InfoHub Logo

نازارلارىڭىزعا جۇمىسقا تۇرۋ بارىسىندا جىبەرىلەتىن قاتەلەردىڭ ءتىزىمىن ۇسىنامىز. ەگەر وسى قاتەلەرگە جول بەرمەسەڭىزدەر، جۇمىسقا تۇرىپ كەتۋ مۇمكىندىگى ارتا تۇسەتىنىن دە ەسكەرە كەتەيىك.

1. تىم ۇزىن قوسىمشا حات جازۋ نەمەسە مۇلدەم قوسىمشا حات جازباۋ

جۇمىس بەرۋشى مەكەمەنىڭ HR قىزمەتىندەگى ماماندار ەلەكتروندى پوشتالارىنا كەلگەن ءاربىر تۇيىندەمەگە قوسىمشا بەرىلگەن حاتتاردى وقي وتىرىپ، ولاردان ءسىزدىڭ بالالىق شاعىڭىزعا ساياحات جاساۋ، نە بولماسا ءسىزدىڭ جانۇياڭىز بەن جاقىندارىڭىزعا عانا قىزىقتى بولىپ كورىنۋى مۇمكىن ومىرلىك حيكايالارىڭىزبەن تانىسسا، قاتە جىبەردىڭىز دەۋگە بولادى. سەبەبى ناقتى جۇمىسقا قاتىستى دەرەكتەردى عانا بەرۋ ارقىلى ءسىز ءوزىڭىزدىڭ كاسىبي دەڭگەيىڭىزدى كورسەتە الاسىز.

تاعى ءبىر قاتەلىك – تۇيىندەمەمەن بىرگە ەشبىر قوسىمشا حات جىبەرمەۋ نەمەسە بىر-ەكى اۋىز سوزبەن عانا تىم قىسقا قايىرىپ، «مەنىڭ كانديداتۋرامدى قاراستىرۋلارىڭىزدى سۇرايمىن. كومپانيالارىڭىز ءۇشىن قاجەت مامان بولىپ تابىلامىن!» دەپ جازۋ دا ادەپسىزدىككە جاتادى. بۇدان دا اسقان دورەكىلىك – تۇيىندەمەنى عانا جىبەرىپ، وعان ەشبىر قوسىمشا حات جازباۋ. ەڭ دۇرىسى، حاتتىڭ باسىندا امانداسىپ، قىسقا دا نۇسقا تۇردە ءوزىڭىزدىڭ وسى كومپانياعا نەمەن پايدالى بولا الاتىنىڭىزدى جازۋعا بولادى. بۇل جەردە كانديداتقا قويىلاتىن تالاپتاردىڭ ءتىزىمى كومەككە كەلۋى مۇمكىن.

2. جەكە قابىلەتتەرىڭىزدىڭ ءتىزىمىن جولداۋ

جۇمىسقا تۇرۋشى ادام ءوزىنىڭ جۇمىس تاجىريبەسىنىڭ جەتكىلىكسىز ەكەنىن بىلگەن كەزدە، ونى ءوزىنىڭ جەكە باسىنا قاتىستى قابىلەتتەرىمەن تولىقتىرۋعا تىرىسىپ باعادى. وسى سەبەپتى تۇيىندەمەسىنىڭ ءبىر بولىگىن شابلونمەن جازىلعان قابىلەتتەرمەن تولتىرۋدى ءجون كورەدى. ولاردىڭ ىشىندە سترەسس جاعدايىنا توتەپ بەرۋ، كرەاتيۆتىلىك، ءار نارسەنى ۇيرەنۋگە دەگەن ىنتا مەن وزگەلەرى دە كەزدەسىپ جاتادى. الايدا مۇنىڭ ءبارىنىڭ تەك شابلوندى نارسەلەر ەكەنىن جانە ءسىزدىڭ جەكە باسىڭىزعا قاتىستى قابىلەتتەرىڭىزدى تولىققاندى اشپايتىنىن ۇمىتپاۋ قاجەت.

ەڭ دۇرىسى ناقتى سىزگە ءتان 2-3 ەرەكشە قابىلەتىڭىزدى كورسەتۋ ارقىلى ءوزىڭىزدىڭ ەرەكشەلىگىڭىزدى باسىپ كورسەتۋ بولىپ تابىلادى. جانە دە وسى قابىلەتتەرىڭىزگە دالەل بولاتىن سەرتيفيكاتتارىڭىز بەن ديپلومدارىڭىزدى قوسا بەرۋ دە ماڭىزدى.

