InfoHub Logo

كۇيەۋىنىڭ قولى ءتيىپ كەتكەن ەدى. بۇرىنعى سەزىممەن قوسىلىپ تۇرمىسقا شىققان كوڭىلىندە سودان كەيىن وعان دەگەن پايدا بولعان وكپە مە، رەنىش پە، ايتەۋىر، بىردەڭە بۇرىنعى وعان ارنالعان جۇرەگىندەگى سۇيىسپەنشىلىك سەزىمىمەن بىرگە ىشكى سارايىندا ءبىرىن-بىرى جەڭە الماي، يتجىعىس ءتۇسىپ، الماسىپ كەلدى دە وتىردى.

- ايدىن، ءاۋ، ايدىن! مىنا كويلەكتى كيىپ كورشى! ساعان الىپ ەدىم! قانە! دۇرىس العان ەكەم عوي! ءما، كەرەمەت جاراسىپ تۇر ەكەن! تۋرا ءبىر كويلەكتىڭ جارناماسىنداعى جىگىتتەردەي بولدىڭ دا قالدىڭ! (وسى كەزدە ۇرعانى ەسىنە ءتۇسىپ كەتىپ، ىشىنەن). قولىڭ سىنعىر، قولىڭ سىنعىر. مەنى ۇرعان قولىڭ سىنىپ قالمايدى-اۋ سەنىڭ. قولىڭ سىنىپ، كويلەكتىڭ جەڭى سالبىراپ تۇرسا، جاقسى بولار ەدى.

- ايدىن، ءاۋ، ايدىن! ەرتەڭ جۇمابەكتەر قارىنداسىن ۇزاتقالى جاتقان جوق پا؟ وسى كويلەكتى سول كەزدە كيىپ باراسىڭ عوي! جاراسىمدى بولىپ بارعانىڭ وزىڭە جاقسى عوي! (ۇرعانى ەسىنە ءتۇسىپ كەتىپ). سەنى كىم شاقىرعالى جاتىر سوعان؟! تەك مەن جۇرگەسىن شىعار قاسىڭدا.

- ايدىن، ءاۋ، ايدىن! ەرتەڭ جۇمابەكتىڭ ۇيىنە بارعاندا، وي، ىنىشەكتەر شىعادى عوي الدىڭنان. "ايەكە، اسسالاۋماليكۋم! ايەكە، اسسالاۋماليكۋم!" - دەپ. سىيلاعانى عوي ەندى. ىنىشەكتەر، ءقايتسىن، اعا دەپ سىيلاپ تۇرادى عوي. (ۇرعانى ەسىنە ءتۇسىپ كەتىپ). سەنى ءقايبىر سىيلايىن دەپ، سىيلاپ جاتىر دەيسىڭ سولار؟ ەلۋ گرامم ىشكەننەن كەيىن: "ىنىشەك، نە، الدەقانداي بولىپ قالدىڭ با؟! باعانا نەگە امانداسپايسىڭ اعاڭا؟!" - دەپ وتىرعىزبايسىڭ عوي سەن.

- ايدىن، ءاۋ، ايدىن! ەرتەڭ تۋعان كۇنىڭ ەكەنىن ءوزىڭ ۇمىتىپ قالعان جوقسىڭ با؟! مەن كىشكەنە دايىندىق جاساپ الايىنشى. اۋەلى، مىنا جەردى جيناپ الايىن. سايدىن، پاپاعا بارشى! جۇگىرىپ پاپاعا بار! ايدىن، وزىڭە شاقىرشى سايدىندى. (ۇرعانى ەسىنە ءتۇسىپ كەتىپ). توپاس سول! سايدىن دەگەن اتتىڭ ءبىزدىڭ تىلىمىزدە نە ءمان-ماعىناسى بار دەسە، تۇسىنەتىن بە ەدى بۇل؟ بۇعان تەك ءوزىنىڭ اتىنا ۇيقاسىپ تۇرسا، بولدى، ايتەۋىر!

- ايدىن، ءاۋ، ايدىن! وسى سايدىندى قىزدار ايتادى عوي:  "ءما، پاپاسىنان اۋماي قالعان-اۋ! قالاي ۇقساپ قالعان، ءيا!" - دەپ. (ۇرعانى ەسىنە ءتۇسىپ كەتىپ). ساعان يت ۇقساسىن. ساعان كوشەدەگى ءيتتىڭ ۇقساپ تۇرعانى جاقسى ەدى!

