InfoHub Logo

يران اۋماعىنداعى جاعدايعا بايلانىستى الەۋمەتتىك جەلىلەردە «قىشقىل بۇلتتاردىڭ» ورتالىق ازيا ەلدەرىنە، سونىڭ ىشىندە قازاقستانعا جەتۋى مۇمكىن دەگەن اقپارات تارادى. الايدا، «قازگيدرومەت» رمك بۇل مالىمەتتى جوققا شىعاردى.

بۇعان دەيىن مۇناي ينفراقۇرىلىمى نىساندارىنا جاسالعان سوققىلار سالدارىنان يراندا ءىرى ورتتەر مەن ۋلى بۇلتتار پايدا بولعانى تۋرالى اقپارات شىققان بولاتىن. بۇل بۇلتتاردىڭ وزبەكستان، قازاقستان جانە قىتايعا قاراي اۋىپ بارا جاتقانى ايتىلعان ەدى. سونداي-اق، تەگەراندا «قارا جاڭبىر» جاۋىپ، كۇكىرت پەن ازوت ديوكسيدىنىڭ، كۇيەنىڭ كونسەنتراسياسى جوعارىلاعانى حابارلاندى. يران قىزىل جارتى ايى دا تەرىگە حيميالىق كۇيىك شالدىرىپ، وكپەگە زاقىم كەلتىرۋى مۇمكىن قىشقىل جاۋىن ءقاۋپى تۋرالى ەسكەرتكەن.

الايدا، «قازگيدرومەت» ماماندارى بۇل اقپاراتتى عىلىمي دەرەكتەر مەن باقىلاۋ ناتيجەلەرى راستامايتىنىن ايتتى.

«قىشقىل جاۋىن نەگىزىنەن ونەركاسىپ، ەنەرگەتيكا جانە كولىكتەردەن بولىنەتىن كۇكىرت پەن ازوت وكسيدتەرىنەن تۇزىلەدى. ولار ادەتتە لاستانۋ كوزدەرىنە جاقىن جەردە پايدا بولادى. اۋا ماسسالارى ۇلكەن قاشىقتىققا تاسىمالدانعاندا، تابيعي اتموسفەرالىق پروسەستەرگە بايلانىستى بۇل زاتتاردىڭ كونسەنتراسياسى ايتارلىقتاي ازايادى. ءبىزدىڭ مونيتورينگ دەرەكتەرىمىز بويىنشا، قازاقستان مەن ورتالىق ازيا ەلدەرىنە مۇنداي لاستانۋدىڭ تارالۋ بەلگىلەرى تىركەلگەن جوق»، - دەلىنگەن حابارلامادا.

وسىعان بايلانىستى ماماندار رەسمي مەتەورولوگيالىق جانە ەكولوگيالىق قىزمەتتەردىڭ دەرەكتەرىنە سۇيەنۋگە جانە تەكسەرىلمەگەن اقپاراتتى تاراتپاۋعا شاقىردى.