمەن
كەشەگى كۇندى ساعىنىپ.

قايعى قىلىشى تورلاپتى - اۋ كەيدە اسپاندى،
جابىعىپ كەلىپ جاناردان بۇگىن جاس تامدى.
ىزدەدىڭ قايتا جۇرەگىڭ مۇڭعا مالىنىپ
جوعالتىپ العان دوستاردى.

وتكەن ءبىر كۇنگە اپارىپ قىز بەن ۇلىڭدى،
ۋاقىت - كەمە وزىڭە بۇگىن بۇرىلدى.
ەسەيىپ قانشا كەتسەڭ دە سولاي، دوستارعا
سەزىمىڭ بولسىن بۇرىنعى.

ۇعىنىپ سونى جانىممەن مەن دە جاي تابام،
بويىڭنان سەنىڭ ساعىنىش سازىن بايقاعام.
كەشەگى كۇنگە شاكىرتتىك دوسپەن ءبىر جۇرگەن
ورالشى بۇگىن قايتادان.

وسىلاي ەت تە اسەم ءبىر انگە سال بۇگىن،
ورالىپ تۇر عوي ويتكەنى ساعان بال كۇنىڭ.
شاتتىقتى كۇندە وزدەرىڭە عانا ارنالعان
دۋمانمەن اتسىن تاڭ بۇگىن!

شاكىرت تولعانىسى

كۇنى كەشە مۇنىڭ ءبارى ەسىمدە،
ەركەلەي كەپ تۋعان جەردىڭ توسىندە
العاش رەت اشتىم مەكتەپ ەسىگىن -
قازىنالى مول ءبىلىمنىڭ بەسىگىن.

ونى ويلاسام، كەۋدە جايلاپ كەتەدى ءورت،
ءبىلىم - نۇرعا باسقام قادام توتەلەپ.
وتىرعىزدى پارتاڭ مىناۋ سەنىڭ دەپ،
العاشقى ۇستاز ءوزى اكەپ جەتەلەپ.

مەن وسىلاي ءبىلىم ءنارىن تەرىپپىن،
بولماسا ۇستاز، ونى قايدان كورىپپىن.
سول ۇيرەتتى، سىرىن ءبىلدىم ومىردە
"الىپپەدەگى" قىرىق ەكى ءارىپتىڭ.

دوستار تاپتىم مەن بۇل جەردە جاڭاشا،
ويىن سالدىم ۇزىلىستە جاراسا.
ەسكە تۇسسە، كوڭىل ءبىر ءسات تولقيدى،
بالا كەزگى ءومىر ءار كەز تاماشا!

جىلجىپ جىلدار ءبىر ورىندا تۇرمادى،
بالا شاقتى ۋاقىت كەپ ۇرلادى.
كەشە بالا، بۇگىن تۇلەك بولىپپىز،
جاس تۇلەكتىڭ جاڭعىرىقتى قىردا ءانى.

ايتشى، دوستىم، مۇنىڭ ەندى نەسى مۇڭ،
تەربەتكەنبىز مول ءبىلىمنىڭ بەسىگىن.
ەسەيتىپتى الديىمەن ۋاقىت،
كەز كەلىپتى جابار مەكتەپ ەسىگىن.

ۇستازدارمەن قوشتاسار ءسات كەلىپتى،
بولاشاعىڭ بولسىن دەيدى كورىكتى.
مىنە، ەسەيدىڭ، ءوز جولىڭدى تاپقىن دەپ
ءاز - ۇيامىز اق باتاسىن بەرىپتى.

قاق قاناتتى، ىركىلمە ەندى، قومدا دا
دەيدى بىزگە جاتىر الدا جول دارا.
مۇنىڭ ءوزى ايتۋعا تەك جەڭىل - اق،
مەكتەبىڭدى قيا المايسىڭ سوندا دا.

قيا المايسىڭ بالا كەزگى كوكتەمدى،
قيا المايسىڭ جىلى شۋاق وتكەندى.
ءبىر - اق ساتتە ەر جەتكىزىپ ەسەيتكەن
ۋاقىتقا ارتا المايسىڭ وكپەڭدى.

مۇنداي ساتتە قيىن كوز جاس توگىلمەۋ،
مۇنداي ساتتە قيىن ەكەن ەگىلمەۋ.
دوستار، قانە، بىرگە قانات قاعالىق،
قاتار ۇشساق بولار، بالكىم، جەڭىلدەۋ.