- ايدىن، ءاۋ، ايدىن! ەرتەڭ الدىمەن قايدىن مەن پايدىن كەلىپ قۇتتىقتايتىن شىعار؟ سول ەكى قاينىم باۋىرمال وسى! جىلداعى ادەتتەرى عوي، قۇلقىن سارىدەن كەلىپ: "اسسالاۋماعالەيكۋم، ايدىن اعا! اسسالاۋماعالەيكۋم، ايدىن اعا!"، "تۋعان كۇنىڭىز قۇتتى بولسىن، ايدىن اعا!" - دەپ وزدەرى كىرىپ قۇتتىقتاپ كەتەتىندەرى. (ۇرعانى ەسىنە ءتۇسىپ كەتىپ). قۇداي ساقتاسىن، قالاي قويعان اتتار دەسەيشى؟ ايدىنىن ايدىن دەيىك، ال! قايدىن، پايدىن دەگەن سوزدەردىڭ بىزشە نە ماعىناسى بار؟ بۇلارعا، ايتەۋىر، ۇيقاسى كەلە بەرسە، بولدى ەكەن عوي.

- ايدىن، ءاۋ، ايدىن! وسى قايدىن ۇيلەنگىسى كەلىپ ءجۇر-اۋ دەيمىن؟ نەگىزى، ۇيلەنگىسى كەلەدى. اشىپ ايتپايدى ءسوزىن. سوندا دا سەزەمىن عوي. جەڭگە ەمەسپىن بە ەندى. ءبىراق ءبىزدىڭ قايدىن قىزعا وتە قاتتى قارايدى عوي، قاتتى سىنايدى قىزداردى. (ۇرعانى ەسىنە ءتۇسىپ كەتىپ). سوعان كىم تيگەلى جاتىر وسى؟ وزىنە قاراپ السىنشى، اۋەلى. مەن سياقتى سورى قايناعان بىرەۋ تيەيىن دەپ تۇرعان شىعار؟

- ايدىن، ءاۋ، ايدىن! ءبىراق مەن دە قايدىنعا ايتامىن عوي: "دۇرىستاپ قاراپ ال، جانىم. ومىردە ءبىر-اق رەت ۇيلەنەسىڭ. ءقازىر نەشە ءتۇرلى قىزدار بار. كۇيەسىن جاعا الماي تۇرعان قىزدار دا بار"، - دەپ ايتىپ وتىرامىن. جەڭگە بولعاسىن، جانىم اشيدى عوي ەندى. (ۇرعانى ەسىنە ءتۇسىپ كەتىپ). قايدىننىڭ ءوزى كۇيەسىن جاعىپ جىبەرمەسە دەسەيشى، اۋەلى. قايدىندى كورسە، قىزدار قىرىق شاقىرىمنان اينالىپ قاشىپ جۇرەتىن شىعار؟

- ايدىن، ءاۋ، ايدىن! وسى سەن پايدىننىڭ ءان ايتاتىنىنا نازار اۋداراسىڭ با؟ ءبىزدىڭ پايدىن ءاندى كەرەمەت ايتادى عوي! داۋسى كەرەمەت ءبىراق! قىزدارعا دا ايتىپ وتىرامىن عوي، مەنىڭ پايدىن دەگەن ءانشى قاينىم بار دەپ. قىزدار دا ايتادى، ءوزىن ءبىر تىڭداپ كورەتىن ەكەن، ءار نارسەنىڭ دە ءبىر ءساتى بولادى عوي دەپ. (ۇرعانى ەسىنە ءتۇسىپ كەتىپ). وسىلارعا ونەر قايدان قونىپ ءجۇر دەسەيشى؟ ونەر دەگەن دە قونبايتىن جەرگە كەلىپ قونا بەرەدى ەكەن عوي ءوزى. مىناۋسىنىڭ ءتۇرى بولسا، مىناۋ.

- سايدىن! پاپاڭنىڭ موينىنا ءمىنىپ الشى! پاپانىڭ موينىنا ءمىنىپ ال! تەپ سوسىن وكشەڭمەن. وكپەسىنىڭ تۇسىنان تەپشى. (ىشىنەن). ءما، ءوزىم تەپكەندەي راقاتتانىپ قالدىم عوي. مىنا بايعۇس ءماز سوعان، بالاسىنىڭ تەپكەنىنە. مەنىڭ نە ويلاپ وتىرعانىمدى بىلمەيدى.

(وزىنە-وزى). قوي! ماعان نە بولعان وسى؟! ءبىر رەت قولى ءتيىپ كەتتى ەكەن دەپ، سونشا وكپەلەگەنىم نەسى؟ مىنا بايعۇستىڭ ويىندا ەشتەڭە جوق. ءماز بولىپ وتىر. قوي، ودان دا كەشىرىمشىل بولايىن.

(كۇيەۋىنە جايدارى قالىپتا قاراپ). ايدىن، ءاۋ، ايدىن! الدىمەن جۇرتتىڭ بارىنەن بۇرىن تۋعان كۇنىڭمەن ءوزىم قۇتتىقتاپ قويايىنشى! تۋعان كۇنىڭمەن، جانىم! (سۇيەدى).

---