3. جىبەرمەي تۇرىپ، تۇيىندەمەڭىزدى جاقسىلاپ وقىپ شىقپاۋ

نەگىزى، تۇيىندەمەڭىز بەن وعان قوسىمشا رەتىندە جولداناتىن حاتتى الدىن الا دۇرىستاپ وقىپ شىعۋ قاجەتتىلىگى ايتپاسا دا تۇسىنىكتى بولىپ ەسەپتەلگەنىمەن، ادامداردىڭ كوپ بولىگى ولاردا ءبىرشاما قاتە جىبەرىپ جاتادى. مىسالى، رەداكتور نەمەسە كوررەكتور لاۋازىمىنا تۇيىندەمە جولداي وتىرىپ، كەلەڭسىز ءبىر قاتەلەرگە جول بەرسەڭىز، جۇمىسقا تۇرۋ مۇمكىندىگىڭىزدىڭ ءبىرشاما تومەندەي تۇسەتىنى بەلگىلى. الايدا تەحنيكالىق ماماندىقتار بويىنشا اشىلعان ۆاكانسيالارعا دا تۇيىندەمە تاپسىرۋ بارىسىندا مۇقيات بولعان ابزال، سەبەبى گرامماتيكالىق قاتەلەرگە جول بەرمەۋ دە جۇمىس بەرۋشى ءۇشىن ماڭىزدى بولۋى مۇمكىن.

4. جۇمىس بەرۋشى ءسىزدىڭ الەۋمەتتىك جەلىلەرىڭىزگە كىرۋى مۇمكىن ەكەنىن ۇمىتۋ

HR-مامانعا ۇنايتىنداي ءبىر تۇيىندەمە جولداۋمەن ءىس بىتپەيتىنىن ۇمىتپاۋ قاجەت. تۇيىندەمە قوسا الەۋمەتتىك جەلىلەردەگى ءوزىڭىزدىڭ اككاۋنتتارىڭىزدى دا بەرۋ قاجەت ەكەنىن ەستەن شىعارماعانىڭىز ابزال. سەبەبى شىعارماشىلىقپەن بايلانىستى جۇمىسقا ورنالاسۋ بارىسىندا جۇمىس بەرۋشى الەۋمەتتىك جەلىلەرگە كىرىپ، ءسىزدىڭ شىعارماشىلىعىڭىزعا قاتىستى پوست جاساعان-جاساماعانىڭىزدى تەكسەرىپ شىعۋى مۇمكىن. ال، مەملەكەتتىك مەكەمەلەرگە جۇمىسقا تۇرعىڭىز كەلسە، اككاۋنتتارىڭىزدى كەلەڭسىز فوتولاردان تازارتۋىڭىز قاجەت بولار. سونداي-اق، بولاشاق event-مەنەدجەردىڭ فەيسبۋك پاراقشاسىندا 20-اق دوسىنىڭ بولۋى دا كۇدىك تۋدىرارى انىق.

5. تۇيىندەمەڭىزدىڭ جەتىپ-جەتپەگەنىن ءبىلۋ ماقساتىندا حابارلاسۋ

رەكرۋتەردىڭ الدىندا جاڭا اشىلعان ۆاكانسياعا دۇرىس ماماندى تاڭداپ الۋ ماقساتى تۇرعاندىقتان، ونىڭ جۇمىس پوشتاسىنا جۇزدەگەن حات كەلۋى مۇمكىن. سوندىقتان تۇيىندەمەڭىزدى جىبەرە سالا تەلەفون شالىپ حابارلاسۋ قاجەت ەمەس. جانە سىزگە بىردەن حابار بەرمەي جاتسا، بۇل وڭ ناتيجە بولمايدى دەگەنمەن پارا-پار ەمەس. سەبەبى ونداعان، ال كەي جاعدايلاردا جۇزدەگەن ادامنىڭ تۇيىندەمەسىن قاراپ شىعۋ جانە ولاردىڭ ىشىنەن ءبىر كانديداتتى تاڭداپ الۋ ءبىراز ۋاقىتتى قاجەت ەتەتىنى بەلگىلى.

