InfoHub Logo

الماتىداعى اۆتوبۋس ايالداماسىندا بەيۋاق مەزگىلدە بولعان وقيعا جۇرتشىلىقتى دۇرلىكتىردى. بەلگىسىز ەر ادام 66 جاستاعى زەينەتكەردى ەش سەبەپسىز سوققىعا جىققان. بۇل تۋرالى زارداپ شەككەن ايەلدىڭ تۋىسى Tengrinews.kz تىلشىسىنە بايانداپ بەردى.

بۇل تۋرالى Infohub.kz اقپارات اگەنتتىگى حابارلايدى.

«مەنىڭ انام – ءمۇعالىم، ومىرىندە ەشكىمگە جاماندىق جاساماعان، وتە سالماقتى ادام. مۇنداي جاعداي ءبىزدىڭ وتباسىمىزدا بۇرىن-سوڭدى بولماعان. ول كىسى دە مۇنىڭ قالاي بولعانىن تۇسىنبەي دال بولدى»، – دەيدى جاقىنى.

شابۋىل قالاي بولدى؟

وقيعا تاڭعى التى شاماسىندا بولعان. زەينەتكەر اپكەسىنىڭ ۇيىنە بارا جاتقان. ول ەشكىمدى مازالاماي، ادەتتەگىدەي اۆتوبۋسپەن جەتۋدى ءجون كورگەن.

كامەرا جازبالارىندا ايەلدىڭ ايالداماعا كەلىپ، سومكەلەرىن قويىپ، كولىكتى كۇتىپ تۇرعانى كورىنەدى. سول كەزدە جانىندا ەر ادام دا بولعان.

«ول جاي تۇرعان، پاكەتتەرىن قويىپ، اۆتوبۋسقا قارايلاپ تۇرعان. سودان كەيىن زاتتارىنا بۇرىلعاندا، ول كىسىنە بىردەن شابۋىل جاسادى. ەشقانداي ءسوز تالاسى، جانجال بولعان جوق. ءبىزدىڭ قولىمىزدا تولىق ۆيدەو بار، وندا ءبارى انىق كورىنەدى – بۇل شابۋىل ەش سەبەپسىز جاسالعان»، – دەيدى ايەلدىڭ تۋىسى.

ونىڭ ايتۋىنشا، وتباسى شابۋىلداعان ادامدى تانىمايدى. ۆيدەودان كورىنگەندەي، ەر ادام ارەكەتىن سانالى تۇردە جاساعان.

«ول ايەلدەن بۇرىن ايالدامادا بولعان. ۆيدەودا ول كولىك جوق كەزدى، اينالاسىن قاراپ، ءساتىن كۇتكەن سياقتى. بۇل كەزدەيسوق بولعان جاعداي ەمەس»، – دەپ قوستى ول.

شابۋىلدان كەيىن زەينەتكەر ەسىنەن تانىپ قالعان. وقيعا كەزىندە ايالدامادا ادام از بولعان. شابۋىلداعان ەر ادام كەتىپ قالعان، كەيىن عانا جولاۋشىلار پايدا بولعان.

كورشىسى زارداپ شەككەن ايەلگە كومەكتەسىپ، جەدەل جاردەم مەن پوليسيا شاقىرتىلعان.

شابۋىلداعان ازامات تۋرالى نە بەلگىلى؟

تۋىستارى پوليسياعا بەينەجازبالاردى تابىستاعان. وندا ەر ادامنىڭ قاي باعىتقا كەتكەنى كورسەتىلگەن. بىرنەشە كامەرا ارقىلى ونىڭ جۇرگەن جولىن باقىلاۋعا مۇمكىندىك بولعان.

«ءبىز ءوزىمىز جازبالاردى تاپتىق. ول قايدا كەتكەنى كورىنەدى – جاقىن جەردە مەكتەپ، دۇكەندەر، جەكە ۇيلەر، كوپتەگەن كامەرالار بار»، – دەدى ايەل.

وقيعا تاڭعى التىدا بولسا، شابۋىلداعان ازامات سول كۇنى كەشكە ۇستالعان. پوليسيا بۇعان دەيىن حابارلاعانداي، ەر ادامدى قاماۋعا العان.

وتباسى شابۋىلداعان ازاماتتىڭ كىم ەكەنى تۋرالى ناقتى اقپاراتقا يە ەمەس. دەگەنمەن، جەرگىلىكتى تۇرعىندار ونى وسى اۋداندا ءجيى كورەتىندەرىن ايتادى.

