InfoHub Logo

كوكشەتاۋدا مارافونعا قاتىسقان ايەل قايتىس بولدى

كوكشەتاۋدا جارتىلاي مارافون كەزىندە ءوزىن جايسىز سەزىنگەن ايەل كوز جۇمدى، دەپ حابارلايدى Infohub.kz.

اقپارات اگەنتتىگىنىڭ اقمولا وبلىستىق دەنە شىنىقتىرۋ جانە سپورت باسقارماسىنىڭ باسپا ءسوز قىزمەتىنىڭ حابارلاۋىنشا، 23 تامىز كۇنى «كوكشەتاۋ شامدارى» اتتى جارتىلاي مارافون وتكەن.
مارافون كەزىندە 35 جاستاعى ايەلدىڭ جاعدايى كۇرت ناشارلاعان. ول بەس شاقىرىمدىق قاشىقتىقتى جۇگىرىپ كەلە جاتقان. جەدەل جاردەم كەلگەنشە ايەلگە العاشقى كومەك كورسەتىلگەن.
جەدەل جاردەم بريگاداسى كەلگەن سوڭ ايەلدىڭ تالماسى ۇستاپ، جۇرەك سوعىسى توقتاپ قالعان. وعان شۇعىل كومەك كورسەتىلىپ، كوپبەيىندى وبلىستىق اۋرۋحاناعا جەتكىزىلگەن.
اۋرۋحانادا دا جۇرەك سوعىسى قايتا توقتاپ، ناۋقاس جانساقتاۋ بولىمىنە جاتقىزىلعان. 24 تامىز كۇنى تاڭعى ساعات 05:45-تە ايەلدىڭ بيولوگيالىق ءولىمى تىركەلگەن.
مەديسينا قىزمەتكەرلەرىنىڭ ايتۋىنشا، ونىڭ ءولىمىنىڭ ناقتى سەبەبى سوت-مەديسينالىق ساراپتامادان كەيىن بەلگىلى بولادى ەكەن.
«مارافونعا تىركەلۋ كەزىندە بارلىق قاتىسۋشى وزدەرىنىڭ جارىسقا فيزيكالىق تۇرعىدان دايىن ەكەنىن جانە دەنساۋلىعىنا تولىق جاۋاپتى ەكەنىن راستايتىن قولحاتقا قول قويادى. بۇل – الەمدىك تاجىريبەدە وسىنداي مارافونداردا قابىلدانعان تالاپ. مارافون باستالعان كۇنى ءۇش نۇكتەدە مەديسينالىق قىزمەتكەرلەر العاشقى كومەك كورسەتۋگە دايىن تۇردى. جۇگىرۋ باعىتتارى پوليسيا جانە جەدەل جاردەم قىزمەتىمەن الدىن الا مۇقيات پىسىقتالدى»، دەپ تولىقتىردى باسقارما وكىلدەرى.
اقمولا وبلىستىق پوليسيا دەپارتامەنتىنىڭ باسپا ءسوز قىزمەتى ايەلدىڭ ولىمىنە بايلانىستى قىلمىستىق ءىس قوزعالعانىن جانە تەرگەۋ ءجۇرىپ جاتقانىن حابارلادى.