InfoHub Logo

قازاقستاندا كوۋچينگ سالاسىنا قاتىستى جاڭا تالاپتار كۇشىنە ەنەدى. ءماجىلىس دەپۋتاتى اسحات ايماعامبەتوۆتىڭ ايتۋىنشا، بۇل وزگەرىستەر 2026 جىلدىڭ 14 اقپانىنان باستاپ قولدانىسقا بەرىلەدى. ەندى «كوۋچپىن» دەپ ءوزىن تانىستىرا سالۋ جەتكىلىكسىز بولادى، مامان ءوز ءبىلىمى مەن كاسىبي دايىندىعىن ارنايى قۇجاتتارمەن راستاۋى ءتيىس.

بۇل تۋرالى Infohub.kz اقپارات اگەنتتىگى حابارلايدى.

«ەرتەڭنەن باستاپ ءوزىڭدى كوۋچپىن دەپ ايتا سالۋ مۇمكىن بولمايدى. 14 اقپاندا ەلىمىزدە كوۋچينگ قىزمەتىنىڭ كاسىبي ستاندارتى رەسمي تۇردە كۇشىنە ەنەدى. بۇل جاي عانا ءسان نەمەسە BIO-داعى ادەمى ءسوز ەمەس، مەملەكەت رەتتەيتىن ماماندىق. ەڭ باستىسى – كوۋچتاردىڭ ءبىلىمى مەن بىلىكتىلىگىن راستايتىن ارنايى قۇجاتتارى بولۋى قاجەت، باسقا دا تالاپتار بار»، – دەپ جازدى دەپۋتات اسحات ايماعامبەتوۆ Threads جەلىسىندەگى پاراقشاسىندا.

جاڭا ستاندارتتىڭ ماقساتى

جاڭا ستاندارت كوۋچتەردىڭ كاسىبي قۇزىرەتىن ايقىنداپ، ولاردىڭ دايىندىق دەڭگەيىنە ناقتى تالاپتار قويادى. ساراپشىلار بۇل وزگەرىستەردىڭ قىزمەت ساپاسىن ارتتىرۋعا، تۇتىنۋشىلار قۇقىعىن قورعاۋعا جانە كاسىبي دايىندىعى جوق ادامداردىڭ نارىققا ەركىن كىرۋىن شەكتەۋگە باعىتتالعانىن اتاپ وتۋدە.

سوڭعى جىلدارى ءوزىن «جەكە دامۋ ساراپشىسى»، «موتيۆاسيا ترەنەرى» نەمەسە «كوۋچ» دەپ تانىستىراتىندار كوبەيگەنىمەن، ولاردىڭ كاسىبي دەڭگەيى مەن بىلىكتىلىگىنە ناقتى باقىلاۋ بولماعان. بۇل جاعداي قوعامدا الاڭداۋشىلىق تۋدىرىپ، ۇكىمەتتىڭ نازارىن اۋداردى.

كوۋچينگ – بەيرەسمي ءبىلىم بەرۋ فورماتى

قولدانىستاعى زاڭنامادا كوۋچينگ ەرەسەكتەرگە ارنالعان بەيرەسمي ءبىلىم بەرۋ قىزمەتى رەتىندە قاراستىرىلادى. وقىتۋ فورماسى، ۇزاقتىعى نەمەسە وتكىزۋ ورنى ناقتى رەگلامەنتتەلمەگەن. نەگىزگى يدەيا – ادامعا ءوزىن دامىتۋعا، الەۋەتىن اشۋعا، ومىرلىك باعىت-باعدارىن انىقتاۋعا كومەكتەسۋ.

الايدا، بۇل سالانىڭ رەتتەلمەۋى ءتۇرلى كۇماندى قىزمەتتەرگە جول اشقان. كەيبىر «ماماندار» الەۋمەتتىك جەلىلەر ارقىلى كۋرستار ساتىپ، ءتۇرلى ۋادە بەرىپ، ءبىراق ناقتى ناتيجە ۇسىنا الماي وتىرعانى ءجيى ايتىلادى. كوپ جاعدايدا بەرىلەتىن سەرتيفيكاتتاردىڭ دا مازمۇنى مەن ساپاسىنا ەشقانداي باقىلاۋ جوق.

شەتەلدەگى كوۋچينگ ستاندارتتارى

اقش پەن ەۋروپا ەلدەرىندە كوۋچ بولۋ ءۇشىن ارنايى كۋرستاردان ءوتىپ، كاسىبي قاۋىمداستىقتاردان سەرتيفيكات الۋ تالاپ ەتىلەدى. مىسالى، International Coaching Federation (ICF) سەكىلدى ۇيىمدار كوۋچتەردىڭ كاسىبي ستاندارتتارىن بەكىتىپ، اككرەديتاسيا جۇرگىزەدى. رەسەي مەن جاپونيادا دا ساعاتتىق وقۋ تالاپتارى مەن قايتا دايارلاۋ جۇيەسى بار.

ال قازاقستاندا بۇعان دەيىن كوۋچينگ قىزمەتىن باستاۋ ءۇشىن ليسەنزيا، رۇقسات نەمەسە مىندەتتى كاسىبي بىلىكتىلىك تالاپ ەتىلمەگەن. كەز كەلگەن ادام ءوزىن كوۋچ رەتىندە تانىستىرىپ، كۋرس وتكىزە الاتىن. بۇل جاعداي تۇتىنۋشىلاردىڭ قۇقىقتارىنىڭ قورعالماۋىنا جانە ساپاسىز قىزمەتتىڭ كوبەيۋىنە سەبەپ بولىپ وتىرعان.