«ماعان كوپتەگەن ادامدار حابارلاسىپ، ونى كورگەندەرىن ايتتى. جاقىن ماڭداعى دۇكەندەردە ءجيى جۇرەتىنىن ايتتى. كەيبىرەۋلەر ونىڭ دەنساۋلىعىندا پروبلەما بولۋى مۇمكىن دەيدى، ءبىراق بىزدە راستالعان اقپارات جوق، ونى ءتيىستى ورگاندار انىقتايتىن بولادى»، – دەدى سۇحبات بەرۋشى.

تۋىستارى پوليسياعا ارىز جازىپ، ادىلدىك ىزدەيتىنىن مالىمدەدى.

«بۇل وقيعانىڭ جاي قالعانىن قالامايمىز. سەبەبى بۇگىن بۇل ءبىزدىڭ جاقىنىمىزدىڭ باسىنا كەلدى، ال ەرتەڭ ونىڭ ورنىندا كەز كەلگەن ادام بولۋى مۇمكىن. بۇل بالا نەمەسە باسقا ءبىر قاريا بولۋى مۇمكىن ەدى»، – دەپ اتاپ ءوتتى ول.

زارداپ شەككەن ايەلدىڭ جاعدايى

ءقازىر ايەل جەكە كلينيكادا جاتىر. تۋىسىنىڭ ايتۋىنشا، ونىڭ جاعدايى تۇراقتى، ءبىراق جاراقاتتارى اۋىر، قالپىنا كەلۋ ۋاقىتتى الادى.

«ءقازىر جاعدايى تۇراقتى، ءبىراق قالپىنا كەلۋى ۇزاققا سوزىلادى. ونىڭ بەتىندە كوپتەگەن تىگىستەر بار، بەت الپەتى قاتتى زاقىمدالعان. كەشە ول سوققىدان ىسكەرىپ كەتكەن كوزدەرى مەن اۋزىن اشا المادى. بۇگىن جاعدايى ءسال جاقساردى، ەسىندە، سويلەسە الادى»، – دەدى سۇحبات بەرۋشى.

ىشكى اعزالارىندا ەلەۋلى زاقىم بولماعانىمەن، سالدارى اۋىر. ايەلدە بۇرىن بولماعان قان قىسىمىنىڭ اۋىتقۋى بايقالادى، ۇيقىسى بۇزىلعان.

فيزيكالىق جاعدايىنان بولەك، جاقىندارى ونىڭ پسيحولوگيالىق جاعدايىن دا ۋايىمدايدى.

«ول ۇنەمى سول وقيعانى ويلاپ، ەسىنە الىپ وتىرادى. ونىڭ بەتىن جاقسى ەستە ساقتاعان. جاسى كەلگەنىنە قاراماستان، بىزگە پسيحولوگكە جۇگىنۋگە تۋرا كەلەدى. بۇل وعان ۇلكەن سترەسس، ويتكەنى ونىڭ ومىرىندە مۇنداي جاعداي ەشقاشان بولماعان»، – دەپ اتاپ ءوتتى تۋىسى.

دارىگەرلەر كەم دەگەندە بىرنەشە اپتا توسەك رەجيمىن ۇسىندى. وتباسى ايەلدىڭ تەلەفونعا قولجەتىمدىلىگىن ۋاقىتشا شەكتەدى، ونى ينتەرنەتتەگى اقپاراتتار مەن تالقىلاۋلاردان قورعاۋ ءۇشىن.

«ءقازىر بىزگە ەڭ باستىسى – ونىڭ قالپىنا كەلۋى. دارىگەرلەر ايتقانشا ەمدەلەدى. ال ودان كەيىن بۇل ادامنىڭ جاۋاپكەرشىلىگىن قاداعالايمىز»، – دەپ قورىتىندىلادى سۇحبات بەرۋشى.

كونتەكست

بەيسەنبى، 23 ساۋىردە، الماتى تۇرعىنى الەۋمەتتىك جەلىدە قالاداعى بوستاندىق اۋدانىنداعى ايالدامادا جاس جىگىتتىڭ ءوزىنىڭ 66 جاستاعى اناسىنا شابۋىل جاساپ، قاتتى سوققىعا جىققانى تۋرالى جازبا جاريالادى. قىز بالا پوليسيانىڭ ارىزدى قابىلداپ، تەرگەۋ باستاعانىن اتاپ ءوتتى.

الماتى قالالىق پوليسيا دەپارتامەنتى ايەلگە جاسالعان شابۋىل فاكتىسى بويىنشا بوستاندىق اۋداندىق پوليسيا باسقارماسى قىلمىستىق ءىس قوزعاعانىن حابارلادى. ەر ادام ۇستالىپ، ۋاقىتشا تەرگەۋ يزولياتورىنا توعىتىلدى.

سونداي-اق وقىڭىز: الماتىدا زەينەتكەردى سوققىعا جىققان ەر ادام تۋرالى نە بەلگىلى: سوتتىلىعى، شيزوفرەنيا