InfoHub Logo

مەرەكە كۇنى ايەلىن اياۋسىز سوققىعا جىعىپ، اۋرۋحاناعا تۇسىرگەن ەر ادامنىڭ ارەكەتى زاڭگەر ايگۇل ورىنبەكتى قاتتى تولعاندىردى. ول بۇل جاعدايدى الەۋمەتتىك جەلىدە جاريالاپ، قوعام نازارىن اۋدارىپ، ءتيىستى شارا قابىلداۋدى تالاپ ەتتى.

بۇل تۋرالى Infohub.kz اقپارات اگەنتتىگى حابارلايدى.

تۇرمىستىق زورلىق-زومبىلىقتىڭ كەزەكتى قۇربانى

زاڭگەردىڭ ايتۋىنشا، مەرەكە كۇنى بولعان وقيعا كەزىندە ايەل كۇيەۋىنىڭ سوققىسىنان اۋىر جاراقات الىپ، روششا اۋرۋحاناسىنا جەتكىزىلگەن. ايگۇل ورىنبەك بۇل جاعدايعا قاتتى اشۋلانىپ، ايەلدەرگە قاتىستى زورلىق-زومبىلىقتىڭ قوعامدا ءالى دە وزەكتى ەكەنىن اتاپ ءوتتى.

قوعامعا ۇندەۋ

«مەنىڭ تاڭىم كەيدە وسىلاي باستالادى... باسقا ەلدەردە مەرەكە كۇنى ايەلدەر گۇل الىپ قۋانىپ جاتسا، ماعان كومەك سۇراپ حابارلاسادى. مىنا ايەلدى كۇيەۋى ءدال مەرەكە كۇنى اياۋسىز ۇرىپ-سوعىپ، اۋرۋحاناعا ءتۇسىرىپتى. زورلىق-زومبىلىقسىز قازاقستان ءۇشىن كۇرەسىپ جۇرگەن نازىك جاندى رەتىندە، شىمكەنت قالاسىنىڭ پوليسياسىنان وسى ءىس بويىنشا زاڭ اياسىندا ءتيىستى شارا قابىلداۋلارىڭىزدى سۇرايمىن. وكىنىشكە قاراي، مەرەكە كۇنى گۇل ەمەس، جۇدىرىق الىپ جاتقان ايەلدەر دە بار. بۇل — قوعام ءۇشىن وتە اۋىر شىندىق. حالىقارالىق مەرەكە قۇتتى بولسىن!» - دەپ جازدى زاڭگەر.

ايگۇل ورىنبەك تۇرمىستىق زورلىق-زومبىلىق ماسەلەسىنە بەيجاي قاراماۋعا شاقىرىپ، مۇنداي جاعدايلاردىڭ الدىن الۋ ءۇشىن قوعام بولىپ كۇرەسۋ قاجەتتىگىن جەتكىزدى. ونىڭ جازباسى الەۋمەتتىك جەلىدە قىزۋ تالقىلانىپ، كوپشىلىكتىڭ قولداۋىنا يە بولدى.