InfoHub Logo

ادام ساۋداسىمەن اينالىسقان كوپ بالالى انا اباي وبلىسىندا سوتقا تارتىلدى. ول الەۋمەتتىك جاعىنان وسال جانداردى الداپ، جۇمىسقا ورنالاستىرۋدى جەلەۋ ەتىپ، اقشالاي قاراجاتتى يەمدەنگەن.

بۇل تۋرالى Infohub.kz اقپارات اگەنتتىگى حابارلايدى.

ءىستىڭ ءمان-جايى

اياگوز اۋداندىق سوتىندا ادام ساۋداسى بويىنشا قىلمىستىق ءىس قارالدى. سوتتا 62 جاستاعى، «كۇمىس القا» يەگەرى اتانعان كوپ بالالى انانىڭ كىنالى ەكەنى انىقتالدى. ول 2024-2025 جىلدارى الەۋمەتتىك جاعىنان وسال ادامداردى ىزدەپ، ولاردىڭ سەنىمىنە كىرىپ، پسيحولوگيالىق قىسىم كورسەتكەن. سودان كەيىن جۇمىسقا ورنالاستىرامىن دەپ الداپ، شارۋا قوجالىقتارىنا جىبەرىپ، العان اۆانستارىن ءوزى العان.

سوتقا بەرىلگەن مالىمەتتەر بويىنشا، جابىرلەنۋشىلەر سەمەي قالاسىندا ايەلمەن كەزدەسكەن. ول جۇمىسقا ورنالاستىرۋعا كومەكتەسەتىنىن ايتىپ، ۋادە بەرگەن. كەيبىر جاعدايلاردا سوتتالۋشى جابىرلەنۋشىلەردىڭ ەركىندىگىن شەكتەپ، قورقىتىپ، ىشىمدىككە سالدىرعان. شارۋا قوجالىقتارىنىڭ باسشىلارى ايەلدىڭ جەكە شوتىنا 100-400 مىڭ تەڭگە كولەمىندە اقشا اۋدارعان.

سوت ۇكىمى

سوتتالۋشى كىناسىن تولىق مويىنداپ، وكىنگەنىن بىلدىرگەن. سونداي-اق، كەلتىرىلگەن شىعىندى وتەپ، جابىرلەنۋشىلەرمەن تاتۋلاسقانىن ايتتى. جابىرلەنۋشىلەر دە ونى كەشىرگەنىن جانە باس بوستاندىعىنان ايىرماۋدى سۇراعان.

سوت كىناسىن تولىق مويىنداۋى، وكىنۋى، شىعىندى وتەۋى، جابىرلەنۋشىلەرمەن تاتۋلاسۋى، جاسى مەن «كۇمىس القا» يەگەرى ەكەنىن ەسكەرە وتىرىپ، جەڭىلدەتەتىن ءمان-جايلار رەتىندە قابىلدادى. اۋىرلاتاتىن ءمان-جايلار انىقتالمادى.

سوت ۇكىمىمەن اتالعان ازاماتشا 6 جىلعا باس بوستاندىعىنان ايىرىلىپ، ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە جازاسىن وتەيتىن بولدى. سوت قاۋلىسى زاڭدى كۇشىنە ەندى.