كورە الماۋشىلىقتىڭ سوڭى
بۇرىنعى زاماندا ءبىر عالىمدى ەلدىڭ پاتشاسى قاتتى قادىرلەيتىن بولادى. بۇل عالىم پاتشاعا ۇنەمى: «پاتشام، جاقسىلىق قىلعان ادامعا جاقسىلىق جاساڭىز! جاماندىق جاساعان ادامعا جازا رەتىندە ءوزىنىڭ جاماندىعى دا جەتكىلىكتى»، — دەپ ناسيحات ايتادى ەكەن. بۇل عالىمدى ۋازىرلەردىڭ ءبىرى كۇندەپ، كورە الماي پاتشاعا شاعىمدانىپتى:
— پاتشام! انا عالىم ءسىزدىڭ اۋزىڭىز ساسيدى دەپ ايتىپ ءجۇر.
— سوزدەرىڭنىڭ دۇرىستىعىنا قالاي سەنەمىن؟
— عالىمدى قاسىڭىزعا شاقىرىڭىز، ەگەردە سىزگە جاقىنداعاندا مۇرىنىن جاباتىن بولسا، ءسوزىمنىڭ راستىعى بەلگىلى بولادى.
كورە الماي جۇرگەن ءۋازىر پاتشانىڭ الدىنان شىعا سالىپ عالىمدى اسقا شاقىرادى دا سارىمساق قوسىلعان تاعام ۇسىنادى.
ءبىرازدان سوڭ عالىم پاتشانىڭ الدىنا بارعانىندا، پاتشا وعان قاسىنا جاقىنداۋىن ايتادى. عالىم پاتشاعا جاقىنداعاندا سارىمساقتىڭ ءيىسى بار ەكەنى ەسىنە ءتۇسىپ، قولىمەن اۋزىن جابادى. پاتشا ءۋازىرىم دۇرىس ايتىپتى دەگەن شەشىمگە كەلەدى. ءبىر قاعازعا «مىنا حاتتى اكەلگەن ادامنىڭ باسىن شاپ!» دەپ حات جازىپ، وراپ عالىمعا حاتتى باس ۋازىرگە اپارىپ بەرۋىن جانە ودان ءبىر سىيلىق الۋىن ايتادى. عالىم بۇل حاتتى الىپ كەلە جاتىپ جولدا باياعى كۇنشىل ءۋازىردى كورەدى. پاتشانىڭ بۇيرىعىمەن سىيلىق الۋ ءۇشىن باس ۋازىرگە بارا جاتقانىن ايتادى. «سىيلىق» دەگەن ءسوزدى ەستىگەن ءۋازىر «حاتتى ماعان بەرسەڭىز، مەن اپارسام» دەپ جالىنعان سوڭ، عالىم حاتتى وعان بەرە سالادى. ءسويتىپ حاتتى اپارعان كورە الماۋشى ءۋازىردىڭ باسى كەتەدى.
عالىم ادەتى بويىنشا قايتادان پاتشانىڭ قاسىنا بارادى. پاتشا ونى كورىپ تاڭ قالىپ، سۇرايدى:
— سەن حاتتى نە ىستەدىڭ؟
— حاتتى الىپ بارا جاتقانىمدا ءسىزدىڭ ۋازىرلەرىڭىزدىڭ ءبىرى حاتتى بەرۋىمدى سۇرادى، سوعان بەردىم.
— كەشە سول ءۋازىر ماعان، سەنىڭ «پاتشانىڭ اۋزى ساسيدى» دەپ ايتىپ جۇرگەنىڭدى جەتكىزدى. سول راس پا؟
— مۇلدەم ونداي ەشتەڭە ايتپادىم.
— ولاي بولسا نەگە كەشە الدىما كەلگەنىڭدە اۋزىڭدى جاپتىڭ؟- دەگەندە، عالىم سول ءۋازىردىڭ ونى اسقا شاقىرىپ سارىمساق قوسىلعان تاماق بەرگەنىن جانە سارىمساقتىڭ يىسىمەن پاتشانىڭ مازاسىن الماۋ ءۇشىن اۋزىن جاپقانىن ايتادى. پاتشا «سەنىڭ ايتقان ناسيحاتىڭ دۇرىس ەكەن» دەپ عالىمنىڭ سوزدەرىن قايتالاپ شىقتى: «جامانعا ءوزىنىڭ جاماندىعى جەتكىلىكتى بولدى. حاسەدشى (كورە الماعان) ءۋازىر جازاسىن تارتتى».
You Might Also Like
-
ءبىلىم جانە عىلىم ءمينيسترى اسحات ايماعامبەتوۆ مەملەكەت باسشىسىنىڭ ءبىلىم سالاسىنا قاتىستى تاپسىرمالارى قالاي ورىندالاتىنىن ءمالىم ەتتى.
