InfoHub Logo

استانادا وتكەن «جاھاندىق كليمات سىن-قاتەرلەرى كەزەڭىندەگى ورتالىق ازيا» اتتى حالىقارالىق كونفەرەنسيادا مەملەكەت باسشىسى قاسىم-جومارت توقايەۆ وڭىردەگى ەكولوگيالىق داعدارىستىڭ وتكىر تۇستارىن اتاپ ءوتتى. پرەزيدەنتتىڭ ايتۋىنشا، ورتالىق ازيا كليمات وزگەرىستەرىنە ەڭ وسال ايماقتاردىڭ ءبىرى بولىپ سانالادى.

ايماقتا تەمپەراتۋرا الەمدىك ورتاشا كورسەتكىشتەن ەكى ەسە جىلدام كوتەرىلۋدە. بۇل – مۇزدىقتاردىڭ جەدەل ەرۋى، شولەيتتەنۋدىڭ ۇدەۋى مەن سۋ تاپشىلىعى سەكىلدى ەكولوگيالىق قيىندىقتاردى ۇدەتىپ وتىر. توقايەۆ مۇنداي جاعدايدا ورتالىق ازيا ەلدەرىنىڭ بىرلەسكەن ءىس-قيمىلى اۋاداي قاجەت ەكەنىن باسا ايتتى.

قازاقستان ءقازىردىڭ وزىندە جەل جانە كۇن ەنەرگياسىن دامىتۋدا ءىرى جوبالاردى ىسكە قوسىپ جاتىر. اسىرەسە، «جاسىل» سۋتەگى ءوندىرىسى بويىنشا الەمدىك دەڭگەيدەگى ءىرى جوبالار قولعا الىنعان. ۋران قورىنىڭ 40 پايىزىنا يەلىك ەتەتىن ەل رەتىندە، قازاقستان الداعى ۋاقىتتا العاشقى اتوم ەلەكتر ستانساسىن سالۋدى جوسپارلاپ وتىر.

سوڭعى 20 جىلدا جان باسىنا شاققانداعى سۋ قورى 30%-عا قىسقارعان. ايماقتىڭ سۋ رەسۋرستارىنىڭ باسىم بولىگى – ترانسشەكارالىق. وسىعان بايلانىستى قازاقستان بۇرىننان ۇسىنىلىپ كەلە جاتقان ورتالىق ازيا سۋ-ەنەرگەتيكا سەرىكتەستىگىن قۇرۋ يدەياسىن قايتا كوتەرىپ وتىر.

پرەزيدەنت ايماقتىڭ تابيعي ەكوجۇيەسى مەن فلورا-فاۋناسىن ساقتاۋ قاجەتتىگىن دە اتاپ ءوتتى. قازاقستان حالىقارالىق بيوالۋانتۇرلىلىك قورىن قۇرىپ، ورمان القاپتارىن قورعاۋعا ارنالعان باعدارلامانى ىسكە اسىرۋدا. سونىمەن بىرگە، وزبەكستانمەن بىرلەسىپ ارال تەڭىزىنىڭ قۇرعاعان تابانىن كوگالداندىرۋ جوباسى جۇزەگە اسىپ جاتىر.

پرەزيدەنت كليماتتىق وزگەرىستەرمەن كۇرەستە حالىقارالىق قاۋىمداستىقتىڭ قولداۋىنا جۇگىنىپ، «تازا قازاقستان» سەكىلدى اكسيالار ارقىلى ەكولوگيالىق مادەنيەتتى قالىپتاستىرۋدىڭ ماڭىزدىلىعىن اتاپ ءوتتى.

— ءبىز تەك بىرلەسكەن كۇش-جىگەر مەن سەرىكتەستىكتى كەڭەيتۋ ارقىلى عانا ورنىقتى، ەكولوگيالىق تازا ەكونوميكا قۇرا الامىز، — دەدى مەملەكەت باسشىسى.