6. سۇحباتتاسۋدى جالاقى تۋرالى سۇراقتان باستاۋ

كەز كەلگەن جۇمىس بەرۋشى جۇمىسقا ورنالاسۋعا كەلگەن كانديداتتان ءبىرىنشى كەزەكتە اقشاعا ەمەس، ىسكە بەرىلۋدى تالاپ ەتەدى. سوندىقتان جۇمىس بەرۋشى بولاشاق جۇمىسىڭىزعا قاتىستى سۇراقتار قويا الاسىز دەگەندە، بىردەن جالاقى ماسەلەسىنە ەمەس، جۇمىس بارىسىندا وزىڭىزگە جۇكتەلەتىن مىندەتتەر تىزىمىنە، جالپى ۇجىمنىڭ ۇيىمشىلدىعىنا جانە وسى جۇمىس ورنىنا قانداي جاڭالىق ەنگىزە الاتىنىڭىزعا توقتالعان ابزال. ال اقشا ماسەلەسىن سۇحباتتاسۋدىڭ سوڭىنا قالدىرساڭىز دا بولادى.

7. وسىعان دەيىنگى جۇمىس ورنىن سىناۋ

كانديدات تاراپىنان بۇرىنعى باستىقتارى مەن جۇمىس ورنىنا قاتىستى سىني ءسوز ايتىلسا، جۇمىس بەرۋشى ءوزىن ىڭعايسىز سەزىنۋى مۇمكىن. سەبەبى ءبىراز ۋاقىتتان كەيىن كانديدات وسى جەردەن دە كەتكەن جاعدايدا، وزىنە قاتىستى وسى تەكتەس پىكىر ايتىلماسىنا كىم كەپىل بولا الادى.

سوندىقتان بۇرىنعى جۇمىس ورنىڭىزدان شىعۋىڭىزدىڭ سەبەبى تۋرالى ءسوز قوزعالعاندا، ماسەلەنىڭ نەگىزگى سەبەپشىسى رەتىن بۇرىنعى باسشىلىعىڭىزدى ايىپتاۋ قاتە بولادى. جاڭا ءبىر ىسكە كىرىسىپ، نە بولماسا وسى تەكتەس مەكەمەدەگى بەلگىلى ءبىر سالانى دامىتۋ ماقساتىندا بۇرىنعى جۇمىسىمنان شىقتىم دەسەڭىز، ءوزىڭىزدىڭ جۇمىسقا ورنالاسۋ مۇمكىندىگىڭىزدى ءبىرشاما ارتتىراسىز. ال بۇرىنعى جۇمىسىڭىزدا ورىن العان كەلەڭسىز جاعدايلار كەرىدە قالسىن، ولارعا كوڭىل ءبولۋدىڭ كەرەگى جوق.

8. وسى جەردە ناقتى جۇمىس ىستەيتىنىڭىزگە سەنىمسىزدىك ءبىلدىرۋ

بىردەن بىرنەشە مەكەمەگە تۇيىندەمە جولداۋ cءىزدىڭ جۇمىسقا ورنالاسىپ كەتۋ مۇمكىندىگىڭىزدى ارتتىرارى ءسوزسىز. الايدا سۇحباتتاسۋ بارىسىندا «باسقا جەردەن» جاۋاپ كۇتۋدەمىن دەسەڭىز، جۇمىس بەرۋشى ءوز مەكەمەسىنىڭ cءىز ءۇشىن ەكىنشى ورىندا ەكەنىن سەزىنۋى مۇمكىن. سول سەبەپتى ءسىزدىڭ بۇل جەرگە تاعى ءبىر مارتە ورالۋىڭىز ەكىتالاي.

بولاشاعىڭىزعا قاتىستى جوسپارلارىڭىز تۋرالى سۇراقتارعا دا دۇرىس جاۋاپ بەرە الۋ وتە ماڭىزدى بولىپ تابىلادى. سەبەبى «ءوزىڭىزدى 2 جىلدان كەيىن قاي جەردە كورەسىز؟» دەگەن سۇراققا «الەمدى شارلاپ ءجۇرمىن» دەپ جاۋاپ بەرۋ قاتە بولار ەدى. سوندىقتان جۇمىس بەرۋشى ءوز بولاشاعىڭىزدى وسى مەكەمەمەن ەتەنە تىعىز بايلانىستا بولماسا دا، ءوز بىلىكتىلىگىڭىزدى ارتتىرا ءتۇسۋ ماقساتىندا جۇمىس ىستەۋ ءۇشىن قولىڭىزدان كەلگەننىڭ ءبارىن جاساۋعا دايىن ەكەنىڭىزدى كورسە جەتكىلىكتى.

---