ءجۇنىستىڭ جەر سوعۋى
سىزدىق دەگەن سەرى جىگىت قىزىلجار قالاسىنىڭ توڭىرەگىندە تۇراتىن ناعاشىسىن ىزدەپ شىعادى. ەل ىشىندە سوعىم سويىلىپ جاتقان مەزگىل بولسا كەرەك. جىگىت جۇرە-جۇرە سول اتىراپقا اتى جايىلعان ءجۇنىس بايدىڭ اۋىلىنا كەپ جەتەدى. ىمىرت جابىلعان كەز. اتتان ءتۇسىپ، بايدىڭ ۇيىنە كىرىپ كەلسە، ءۇش-تورت ادام شاي ىشكەلى جاتىر ەكەن. ءجۇنىس باي قاباعىن ءتۇيىپ، رەنىش بىلدىرەدى.
تەرىس قاراي سويلەپ:
— بالا، مىنا دامگە كەز كەلدىڭ. قۋىرداق جەپ، شاي ءىش. باسقا ءبىر ۇيگە بارىپ تۇنەرسىڭ. سوعىم سويعان كۇنى كىسى قوندىرمايتىن ىرىمىمىز بار ەدى، — دەيدى باي. امال قانشا، شاي ءىشىپ الىپ، قايتادان اتقا قونىپ، ءىڭىر قاراڭعىسىمەن ءجۇرىپ كەتەدى. ەلدىڭ كۇزەتى مەن قىستاۋىنىڭ شەتى قىزىلجارعا دەيىن سوزىلادى ەكەن.
سىزدىق جول-جونەكەي:
— بۇگىن ءجۇنىس باي كەنەتتەن قايتىس بولدى. سوعان جانازاعا شاقىرىپ ءجۇرمىن. ەرتەڭ ەرتەمەن بايدى جەرلەيدى» دەپ جار سالا جۇرەدى...
ءجۇنىستىڭ ءولىمىن ازا تۇتىپ، اۋىلعا ات قويعان اعايىن-تۋىس، قۇداندالى-جەكجاتتار ەرتەڭىنە-اق قاراقۇرىمداي قاپتاپ كەتەدى. ولىمنەن ولجا ىزدەگەن قوجا-مولدالار دا قالماي جينالادى. ەرىكسىز مال سويىلىپ، تاباق تارتىلادى. سالت اتتى جولاۋشىنى قوندىرماي، ءبىر ادامدى اۋىرسىنعان ءجۇنىستىڭ مىسى قۇرىپ، كەلەسى كۇنى ءجۇز قارالى كىسىگە قوناقاسى بەرىپتى.
-
ءوزى تۇرعان ءوڭىردىڭ ءبىرسىپىرا ۇلكەن-كىشىسىنە بەلگىلى ءبىر اقساقال، الىستان ات سابىلتىپ كەلە جاتقان جولدا تۇستەنىپ شىعايىن دەپ، انادايدان كورىنگەن قويلى اۋىلعا ات باسىن بۇرادى. ءۇي يەلەرى كەلگەن ادامعا...
-
قازىرگى قوستاناي وبلىسى، فەدوروۆ تەرريتوريالىق ۋپراۆلەنيەسىنىڭ ورتالىعى فەدوروۆكا سەلوسىندا احمەت پراۆيتەل تۇرعان. بۇل — كەنەسارى، ناۋرىزباي ۇرپاعى، «تورە تۇقىمى» دەپ اتالادى. قا...
