InfoHub Logo

ءبىر كۇنى جيرەنشەنى حان شاقىرتىپ، وعان قىرىق سيىر بەرىپتى. «وسى سيىرلاردىڭ ىشەك قارنىن تىرىلەي تازالاپ اكەل، بارلىعىن دا سوياسىڭ، سويعاندا بىرەۋىنىڭ ىشىنەن ءبىر ءتۇيىر دە قىلتان شىقپاسىن!» — دەپتى. جيرەنشە سيىرلاردى الىپ، ايەلى قاراشاشقا كەلەدى. قاراشاش:

— قورىقپا، سيىرلاردى اششى قۇدىقتىڭ باسىنا الىپ بارىپ، جالعىزداپ سۋار دا، سۋارعانىڭدى سول جەردە اينالدىرىپ قۋا بەر. اۋەلى ءىشىنىڭ قارماۋى كەتەر، ونان كەيىن جىندى سۋ كەتەر، ەڭ سوڭىندا قارا سۋدىڭ ءوزى كەتەر، — دەپتى.

جيرەنشە قاراشاشتىڭ بارلىق ايتقاندارىن ىستەگەن ەكەن، ونىڭ ايتقاندارىنىڭ بارلىعى دا دۇرىس كەلىپتى. ءسويتىپ، قىرىق سيىردىڭ بارلىعىنىڭ ءىشىن تازالاپ، حانعا الىپ كەلىپتى. حان سيىرلاردى شەتىنەن سويا باستاپتى. ءبىراق ەشبىرەۋىنىڭ ىشىنەن قىلتاڭ تابا الماي، اڭ-تاڭ قالعان ەكەن دەيدى.

* * *

ءبىر كۇنى حان جيرەنشەگە حابار بەرەدى:

— جيرەنشە بىزدىكىنە كەلسىن، كەلگەندە جولمەن دە جۇرمەسىن، جولسىز دا جۇرمەسىن، — دەپتى.

جيرەنشە ءبىر يت پەن ءبىر ەشكىنى قوساقتاپتى دا، جولعا ءتۇسىپ حان ۇيىنە قاراي كەلە جاتادى. حان ۇيىنە جاقىندايدى. ونىڭ كەلە جاتقانىن حالىق كورىپ:

— مىناۋ كىم ءوزى، جولمەن دە جۇرمەيدى، جولسىز دا جۇرمەيدى. قالاي ءجۇرىپ كەلە جاتقان ادام؟ — دەپ تاڭعالادى. ونسىز دا يت پەن ەشكى قوساقتاعاندا قالاي دۇرىس ءجۇرسىن، بىلايىنشا جۇرگەننىڭ وزىندە دە دۇرىس جۇرمەيدى، — دەپتى. جيرەنشەنىڭ تاپقىرلىعىن كورىپ، حان تاڭ قالعان ەكەن دەيدى.

---