(يا. پولونسكييدەن)
جۇرەكتە كوپ قازىنا بار، ءبارى جاقسى،
تەڭىزدىڭ تۇبىندەي-اق قاراپ باقشى.
سول جۇرەكتەن جىلىلىق، دوستىق پەنەن
بۇلاقشا اعىپ عالامعا تاراماقشى.
جان شولدەر وزىڭدەيمەن تانىسقانشا،
بىرىنەن ءبىرى ۇلەسىپ الىسقانشا.
قۇمارلانار، سۇيىسەر جۇرەك تاۋىپ،
قىتىقسىز قىزىقپەنەن باس قوسقانشا.

جۇرتتىڭ ءسوزى: تاعدىرعا ادام كونبەك،
ءبىر انتۇرعان ەرىكسىز مەزگىل كەلمەك.
وسى سەنىڭ قىزىعىڭ، قۋانىشىڭ
ساعىمشا جوق بوپ كەتىپ تۇگەسىلمەك.

بەينە ءبىر سول قازىنانى ءبىر جاۋ الماق،
جۇرەكتىڭ كەڭ دارياسى قۇرىپ قالماق.
سۋىق اقىل جۇرەككە بۇيرىق جازىپ،
ونى ءبىر ءوزى وزگەشە جولعا سالماق.

جۇرەگىن پايداسى ءۇشىن جۇرت ۇساتپاق،
كىرمەن ولشەپ بازارعا ۇستاپ ساتپاق.
ونى ساتىپ، ول كىمدى ۋاتادى؟
ونىڭ ءوزىن تاعى دا كىم ۋاتپاق؟

جۇرت ايتقان سول انت مەزگىل كەلسەڭ كەرەك...
مەن دە پەندە، امالسىز كونسەم كەرەك.
قىزىعى زور قايران دوس، قايران تاتۋ،
سەندەر ءولدىڭ، مەن-داعى ولسەم كەرەك!

---